- الأشعار اللى بكتبها على "السوشيال ميديا" ضد الإخوان "من تأليفى"
- فرجاني ساسي مش في حالته.. وهذا رأيى فى تدريب رضا عبد العال الزمالك
- الأهلى كسب الدوري من زمان وحالته دلوقتي مش ولابد
- بيعجبني دماغ أشرف عبد الباقي في المسرح وبقتضى بيه
- عمرو دياب صاحبى وكنت بلاعبه بلياردو
قال الفنان القدير صلاح عبد الله: "الأشعار اللي بكتبها على السوشيال ميديا ضد الإخوان من تأليفى وأي أشعار أخرى في هذا الشأن"، مضيفاً أن أي شعر ينقله عن شخص آخر ينسبه لصاحبه. وأضاف خلال حواره مع "تليفزيون اليوم السابع"، حيث أعد الحوار محمد محسوب، وأدارته رغدة بكر: "اللجان الإلكترونية للإخوان بتهاجم أي شخص بيتكلم عن البلد أو القيادة السياسية بطريقة كويسة وأنا منهم".
وتابع: "لقيت هاشتاج على مواقع التواصل الاجتماعى إمبارح اسمه (لست وحدك) فدخلت وقولت فعلاً إنت لست وحدك ولكنا معاك وإحنا مقتنعين إنك بتعمل لمصر وبتحب مصر وكلنا معاك ووراك"، مضيفاً أن لجان الإخوان هاجمته بعد مشاركته في هذا الهاشتاج بشكل كبير بقدر من التجاوز والسباب.
وأكد أن دعوات الإخوان للتظاهر على السوشيال ميديا فقط، مضيفاً ميادينهم تويتر وفيس بوك، متابعاً: "الأول كنت بتخض من تعليقات بوستاتي ولما عرفت إنهم لجان بقى الموضوع عادي".
وشدد صلاح عبد الله على أن الفنان نبيل الحلفاوي هو من نبه وذكر له أن اللجان الإلكترونية للإخوان على مواقع التواصل الاجتماعى هي التي تسبه، مضيفا: "الإخوان بيشتموني طول الوقت وميستهلوش أرد عليهم"، متابعا: "مفيش وطني بجد ميعملش اللي بيعملوه".
وردد صلاح عبد الله أبيات من أشعاره التي دونها على حساباته على مواقع التواصل الاجتماعى رداً على سباب الإخوان له قائلاً: "في انتظار الثورة قاعد بتشتم من الثوار اللي ثايرين بالشتيمة ليل نهار اللي سلاحهم السفالة، اللي كفاحهم الندالة اللى راضعين مالزبالة، والخيانة والعمالة هيا اللي واخداهم شِعار اللي ثورتهم لسان، اللي أشجعهم جبان اللي بالنسبة لينا مكشوفين من زماااااان اللي صدر الميديا ليهم هيا المخبأ والميدان".
من ناحية أخرى قال إنه أنفق على الفن في بداية مشواره مؤكدا: "وعيت على الدنيا لقيت نفسي بمثل، وبدأت بكتابة مقاطع تمثيلية، وصرفت على التمثيل من جيبي، وكنت هاوي وبدي دروس علشان أصرف على الهواية اللي هيا التمثيل"، مضيفاً: "بدأت مع فرقة استوديو 80، وأول عرض ليا كان في المسرح القومي في مسرحية (رابعة العدوية)".
وذكر صلاح عبدالله أنه بدأ التمثيل مع الفنان أحمد آدم ولهما رحلة طويلة من العمل سويا، واشتركا في مسرحيتين استمرا لمدة 7 سنوات وهما "فيما يبدو سرقوا عبدو" و"حودة كرامة".
وذكر أن العامل المشترك بينه وبين أحمد آدم هو الزجل وحبه للفن، مضيفاً أن آدم يحفقظ العديد من أشعار الأبنودي وبيرم التونسي وصلاح جاهين ويستطيع تقليدهم.
وأكد صلاح عبد الله أنه يعمل في الفترة الحالية على تشجيعه على الاشتراك في الدراما التليفزيونية لأنها المطلوبة في مصر حالياً.
وذكر أنه تعرف على علاء ولى الدين في مسرحية "حمري جمري"، كما اشترك معه في العديد من المسرحيات واتفق على العديد من المسرحيات لأداؤها معه، مضيفا: "مفيش يوم بيعدي غير لما يذكر إسم علاء ولي الدين في موقف ما، ويذكر بكل الحب والتقدير والنس بتدعيله"، متابعاً: "علاء اتخطف مننا لكن الموت حق وكلنا كنا بنحبه".
حوار الفنان صلاح عبدالله مع تليفزيون اليوم السابع
وعلق الفنان القدير صلاح عبد الله على رفض النجم يوسف الشريف التلامس فى الأعمال الفنية، قائلا: "يوسف حبيبي وعالمي وراجل واضح وقبل ما بيدخل العمل بيبقى ليه ملحوظات معينة مش بالطريقة اللي تناولتها الميديا، لأن الميديا كبرت الموضوع واتكلمت عن التلامس وغيره". وأضاف: "يوسف الشريف بيقول فيه أعمال أنا مش هقدر أعملها هاتوا ممثل غيره ودا أنا بحترمه".
وتابع صلاح عبد الله: "تصريحات يوسف الشريف فيه ناس خدتها من الناحية الدينية وناس خدتها من نواحي تانية وعلمت ليه مشكلة".
وأضاف صلاح عبد الله: "أنا لما بيجيلي عمل فني بسأل المخرج إنت عارفني الأول؟، لأن جاتلي جلطة في 2010 أثرت على الحركة وقبل ما أشترك يعرف المرض ده".
وتابع المخرج ممكن يطلب مني حركة تؤذيني أو مقدرش أعملها بسبب مرضي وأنا بعرفه علشان ميحرجنيش ودا حقي كممثل"، مضيفاً الاتفاق قبل العمل كويس علشان الظهور وأساس العملية الفنية بقت إنتاجية بتبدأ من المخرج.
وقال الفنان القدير صلاح عبد الله إنه زملكاوي متعصب، وحمادة إمام رحمه الله من اللاعبين الذين جعلوه يجب كرة القدم كثيرا. وأضاف: "حبيت الجوهري كمان واللاعبين اللي من سني ودا جيل محدش ينساه طبعاً".
وتابع: "بحب دلوقتي محمود علاء وجنش وساسي ومصطفى محمد وطارق حامد وأشرف بن شرقي"، مؤكدا: "لو أنا مدرب الزمالك دلوقتي هلعب بيهم قدام الوداد ومعاهم باقي اللاعبين من القوام الرئيسي للفريق".
وحول فكرة تولى الكابتن رضا عبد العال تدريب نادي الزمالك قال: "علاقتي برضا عبد العال قوية وأكتر واحد بيضحكني في الرياضيين ودايماً بقوله كدة وكان لاعب حريف أوى".
حوار حصري لتليفزيون اليوم السابع مع الفنان صلاح عبدالله
وأضاف الفنان صلاح عبد الله: "أنا كلمته وقولتله لما سبت الزمالك وروحت الأهلى كانت حاجة صعبة علينا ومش قادرين نستوعبها".
وتابع: "في التدريب لسه معرفش رضا عبد العال، لكن أنا بفضل للعيبة الزمالك مدرب أجنبي لأني دايماً بقول لوعايزين تعرفوا الدلع الماسخ اتفرجوا على لاعيبة الزمالك بعد ما بيجيبوا جون ودا من ضيقي وزعلي من اللي بيعملوه في الملعب".
وقال إن النادي الأهلى كسب الدوري من قبل كورونا، مضيفاً الفرقة دي روح الفنلة الحمرا موجودة فعلاً وكمان روح الفنلة البيضا موجودة لكن ساعات بتكون في الجمهور الزملكاوي المخلص أكتر من اللاعيبة".
وأضاف: "الأهلى حالته في الفترة الأخيرة متطمنش ومش ده الأهلى، وأنا قلقان على الأهلى والزمالك في بطولات أفريقيا لأن البطولات دي اللي بتعمل سمعة للبلد لأن اللي بيترفع هو علم مصر". وتابع أن الرياضة أصبحت صناعة وأنه كان متحفظا عليها من قبل إلا أنه بعد ذلك اقتنع بها.
من ناحية أخرى تحدث عن المسرح قائلا: بيعجبني دماغ أشرف عبدالباقي في المسرح وباللي عمله في مسرح مصر وبقتضي بيه ونصيحته ليا بتكون في محلها"، متابعاً: "أتمني معملش دور أندم عليه".
وقال صلاح عبد الله: "إن الحظ يعلب دوراً في بعض الأحيان مع البعض وكذلك الموهبة"، مضيفاً: "في شغلانتنا في إتنين نجم وممثل والنجم مش شرط يكون ممثل قوي والممثل القوي مش شرط يكون نجم والذكاء إني بلعب في منطقة التمثيل اللي نجحت فيها"، متابعاً: "مش لازم كل الناس تكون ناجحة زي عادل إمام وهو فنان حالة مستثناه، ومش شرط كل اللي اشتغلوا في التمثيل يكونوا عمرو دياب وعادل إمام".
في ساق متصل قال: عمرو دياب صاحبي وكنت بلاعبه بلياردو أيام مسلسل الملك فاروق، وهو زكي، وكان بيتصل بيا بعد حلقات مسلسل الملك فاروق يسألني عن حاجات".
تم أضافة تعليقك سوف يظهر بعد المراجعة