سليمان عيد: "عمرى الفنى فى إفيهات الناس حفظتها والحاجات اللى فيها تمثيل"

فى لقاء خاص، استضاف تليفزيون اليوم السابع الفنان سليمان عيد، للحديث عن أبرز خطوات مشواره الفنى والمواقف الشخصية فى حياته وعلاقته بأكبر نجوم الكوميديا فى مصر، من إعداد محمود نصر وتقديم حور محمد.

وعن فيلمه الجديد مع النجم محمد هنيدى النمس والإنس وعلاقته به وكواليس الفيلم، قال الفنان سليمان عيد:" من بداية حياتى وأنا في الهواة كنت بتفرج على هنيدى.. إحنا عشرة عمر وهو أصغر منى بكام سنة بس هو شخصية مميزة جدا من قبل النجومية.. عشنا سنين كتيرة جدا قبل إسماعيلية رايح جاى اللى فيها كفاح وتعب.. المرحلة دى بنبقى جيل واحد قلبنا على بعض.. مجرد ما نجح رشحنى في أول أفلامه كان صعيدى، وبعدها همام مشهد وبعدها بقا كل اللى بعمله مع هنيدى بيعلم وبيبقى في كيمياء حلوه.. بعد كده بقا كل اللى عملته مع هنيدى كان بيعلم وبيكسر الدنيا.. وافتكر في جاءنا البيان التالى كنت عامل فيه مشهدين ووقتها كنت عامل فيلم تانى فيه دور كبير وفاكر أن الدور الكبير اللى هيكسر الدنيا.. لقيت مصر كلها واخده المشهدين بتوع جاءنا البيان التالى ويا علاء وباور فاميلى ."

وتحدث سليمان عيد عن دوره فى فيلم عسكر فى المعسكر، وقام بإلقاء القصيدة التي ألقاها خلال الفيلم، وكواليس المشهد ومن كتب القصيدة مشيرا إلى أن المؤلف أحمد عبد الله، موضحا أن كلمة أنى اسف التى جاءت في نهاية القصيدة كانت من اقتراح ماجد الكدوانى.

وعن أكثر الأدوار التي راهن عليها وفشلت والأدوار التي كان قلقا منها ونجحت نجاحا باهرا، قال:" أنا عملت مسلسل سنة 2007 تأليف الأستاذ بشير الديك وإخراج الراحل الأستاذ نادر جلال إسمه درب الطيب بطولة النجم هشام سليم، وده أحلى دور في حياتى مثلته والمسلسل بيحكى عن الشيخ نور الدين الحجاجى في الأقصر وكل الأقصر والصعيد شافوا المسلسل وكنت عامل أحلى دور في حياتى وكان نفسى يتشاف .. بس هو المسلسل كان فيه طابع صوفى الناس مش بتشوفه زى الاجتماعى كنسبة مشاهدة وكنت متوقع انه هينجح بس محصلش نصيب "

وعن الأدوار الصغيرة التي فاجأه نجاحها قال:" الأدوار الصغيرة كلها كنت ببقا متخيل ان محدش هياخد باله أنا بقول الإفيه وخلاص ومتخيل ان محدش هياخد باله .. محدش هيحفظه " ، وتابع : السينما كانت الدنيا صغيرة بعدين لما بدأ ينزل في التليفزيون النسبة كبرت وبعدين السوشيال ميديا بدأت الناس تاخد الإفيه وتعمله على حاجه تانية فالنجاح بقا أكثر".

وروى خلال اللقاء، موقف كوميدي ارتجل خلاله مع النجم الراحل حسن حسنى، في فيلم الباشا تلميذ والإفيه الشهير "انتباه يا عسكرى .. مش انتباه هه" ، قد إيه الإفيه ده علم مع الناس فالحمد لله .

وعن عمره الفني :" مش بالسنين بالأعمال.. الحمد لله كل الإفيهات اللى علمت مع الناس .. والحمد لله .. الأستاذ إبراهيم فخر دايما يقولى انى عندى ممثل تراجيديان زى الكوميدى بالظبط.. أنا بتطلب في الكوميدى بس بتمنى اتطلب في حاجات تانية.. وبتمنى انى أبقى ناجح في الحاجتين".

وتابع :"خدت أحسن ممثل ثانى عن فيلم واحد من الناس " في حين أن الأدوار الكوميدى مخدتش فيها جوايز رغم انها أصعب من التمثيل العادى.

وعن اهتمامه بالبطولة المطلقة قال:" انا حاولت مرتين .. والمرتين محصلش فيهم نصيب فعرفت أن دا مش طريقى وكنت بسعى في سنة من السنين للبطولة المشتركة فا عملنا فيلم اسمه كباريه.. وكنت بتمنى انه ينجح لأن البطل هو الورق، مشيرا إلى أنه في زمن الفن الجميل كان النجوم كثير في الأعمال والبطل هو الورق ".

وعن المرتين اللتين فشل فيهما في حياته:" كان في فيلم اسمه عسكر حب.. كان لسا في وجوه جديدة طالعه أحمد رزق ومحمود عبد المغنى وأحمد زاهر وكانو طلبه في جامعة خاصة وأنا سواق الأتوبيس بتاعهم.. قعدت سنة بصور فيهم وأنا بصرف على نفسى من ثانوية عامة ..  فمكانش في مجال انى اقعد ما اشتغلش .. كان معايا 20 ألف جنيه خلصوا على آخر السنة وبقيت مش عايز انزل البيت علشان انا ممعيش فلوس .. ومكتوب ان أنا بعمل بطولة الفيلم.. لحد ما المنتج ساب الفيلم وراح عمل فيلم تانى مع عبله كامل خالتى فرنسا ولغى الموضوع".

وعن أقرب الأدوار لشخصيته قال :" شخصيتى في مسلسل درب الطيب وهو موجود على السوشيال ميديا .. بيحكى حاجات مش موجوده في مسلسلات تانية "، مشيرا إلى أن التاريخ المصرى ملىء بالأبطال موضحا أنه يتمنى أن يتم تجسيد هؤلاء الأبطال في السينما المصرية قائلا :" بره بيخترعوا أبطال لنفسهم .. احنا أصلا عندنا أبطال بس مفيش أفلام "

وعن عمله مع النجوم وتحديدا الفنان سمير غانم وما هي الأشياء التي استفادها منه، قال:"هو أول كوميديان أشوفه في حياته وأول كوميديان أضحكله .. المتزوجون وقصة الحى الشعبى .. دخلت الجامعة وبقيت كوميديان في الجامعة .. وأنا هاوى .. الله يرحمه الأستاذ شاكر خضير كان بيخرج مسرحية "جحا" للفنان الكبير سمير غانم وكانت تأليف وحيد حامد ..وأنا كنت بعمل مسرحية في الجامعة إخراج الأستاذ شاكر خضير وكنت عامل كوميديا كتير 12 شخصية كوميدية .. فقالى انا عايزك معايا في مسرحية سمير غانم .. وحطونى في بداية المسرحية في مشهد كوميدى "

وحكى سليمان عيد عمله مع الفنان سمير غانم قائلا :" بداية الاحتراف كانت هي المسرحية دى .. وقعدت مع الأستاذ سمير 7 سنين .. من أجمل سنين حياتى .. الأستاذ سمير بيحب يهزر كتير فا كوميديا طول الوقت "

وعن ذكرياته مع الزعيم عادل إمام ، قال :" عادل إمام بقا الالتزام .. طبعا بنهزر وكل حاجه بس لينا ساعة قبل العرض بساعتين كده كلها هزار .. وقبل العرض بساعة مفيش هزار كله بيستعد "

وعن الموقف الذى مر في حياته ورأى أنه يصلح للاستخدام الكوميدى: قال ان مشهده مع هانى رمزى في فيلم أبو العربى تحول من موقف حياتى إلى مشهد فى الفيلم ، وروى كواليس الموقف الحقيقى وقال:" الموقف ده حصل فعلا في الحقيقة وعشته مع أحمد آدم .. كان بيلعب بلياردو هو وصلاح عبد الله وواحد عاوز يتصور معاه .. وأحمد آدم عاوز يخلص الدور .. والتانى يقوله بعدها بدقيقة طيب يلا . وطلعت بالشكل الكوميدى ده "

 وعن رأى سليمان عيد في غدر الفن بالفنانين قال:" الزمن مبيغدرش بحد .. بس البنى آدم هو اللى بيشوفها كده .. أنا من النوع اللى متربى انى مستلفش من حد.. أمشى على قد اللى معايا بالظبط .. فامشى ساعتين من البيت للمعهد علشان أعرف أصرف الـ 10 في الشهر وببقى راضى .. والرياضة نفعتنى جدا في حياتى .. الناس لما ترضى بوضعها مبيبقاش الظروف وحشه ..  الظروف بتبقى وحشه في الظاهر .. علشان في مرض وكده .. لكن المرض ده يمكن يكون الاختبار اللى عايزه ربنا .. أعيش على قدى أنبسط ".

وعن عدم مشاركته في أعمال كثيرة قال :" ساعات شيطان بيجيلى يقولى ما انت قاعد اليومين دول مبتشتغلش .. لكن أنا طول عمرى مؤمن بان لو المخرج شافنى في الدور يبقى بتاعى .. ربنا كاتبلك رزقك غصب عنى أي حد ".

وعن الموقف الذى حدث بينه وبين تامر حسنى مؤخرا قال :" تامر حسنى شخصيا مبنعرفش بعض أوى .. أنا جاى اليوم السابع  النهارده بسبب شخص هو اللى عرفنى على تامر حسنى وهو عادل عبد الله .. أنا كنت بعمل فرح بنتى وإمكانياتى على قدى.. نفسى البنت تفرح بحد .. البنت والعيلة كلها بتحب تامر حسنى  .. فا عادل قالى ما تكلمه .. وحكالى عن شخصية تامر حسنى فا كلمته وقفلت لقيته بيتصل .. بقيت فرحان جدا انه عارفنى .. وعزمته وقالى هكتب عندى أهو وسجل المواعيد .. ولحد الفرح وأنا بقول انه هيعتذر .. لحد يوم الفرح جه وأنا والعيلة كلها بقينا مبسوطين .. ومهما قولت في أي برنامج مش هعرف أشكره على ده "

وتحدث سليمان عن رأيه في السوشيال ميديا وموقف مع أدمن أحد الصفحات وقال:" شتمنى وبلغت عنه وقبضوا عليه وكنت هحبسه  .. وطلع غلبان وقال أنا بشتم علشان ترد عليا .. فا سبته وخليته يروح "

وأوضح:" أنا بشتغل مسرح يومى في مسرحية اسمها صباحية مباركة من إنتاج أشرف عبد الباقى .. اللى كان عنه هدف يعمل مسرح كوميدى .. وحقق حلمه ".

وأضاف :" زمان كان في نجوم بيمنعونا اننا نقول كوميدى لكن أشرف كان بشجعهم وبيقولهم اللى هيضحك .. زمان كان النجم الأوحد .. وكان في نجم كبير عمل معايا موقف ومشانى من البروفات بسبب إفيه قولته .. قالى أنا معنديش كده ".