ابن من ابناء النادى الاهلى ، لم يجرب حظه خارج اسوار القلعة لحمراء ، ولم يفكر فى يوم من الأيام أن يرتدى تى شيرت اخر بخلاف تى شيرت الفريق الذى تربى بين جدرانه ، انه مودى الجارحى ، الشقيق الأصغر لأحمد الجارحى مدرب فريق السلة بالاهلى ايضا ، حرص اليوم السابع على محاورة اللاعب ، للتعرف على بداياته ، و لماذا لم يفكر فى الاحتراف ، و كذلك رأيه فى الفريق و المنتخب والمقارنة بين السلة و كرة القدم .
مودى
متى بدأت كرة السلة ؟
بدأت كرة السلة وانا فى سن مبكر جدا ، كان عندى 6 سنوات فقط
ولماذا السلة دون غيرها ؟
لأن اختى و اخويا كانوا بيلعبوا باسكت ، وكنت بروح معاهم التمرين والمباريات فأحببت اللعبة .
اسمك الحقيقى ومن اطلق عليك لقب مودى ؟
الاسم الحقيقى محمد ، ووالدتى الله يرحمها هى اللى قالت كانت تنادينى مودى .
طولك كام سم ؟
مش طويل اوى ..هو الطول 184 سم فقط.
خلال التتويج باحد البطولات
اهم البطولات التى حصلت عليها مع الأهلى ؟
انا تاني اكثر لاعب في تاريخ النادي الاهلي حصل علي عدد البطولات بعد طارق الغنام علي مستوي الدرجة الأولي ، فحصلت علي 13 بطولة و طارق الغنام حاصل علي 18 بطولة حصلت علي 5 بطولات دوري المرتبط ، و 5 بطولات كاس مصر ، بالاضافة الى 2 دوري السوبر ، وبطولة أفريقية هذا على مستوى الفريق الاول ، و علي مستوي الناشئين حصلت علي 19 بطولة و دا رقم الحمد الله مفيش حد في تاريخ الناشئين حققه في النادى.
لماذا لم تنتقل الى نادى اخر بخلاف الأهلى ؟
لانى ابن النادي الاهلي و متربي فيه من أول ما اتولدت و مستحيل اتخيل نفسي بلعب في أى نادي تاني غير النادي الأهلي مهما حصل.
هل تلقيت عروض احتراف ؟ وما موقفك منها ؟
لا مفيش لان فى السلة صعب اويً يجي احتراف لأي لاعب الا حالات نادرة بيكون الأغلبية طوال صعب لاعب قصير يجيلوا عقد احتراف لان اي نادي لو عايز يتعاقد بيكون مع لاعبين من امريكا عشان الأمريكان عددهم كتير اويً في العالم .
مفيش موقف من الاحتراف عشان صعب يجي عرض زي ما قولت و انا مبسوط جدا في النادي الاهلي بيتي و نفسي اعتزل في ان شاء الله
أول راتب حصلت عليه من السلة ؟
في مرحلة الناشئين كنت بحصل علي 15 جنيه في الشهر اول مرتب ليا و في مرحلة الدرجة الأولى كان أول عقد ليا 15 الف جنيه.
هل وجود شقيقك فى الاهلى كان له دور فى بقاءك بالقلعة الحمراء ؟
أنا لاعب بالنادي الاهلي منذ أكتر من 24 سنة و في جميع مراحل الناشئين كنت لاعب مؤثر بالفريق و اتصعدت درجة اولي من و أنا عندي 19 سنة و الحمد الله كنت مؤثر من أول ما اتصعدت و كان احمد الجارحي شقيقي يلعب في نادي الجيش و بعد ذلك كان شقيقي مدرب في نادي الجيش و الحمد الله كان ليا دور مؤثر مع الفريق من اول ما اتصعدت و انا و شقيقي لا تربطنا اي علاقة في الملعب نهائيا علاقتنا في إطار مدرب و لاعب ليس اكثر.
رايك فى احتراف البنات فى الفترة الاخيرة بدورى الجامعات؟
احتراف البنات حاجة مشرفة و لكن الأهم الاستمرارية و اتمني عدد المحترفات يزيد بيكون لمصلحة المنتخب
لماذا لا يتأهل منتخب السلة إلى الأولمبياد ؟
كرة السلة لعبة معقدة جدا المنافسة فيها عالية جدا محتاجين إعداد كويس و ماتشات دولية كتير و أن شاء الله هيكون لينا تواجد في الأولمبياد الجاية.
فرحة الفوز باحد البطولات
ما الذى ينقص الباسكت فى مصر لتصبح لعبة شعبية ؟
الباسكت اللعبة الشعبية الثانية في مصر بعد كرة القدم لتواجد أندية شعبية كثيرة مثل الاهلي و الزمالك و الاتحاد السكندري و المنافسة علي جميع البطولات بين اكثر من 5 أندية .
وجهة نظرك ما السن المناسب لاعتزال لاعب السلة؟
السن المناسب لاعتزال لاعب الباسكت لحد ما اللاعب يحس انه مش قادر يفيد فرقته اكتر من كده ، لكن ممكن سن ٣٨ سنة يكون مناسب و ممكن اكتر علي حسب حالة اللاعب البدنية.
هل عودة اسماعيل احمد للاتحاد السكندرى ستفيد الفريق؟
اسماعيل احمد أسطورة من أساطير الباسكت في مصر طبعان و اضافة لأي فريق.
ما طموحك فى الأهلى فى المستقبل ؟
طموحي ان شاء الله في المستقبل مع النادي الاهلي هو ان اخدم النادي في اي منصب اكون فيه و طموحي الشخصي ان اكون عضو مجلس إدارة في النادي الاهلي
رواتب السلة مظلومة مقارنة بكرة القدم؟
اكيد رواتب العاب الصالات مظلومة مقارنة بكرة القدم، لكن كرة القدم اللعبة الشعبية الأولي في العالم و لها حقوق رعايا و بتجيب دخل للنادي
ليه سلة الاهلى ملهاش تاريخ كبير فى السلة ؟
.النادي الاهلي له تاريخ كبير في كرة السلة و لكن صعوبة المنافسة بتخلي مفيش فريق يقدر يحتكر البطولات بعكس الألعاب التانية و تاريخ النادي الاهلي 10 كاس مصر و 5 دوري مرتبط و 3 بطولات افريقيا و 5 دوري السوبر، اه طبعان احنا متعودين ان النادي الاهلي يكون رقم واحد و ان شاء الله في المستقبل هيكون رقم 1 .
يرفع درع الدورى
هل ليك علاقة بلاعبى كرة القدم فى الاهلى ؟
طبعا ليا اصحاب كتير اوي من لعيبة كرة القدم في النادي الاهلي مش عاوز اقول اسماء حتى لا انسى احد ، وعامة لاعبين الكرة في منهم أصدقائنا كتير اويً و بنتعامل داخل النادي كأسرة و اخوات
بحب اخرج اروح السينما و اكل في مطاعم معينة انا بحبها و مش بحب الزحمة.
وما اعلى راتب سلة فى مصر ؟
أعلي راتب لاعب سلة في مصر مليون و 800 الف جنيه صافية الضرائب.
هل السلة مظلومة مع كرة القدم؟
اكيد كرة السلة مظلومة مقارنة بكرة القدم ، وأتمني في المستقبل يكون في اهتمام بألعاب الصالات اكتر من كده.
رأيك فى محمد صلاح وما وصل اليه ؟
محمد صلاح قدوة لأي رياضي و مثال نفتخر بي و وجهة مشرفة لمصر و العرب و افريقيا.
هل هناك لاعب سلة وصل الى ما وصل اليه صلاح ؟
صعب اي لاعب كرة سلة يوصل لما وصل اليه محمد صلاح لان الاحتراف في كرة السلة معقد و اتمني في المستقبل نشوف حد في كرة السلة يحترف في احد الأندية الأوروبية الكبيرة و مصر بها لاعب كرة سلة محترف في NBA اسمه عبد الله نادر وهو وجهة مشرفة لمصر و نتمني يلعب مع منتخب مصر في القريب في العاجل
رسالة توجهها لصلاح ؟
رسالتي لمحمد صلاح ان يحاول يحافظ علي المستوي الكبير الذى ظهر به و يستمر فى ان يكون وجهة مشرفة لمصر لأطول فترة ممكنة و ان شاء الله ربنا يكرمه و يحقق بطولات و إنجازات اكتر مما حقق .
تم أضافة تعليقك سوف يظهر بعد المراجعة