حذر المخرج رامى إمام، من صفحة مزيفة على موقع التواصل الاجتماعى "فيس بوك"، تنتحل شخصيته، فيما يبتز القائمون عليها المتابعين ويطلبون منهم أموال ومطالب غير أخلاقية مقابل توفير فرص تمثيل وهمية، حيث يدعى الشخص الذى يدير الصفحة أنه رامى إمام، وأنه يستعد لإخراج فيلم ويحتاج لوجوه جديدة.
وظهر رامى إمام، فى مقطع فيديو للتحذير من هذه الصفحة الزائقة، وقال "مساء الفل على حضراتكم يارب كلكم تكونو بألف خير وصحة وسعادة.. الـ"fake account page" اللى هى باسمى يا جماعة على "فيس بوك".. أنا بشكر كل الناس اللى بقالهم فترة بيبعتولى رسائل بيستفسروا فيها وبيسألونى إذا كانت دى صفحتى ولا لاء"، وأضاف "وبشكر كل الناس من حضراتكم اللى قالولى احنا أكيد عارفين إنها مش صفحتك لأن احنا عارفينك كويس وشكرًا جزيلًا يا جماعة على الثقة الغالية دى".
وأضاف رامى إمام "بالفعل هى مش صفحتى خالص دى صفحة "fake" بس المرة دى الموضوع مختلف تمامًا، لأن الشخص اللى عامل الصفحة دى تعدى كل حدود الأخلاق والأدب فى أى وقت وأى زمان وأى مكان.. الشخص دا بيقول إن هو أو أنا يعنى بعمل فيلم جديد فطالب وجوه جديدة وأكيد فى جزء كبير جدًا من الناس اللى بيحبوا يمثلوا هيخشوا على الصفحة دى علشان خاطر يتفاعلوا مع هذا الشخص وبيطلب منهم فلوس قصاد إن هما يمثلوا إلى جانب إنه بيطلب حاجات لا يمكن ولا تليق أبدًا إن هى تتطلب من أى حد بالذات السيدات المحترمات اللى بيخشوا".
وتابع "أنا بقول يا جماعة الصفحة دى مش بتاعتى نهائيًا خالص، وبقول للشخص اللى عامل الصفحة دى وأى شخص تانى هيعمل أى صفحة مستقبلية أنا بإذن الله هقفل الصفحة دى وغير كده أنا هبدأ أخد اجراءات قانونية الفترة اللى جاية علشان الموضوع يبقى أكبر بكتير من مجرد قفلت صفحة ويبقى فى مسائلة قانونية لأى شخص يحاول إن هو يعمل صفحة غير بتاعتى".
وأوضح "صفحاتى على الفيس بوك يا جماعة هما صفحتين بالظبط.. الصفحة الشخصية بتاعتى والصفحة التانى عليها تيكت زرقة فواضح إنها الصفحة الرسمية بتاعتى.. مش بس كده أنا حابب أشكر كل متابعى الصفحات المحترمين جدًا اللى موجودين عندى على إنستجرام كلكم محترمين وهكذا يجب أن تكون صفحات الفانز المحترمة شكرًا جزيلًا لأدبكم واحترامكم واحترامكم لأداب نشر الصور وأنا بقول لحضراتكم انتوا على راسى من فوق شكرًا جزيلًا ليكم وأنا بحترمكم جدًا.. مسائكم زى الفل".
تم أضافة تعليقك سوف يظهر بعد المراجعة