سلوى عثمان : ردود فعل الجمهور والفنانين على مشهد المواجهة فى "البرنس" أبهرنى وإلهام شاهين ووحيد حامد ونقيب الممثلين كلمونى..ربنا عوضنى وأخدت حقى بعد "سجن النسا" وأتحرمت من الإنجاب وعوضت الأمومة فى بنات أخويا

سلوى عثمان واحدة من الفنانات اللاتى يتمتعن بموهبة استثنائية ربما لم يُسلط عليها الضوء فى كثير من الأحيان، خاصة وأنها قليلة الظهور، ولم تتحدث عن أدوارها فى أحاديث صحفية كثيرة أو إعلامية، لكن بعد عرض الحلقة الـ 9 من مسلسل "البرنس"، من بطولة محمد رمضان، من إنتاج شركة سينرجى، للمؤلف والمخرج محمد سامى، أصبحت سلوى عثمان حديث السوشيال ميديا، خاصة بعد تقديمها واحد من أروع مشاهد الدراما الرمضانية لعام 2020، وليس من أفضل مشاهد المسلسل فحسب، بسبب حالة الانغماس الشديد، التى قدمتها فى شخصية "سميحة".

 

"اليوم السابع"، ألتقى الفنانة القديرة سلوى عثمان فى حوار مصور مع الكاتب الصحفى عمرو صحصاح رئيس قسم الفن باليوم السابع"، وتحدثت "عثمان" عن كواليس تحضيرها لهذا المشهد الصعب، ولشخصية سميحة بشكل عام، وردود الأفعال التى تلقتها من قبل زملائها الفنانين منهم إلهام شاهين وماجد المصرى وهادى الجيار، والسيناريست الكبير وحيد حامد.

وقالت عثمان عن ردود الفعل التى تلقتها : "أنا الحمد لله سعيدة أوى أوى بأن الناس كلها اتفرجت وانسبطت بالمشهد وكل الكلام الحلو اللى أتكتب على فيس بوك حاسة إنه تقدير كبير أوى أوى من الناس وده أجمل تقدير حصلى فى حياتى، والمشهد ده المستر سين بتاعى في المسلسل".

وتابعت، " سعيدة برد فعل زملائي على تهنئتهم ومكالمتهم ليا وده تقدير كبير وحاجة حلوة أوى منهم الفنانة النجمة الجميلة إلهام شاهين وهنأتني على المشهد والنجمة روجينا والنقيب بتاعنا المحترم الجميل اللى دايما واقف جنبنا  في كل حاجة الدكتور أشرف زكى، و ماجد المصرى وهادى الجيار، وأول واحد كلمنى أستاذ وحيد حامد وقالى كلام حلو أوى وجميل عن شغلى في المشهد وده طبعا شهادة تقدير من راجل  مؤلف كبير وكلنا بنحترمه وبنحترم شغله و كل كلمه كتبها في مشواره الفنى.

وتستكمل عثمان حديثها قائلة :" وطبعا كلهم نجوم كبار وكلهم فنانين كبار ومبدعين وكل واحد قدير فى منطقة بيمثل فيها ده أسعدنى أوى، وعفاف رشاد أختى وحبيبتى واللى طالعين مع بعض وعاملنا شغل مع بعض حلو كتير بصراحة ناس كتير أوى كلمتنى مش عاوزة انسى حد وكذلك الفنان صبحى خليل و كل زملائى، وجالى على فيس بوك عند المخرج محمد سامى، هالة صدقى كاتبة عنى كلام حلو أوى، وعن المسلسل أنا سعيدة أوى إنى اشتغلت مع محمد سامى مش بس مخرج  لا مؤلف كمان، لأنه كاتب حوار لازم أي ممثل لما يشتغل يحث الحوار و يقوله حلو".

 

وعن استعدادها للمشهد الأصعب فى مسلسل "البرنس"، وكم مرة تم تصويرها حتى تخرج النسخة الأخيرة بهذا الشكل المبهر؟، ردت الفنانة الكبيرة سلوى عثمان، قائلة:" الحمد الله أتصور من أول مرة لأنه طبعا عشان تعمل مشهد حساس بالشكل ده لو تم إعادته كتير ده مش هيبقى في صالح المشهد ولا الممثل، الحمد الله حاولت أبقى حافظة كويس جدا وجمعت كل أحاسيسى قبل المشهد، وكل الطاقة اللى عندى جمعتها وكل الأحاسيس اللى مريت بها في حياتى من حاجات ضايقتنى وتعبتنى إلى جانب طبعا  شخصية سميحة نفسها، حطيت جوايا شخصية سميحة، لو أنا مكانها كأم وعرفت إنى ولادى يعملوا كده قتلوا أخوهم وابن أخوهم  ومراته و لما فاق ناوين يقتلوه مرة أخرى هو وبنته دى صدمة كبيرة جدا، لكن شخصية "سميحة" متصورتش إن ولادها يكونوا قاتلين مش معقول أقتل واحد ما أنا ممكن أرفع قضية اتخانق ممكن أي حاجة تتعمل في تصور سميحة أو أى أم إلا القتل، ودى صدمة كبيرة أوى".

 

وأضافت عثمان فى حديثها، " في الذاكرة الإنفعالية في ناس تستخدمها وفى ناس لا وفى ناس بتحط نفسها في الموقف فقط وتشوف لو هي في الموقف ده إيه اللى هيحصل في حاجات ممكن تجيب بيها الإحساس، ولكن في نفس الوقت لازم تحط نفسك في الشخص ده و هيعمل إيه؟، وبقعد أركز مع نفسى مش عاوزه أخرج من المود اللى جوايا".

وبسؤالها بعد هذه النجاحات والإشادات هل سلوى عثمان اتظلمت ولم تأخذ حقها  كفنانة تستحق أكثر من ذلك؟، ردت عثمان قائلة:" في الأول اتظلمت مع إنى كنت بشتغل كل حاجة والناس عرفانى كنت موجودة بس مش بنفس القوة اللى ربنا كرمنى بها دلوقتى، الأول مكنتش واخدة حقى اشتغلت في مسلسلات بس ماكنش عليها الضوء، لحد ما جالى مسلسل "سجن النسا"، واتسلط عليه الضوء اشتغلت في عمل متشاف، وربنا كلل تعبى وإحساسى إنى مهدور حقى، الحمد الله كل مسلسل عملته بعمل مستر سين الناس استحسنته، لكن سجن النسا بداية جديدة لشغلهى مع المخرجة الكبيرة كاملة أبو ذكرى و المسلسل كبير ومتشاف، دائما محتاج تشتغل في مسلسل الناس عينها عليه ده بيعمل فرق للفنان".

 

وعن الفنانين الذين بدأوا معها الحياة الفنية، قالت عثمان:" أنا مدخلتش المعهد الجيل بتاعى إلهام شاهين وليلى علوى دول أبرز نجمتين أيام ما أنا طلعت، بس أنا كان ليا سكة تانية التمثيل طبعا هما نجوم كبار، ربنا أداهم سكة النجومية وأنا ممثله ربنا كرمنى دلوقتى أكتر من زمان حتى لو الحاجة جاتلى متأخرة شوية أنا سعيدة بها أوى".

ووجهت الفنانة الكبيرة سلوى عثمان رسالة لجمهورها، قائلة:" بحبكم جدا ودائما بعملكم ألف  حساب، عشان أنا مش عاوزة للحظة أحس إن حبهم ليا يقل ويحسوا في لحظة إن عملت حاجة متعجبهمش بحبهم وحاسة بتقديرهم ليا وسعيدة بهذا التقدير من الجمهور، وهو الفنان إيه غير إن الجمهور يقدره إحنا بنشتغل عشان الناس تنبسط بالشغل اللى بنعمله إما إستفادة إما تسلية بمسلسل كوميدى أو إستفادة بالمعانى فى الحياة أنا سعيدة بيهم أوى أنهم متابعين المسلسل ومتابعينى وسعيدة إنهم سعداء بيا ومقدرنى، التقدير الحلو دة ودائما بتمنى إنهم يشوفونى بعملهم حاجات كويسة وبشكرهم أوى أوى و بقولهم خليكم دايما معايا".

وبسؤالها عن إبداعاتها في تقديم دور الأم، خاصة وأنها لم ينعم الله عليها بالإنجاب، قالت:" الست بطبيعتها ربنا خلقها جواها أمومة ومش شرط الست اللى مخلفتش أو معندهاش أطفال إنها يبقى معندهاش إحساس بالأمومة لا خالص بالعكس ده ممكن تكون بتفرغ الإحساس ده في حد قريب منها، يعنى أنا بالنسبة لى ولاد أخويا بحس إنهم بناتى وعنده ما شاء الله 3 بنات، وهما بالنسبة ليا بناتى وأنا أمهم، فالأمومة مش شرط حد يخلف أو ميخلفش لأن الست بشكل عام خلقها جواها الحنية والأمومة، أنا بطلع كل الإحساس ده في أدوار الأم اللى بعملها بعيش دور الأم في اللحظة دى".

 

وبسؤالها..ولو أولادك زى أولاد حامد البرنس فى المسلسل"، قالت ضاحكة:" كنت هفطسهم هما قاسيين أوى، ولكن على الحقيقة كلهم حنينين وجُمال بس الأدوار هي اللى قاسية ولو زى أولاد حامد فى الحقيقة، هبقى ندمانة إنى خلفت أولاد بالشكل ده ".