عمرو أديب: "أرقام إصابات كورونا بتقل بس أرجوكم خليكوا بالكمامات"

علق الإعلامي عمرو أديب، على انخفاض نسب الإصابات بفيروس كورونا المستجد في مصر، وقال: "الأرقام بتنزل ودي حاجة مبشرة، بس أرجوكم والنبي البسوا الكمامات، العالم كله متفق على الكمامات وهي السبيل الوحيد عشان نحاصر المرض والوباء، كل علماء العالم أكدت أنه الحاجة الوحيدة اللي تقدر تقلل انتشار الفيروس هو الكمامة، مش بقولكوا نوع معين، لا البسوا أي نوع كمامات، ضروري يا جماعة".

وأضاف الإعلامي عمرو أديب، خلال برنامج "الحكاية" الذي يذاع على قناة mbc مصر: "الدراسات الأجنبية أكدت أن الإنسان يقدر يعدي أي حد قبل ما تظهر عليه أي أعراض، وأن ده اتسبب في نص إصابات العالم تقريبا، وبيسموهم الإصابات الصامتة، عشان كدة بقولكوا وبأكد عليكم على لبس الكمامة والتباعد الاجتماعي وغسيل الإيدين، أصلها مش هتتحل غير بالطريقة دي والله".

وطالب عمرو أديب المواطنين بعدم الانخداع بالانخفاض الملحوظ في نسب إصابات كورونا على مدار الأيام الماضية، مشيرا إلى أن هناك دولا وصلت إلى الحالة صفر ثم انتشر فيها المرض من جديد.