عمرو أديب تعليقا على ضبط مسئول أقام صلاة الجمعة اليوم: هما دول السفهاء منا

أعلن الإعلامى عمرو أديب، خلال برنامج "الحكاية"، أن وزارة الداخلية ألقت القبض على المسئول عن إقامة صلاة الجمعة في أحد مساجد حدائق أكتوبر بمحافظة الجيزة، وعلق على ذلك قائلاً: "هما دول السفهاء منا وهما دول اللى هيضيعونا، بطالب الدولة أنها متتأخرش لحظة فى التعامل بيد من حديد مع الناس دى لأنهم هيودونا فى ستين داهية كلنا، ألف واحد ممكن ينشروا الفيروس فى ملايين الناس".

وأضاف عمرو أديب: "مفيش حد منا يتمنى أننا نوصل لمرحلة أننا نقتل الناس القريبة مننا، يعنى مثلا حضرتك تروح تتعدي وأنت فاتح صدرك عشان أنت شاب وتقدر تستحمل، لكن والدتك مش هتقدر تستحمل المرض ده، يبقى أنت كدة هتقتل أمك، تخيل أنت هتعمل إيه، تخيل الجريمة اللي أنت هترتكبها، تخيل حجم الكارثة اللي هتعملها، مفيش مخلوق يقدر يستحمل حاجة زى دى، أرجوكم خدوا بالكم".

وأكد الإعلامى عمرو أديب، أن الوضع فى الولايات المتحدة الأمريكية مأسوى، وأتمنى ألا نصل إلى تلك المرحلة الصعبة، وقال: "الناس في أمريكا بدأوا يصنعوا 100 ألف كيس للموتى، عاملين حسابهم على أن فى عشرات الآلاف هيموتوا، الناس دلوقتى هناك بتشيل الموتى بالجرارات، يارب ما نوصل للمرحلة دى نهائيا".