طظ فى الملايين ياعاشور مقابل حب جمهور الأهلى
الأهلى عنده "ولاد نادى" عايزين الإعدام فى ميدان عام
أصدقاء السوء سبب أزمة صالح جمعة مع الأهلى
بقول لحسام البدرى "صاحب بالين كداب"
اللى ندمان على اللعب للأهلى ميشرفناش ومش عايزينه
معرفش كهربا راضى بدكة الأهلى ليه؟
أزارو أفضل من بادجى وإكرامى لازم يمشى
خدوا منى ملايين الدنيا وأرجع ألعب مباراة مع الأهلى
بلاش الزمالك ياعاشور كفاية خساير
الاهلى منع علاء إبراهيم من التدريب بعد توقيعه للمصرى
تفكير عبد الله السعيد "مادى" وعمل دوشة على الفاضى
أحمد الشيخ تنازل عن 2 مليون جنيه حباً في الأهلى
طاهر محمد طاهر بيفكرنى بمحمد بركات
قرارات مجلس الخطيب الأخيرة فيها ريحة هيبة الأهلى
مستنى 5 بطولات أفريقية من فايلر عشان أقارنه بجوزيه
لقب القرن فى دولاب الاهلى وبنحب هزار الزملكاوية
محمد صلاح صفقة القرن في الكرة المصرية
أبرز من حمل شارة الكابتن فى تاريخ الأهلى، رفع أكبر كم من الكؤوس على منصات التتويج وحصل على بطولات عديدة مع جيل وصف بأنه "الأفضل" في تاريخ القلعة الحمراء، يعشق المناطق الشائكة ، يهوى الآراء الجريئة، ومثلما كان مدافعاً عن الأهلى في أرض الملعب يظل مدافعاً عن الكيان الأحمر في كل مكان، شادى محمد كابتن الأهلى الأسبق فتح قلبه لـ"اليوم السابع" فى حوار لا تنقصه الصراحة..
*كيف تابعت رفض البعض لقرار عودة بطولة الدوري؟
لازم الحياة تستمر، ولكن الأزمة أن كل واحد ينظر لمصلحته الشخصية بعيداً عن مصلحة الرياضة ككل، الأندية التى تخشى الهبوط هى من رفضت عودة المسابقة ولو كان لهم مصلحة فى عودة الدورى كانوا هيطالبوا بعودته.
*البعض اتهم الأهلى بالبحث عن التتويج باللقب لإصراره على عودة الدوري؟
الاهلى لو لعب أسبوعا واحدا هياخد الدورى، الأهلى كده كده بياخد الدوري كل موسم مفيش جديد، ولكن مش دى الفكرة، لكن الأهم عودة الكرة المصرية بنظام ومثل كافة مسابقات العالم، هل دول العالم رجعت النشاط عشان الأهلى بردو؟.
*ما تعليقك على تمسك البعض بإلغاء الدوري حفاظاً على الأرواح؟
حياة أي إنسان أهم من مليون دورى، بس ربنا إدانا عقل نفكر بيه ، وارد ظهور إصابات ولكن الحياة لازم تستمر ، عندنا شيزوفيرينيا لما الدوري وقف قعدنا نصرخ ونعيط ونقول لازم يرجع واللاعيبة اشتغلت في فرن بمهانة كبيرة، فترة تجميد 4 أشهر كبيرة جدا لما نرجع نلعب.
*ماردك على ندم نجوم الزمالك على ارتداء فانلة الأهلى؟
أي لاعب ندم أنه لعب للأهلى لايشرفنى ارتداؤه قميص الأهلى، وإحنا اللى ندمانين على وجودكوا في الأهلى، أياً كان إنتو مين، اللى ميتشرفش بالأهلى وقيمته إحنا اللى مش عايزينه، الأهلى نعمة كبيرة ولازم الكل يعرف كدا.
*هل ظلم الأهلى حسام عاشور؟
بعيداً عن الحب والعواطف والصداقة الأسرية، أنا كشادى محمد لو خدوا منى ملايين الدنيا وأرجع ألعب مباراة بقميص الأهلى هوافق، والله مش كلام ولا شعارات ولا تزييف للحقائق ولا بحث عن منصب، الرجوع للأهلى نعمة كبيرة، عاشور أخطأ دون جدال، معندوش خبرة في التعامل مع مواقع التواصل، والأهلى حتى لو أخطأ فهو أدى عاشور كتير ومش عاشور بس كل اللاعيبة، أداهم شهرة ونجومية وفلوس وخلاهم يساعدوا أهاليهم ويعلموا ولادهم، فمهما الأهلى عمل وخد قرارات منطقية ضدك كان لازم تحافظ على التاريخ والبطولات والسنين وطظ فى الملايين أمام حب جمهور الأهلى.
*هل تتوقع أن ينتقل حسام عاشور للزمالك ؟
معنديش معلومة.. بس نصيحتى لعاشور بلاش تزود زعل جمهور الأهلى منك، بلاش خساير أكتر من كدا.
*وماذا عن موقف أحمد فتحى مع الأهلى؟
أحمد فتحى ليه تاريخ مع الأهلى حقق بطولات وإنجازات ومقاتل وروحه عالية، وهو حر فى قراره عايز يأمن مستقبله ولكن موقفه يختلف عن عاشور.
*هل لقب ابن النادى هو سبب الاختلاف بين عاشور وفتحى؟
مفيش حاجة اسمها ابن النادى، عندنا ولاد نادى عايزين يتعدموا فى ميدان عام، ومش بحب أسمع صوتهم ولا أشوفهم، ملهاش علاقة دى كدبة كبيرة، الأهلى مش حكر على حد واللى بيخلص بيستمر، وفى لاعيبة مش أبناء الاهلى أخلصوا للكيان أكثر من ناس كتير اتربوا جواه سنين.
*كيف ترى موقف عبد الله السعيد؟
موقف عبد الله السعيد تفكير مادى بحت ، والبروباجندا اللى اتعملت للصفقة ليست على حجم الإنجازات التي حصلت على أرض الواقع .
*كيف ترى معاملة أحمد فتحى في الأهلى بعد الانضمام لبيراميدز؟
موقف حلو.. بس قبل كدا علاء إبراهيم اتمنع من نزول للتمرين بعد ما إدارة الأهلى عرفت أنه وقع للمصرى البورسعيدى فى السر، وتم منحه مستحقاته المالية بالكامل، كل إدارة ليها موقفها وأسبابها، ولازم فتحى يكمل مشواره للنهاية مع الفريق خاصة أنه مقيد فى أفريقيا.
*وماذا عن التشابه بين فايلر وجوزيه؟
مقارنة غير مقبولة بالنسبالى، لما فايلر يحقق إنجازات جوزيه ساعتها نتكلم، لازم يحصد 5 بطولات أفريقية وساعتها نفكر نقارن بينه وبين جوزيه صاحب التاريخ الكبير، مقارنة ظالمة بس لازم نعرف أن الأهلى هو اللى بيصنع المدربين واللاعبين، فى ناس دخلت النادى محدش يعرفها وخرجوا مشاهير ونجوم.
*هل خسر الأهلى كارتيرون؟
كارتيرون لم يكن معه الإمكانيات الحالية فى فريق الأهلى، واجه ظروفا صعبة للغاية وقت وجوده في الاهلى.
*أيهما أفضل كارتيرون أم فايلر؟
مقارنة صعبة، كارتيرون كان محتاج لاعيبة كويسة وفايلر عنده كتيبة كبيرة من النجوم.
*كيف ترى فرص الأهلى في التتويج بدوري أبطال أفريقيا؟
الأهلى المرشح الأول للتتويج باللقب وأتمنى أن يوفق هذه المرة.
*كيف تابعت احتفالات الزمالك بلقب نادى القرن الحقيقى؟
لقب القرن في دولاب الأهلى من 20 سنة، اعتبرته هزار وناس دمهم خفيف بنضيع وقت عشان مفيش كورة، محتاجين حاجة كدا وسط الضغوط تخلينا نضحك، ونصيحتى لجمهور الأهلى مش كل حاجة تاخدوها على اعصابكو ، إحنا نادى القرن بس لازم نهزر معاهم.
*ما رأيك في مسميات لاعب التاريخ وصفقة القرن؟
لاعب القرن ده اللى يجيب بطولات أكتر من أي حد اللى يحافظ على مستواه سنين متواصلة ، لكن فكرة توزيع الألقاب عمال على بطال مش مقبولة.
*في رأيك من يستحق لقب صفقة القرن؟
محمد صلاح بس، إحنا بنهرج مع بعض بس هنا.
*هل تؤيد شراء الأهلى لرمضان صبحى بهذه المبالغ الفلكية؟
كل لاعب يرتدى فانلة الأهلى بحترمه.. بس الخطيب وحسن حمدى وصالح سليم وأبو تريكة وبركات ومتعب وشادى محمد ووائل جمعة بطلوا كورة والأهلى كمل وخد بطولات، الأهلى لايقف على أى لاعب، ولازم الجمهور يفهم كدا، يقعد اللى يقعد ويمشى اللى يمشى، واللى يختار نادى تانى غير الأهلى مع السلامة والنادى فيه أربع بوابات يتفضل يخرج منهم وهنقوله شكراً.
*هل تشعر أن رمضان صبحى قصر في حق الأهلى ؟
شوفت لاعيبة كتير ضحت من فلوسها عشان خاطر الأهلى، وهما ماعاشوش لحظة في النادى لمجرد أنهم بيحلموا بارتداء الفانلة الحمراء تمثيل نادى القرن، الحياة مش فلوس.
*هل تتذكر تضحيات للاعبين من أجل اللعب للأهلى ؟
مضيت على بياض ست سنين أقسم بالله ما أعرف الرقم اللى اتحط كام، وخدت أقل لاعب وأنا كابتن الأهلى، أحمد الشيخ تنازل عن 2 مليون جنيه من أجل الأهلى، أبو تريكة مضى للأهلى على بياض ودى شهادة هيحاسبنى عليها ربنا لأنى شوفتها بعينى.
*كيف ترى الأسعار الجنونية للاعبين في الكرة المصرية؟
مفيش لاعب في مصر يستحق كل هذه الأموال، وبيراميدز السبب في هذا الارتفاع الجنونى، وأنا مش باصص لحد وعينى مليانة أوى وأكتر من أي حد.
*كيف ترى تعاقد الأهلى مع طاهر مع طاهر؟
لاعب متميز ولكن اللعب في الأهلى مختلف عن المقاولون مع احترامى له، لاعب واعد برجله واسع زى محمد بركات بينقل الفرقة من الدفاع للهجوم بسرعة ومركز ولازم يتحمل الضغوط ويعيش لاعب محترف بجد وساعتها هتكسر الدنيا.
*من ترشحه لتدعيم خط الأهلى في الصيف ؟
دونجا لاعب بيراميدز لاعب كويس وهيفرق ومستواه هيزيد 60 % عن المستوى الحالي والأهلى محتاج تدعيم في الدفاع، عنده ضغط ممتاز وتركيز وبيكمل للمرمى.
*هل تؤيد قرار شريف إكرامى بالرحيل عن الأهلى؟
طبعا حقه لازم يلعب ويشارك مع فريق جديد ، محدش يرضى لنفسه الجلوس على الدكة.
*هل تؤيد عودة وليد ازارو للأهلى ؟
أزارو أفضل من بادجى كتير، رغم أن ازارو بيضيع أهداف كتير بس بيسجل ومزعج وكنت ضد رحيله، اللاعب الافريقى اللى يجى ويكون إضافة ميقعدش احتياطي من أول يوم.
*هل سيواصل صالح جمعة الالتزام في الأهلى؟
مكان صالح جمعة في الأهلى ناقص كتير، صالح لازم يفهم منى وهيتقبل منى النصيحة دى لان علاقتى بيه قوية ، طول ما انت بتلعب هيفضل أصدقاء السوء حواليك ومعاك خطوة بخطوة لما تبعد عن الكرة أول ناس هتسيبك هما أصدقاء السوء.
*وماذا عن كهربا؟
لازم يبذل مجهود كبير ومينفعش ترضى بالجلوس على الدكة أنت لاعب منتخب مصر اتعب وابذل مجهود جبار عشان تلعب ومترضاش بربع ساعة وشوط ، صالح جمعة وكهربا ربنا مديهم نعمة حب الناس حتى قبل مايلعبوا ولازم يقدروا دى.
*هل تتوقع نجاح حسام البدرى مع منتخب مصر؟
أتمنى نجاحه بس بقوله صاحب بالين كداب، النجاح مش هيجى صدفة وليه عوامل كثيرة ، هو مدرب كبير بس صاحب بالين كداب شوية مدير فنى وشوية رئيس نادى وشوية محلل وبيضيع وقته بطريقة عبثية، عايز تشتغل في ستين حاجة متسألش على النجاح بقى.
*ماتقييمك لأداء مجلس الأهلى برئاسة الخطيب ؟
أنا معاهم قلباً وقالباً حتى مع أنى لم أنتخبهم سأظل مدافعاً عنهم، عجبنى قراراتهم الأخيرة فيها حزم وقوة حسيت فيها ريحة هيبة الأهلى.
تم أضافة تعليقك سوف يظهر بعد المراجعة