عمرو أديب عن قرارات الحكومة الجديدة المتعلقة بالحظر: "عين العقل وقرارات حكيمة"

علق الإعلامي عمرو أديب على القرارات التي اتخذتها الحكومة المتعلقة بحظر التجوال، وقال: "بعض الناس ظنو أن اليوم ده هيبقى يوم الفتح، إنما بكثير من العقل والحكمة قررت الدولة أنه لسة، وهنا يستمع الاقتصاد والسياسة للعلم، لأن العلم هو أساس القرار، وفي أكثر من 10 ولايات أمريكية كلها فتحت وعندها انتكاسات، الأرقام بتزيد وبعض الولايات في أسبوع زادت 200% في معدل الإصابات".

وأضاف عمرو أديب خلال برنامج "الحكاية" الذي يذاع على قناة mbc مصر: "كل يوم أرقام الإصابات في مصر بتزيد ومبتقلش، وأنا بقولكوا أنها مش مستقرة، وده معناه إن إجمالي عدد المصابين 41 ألف وبحسبة بسيطة من هنا لأخر الشهر ممكن نعدي الـ 60 أو الـ 65 ألف مصاب، ميهمنيش نزيد قد إيه لكن اللي يهمني، إن يكون في مستشفى أو دواء ولا لا، عارف لو بنزيد 100 أو 10 آلاف السؤال هناك هل هتقدر توفر الدواء والمستشفيات للناس ولا لا".

وقال عمرو أديب: "أنا عارف أن في ناس مبتتلحقش وناس تانية مبتعرفش تخش المستشفيات، لكن احنا كنظام صحي عام وخاص وجامعي هل قادرين للتعامل مع الأعداد ولا لا، وده الاختبار الحقيقي، ومن هناك لآخر الشهر هنشوف الأعداد هتوصل لكام، المهم أنا عاوز أعرف إيه أكتر أدوية الناس بتقبل عليها وبتجيبها، ليه مش متوفرة، إيه السر وراء هذا الموضوع، المفروض في ظروف زي دي بيبقى إنتاج الأدوية منتعش، وعندنا الشركات اللي تقدر تنتج الكلام ده".