قرر رجل الأعمال أحمد أبو هشيمة المشاركة في الحياة السياسية، وأعلن في فيديو انضمامه إلى حزب الشعب الجمهوري، معربا عن أمله في المساهمة الفعالة من خلال خلق كيان حزبي يتحمل المسؤولية ويجمع الشباب والأصوات الوطنية والمعارضة .
ودعا أبو هشيمة الشباب للانضمام إلى الحزب بعد دراسة أهدافه وسياساته ورؤيته للمستقبل.، محذرا في الوقت ذاته من استمرار الصوت الواحد والحزب الواحد وأن هذا الوضع يساعد الجماعات المتطرفة في غسل مخ كثير من المواطنين، مشيرا إلى أن قرار الانضمام إلى الحياة السياسية جاء بعد استقرار الأوضاع ورفض الشعب لنموذج رجل الأعمال المشتغل بالسياسة إبان الثورة.
وقال رجل الأعمال خلال الفيديو : "الفترة اللى فاتت شغلنا آلاف الشباب وساهمنا على قد ما نقدر في التنمية المجتمعية ..وعملت مسابقة للمشروعات الناشئة أنا فعلا عملت أقصى ما عندى ولسه بتيجيلي آلاف الطلبات للتوظيف والمشروعات المختلفة، بس أنا مقدرش أعمل ده لوحدى ولازم تكونوا معايا..حاجة كمان إحنا كل شوية بنقول للشباب شاركوا وخلكيوا إيجابيين وخافوا على البلد وإحنا نفسنا واقفين بنتفرج عليهم ومحدش فينا قرر ياخد الخطوة اللى تشجعهم هما كمان على المشاركة وعلشان كده قررت أشارك في الحياة السياسية".
وأضاف رجل الأعمال :"أنا عارف بعد الثورة قلت مش هتشغل في السياسة لأن ببساطة كانت وقتها الأمور مش مستقرة والشعب مكنش راضى عن نموذج رجل الأعمال اللى بيشغل في السياسة ، بس أنا كمان قلت وقتها إن معرفش المستقبل مخبى إيه؟، وكنت مراهن على مستقبل مصر واستقرار الأوضاع وأنا كسبت الرهان ، وشغلنا مصانعنا الخمسة بعد الثورة وعملنا مصانع حديد وأسمنت هي فخر للصناعة المصرية في 5 محافظات ووظفنا آلاف العاملين ولسه بنوظف .
وتابع أبو هشيمة قائلا: أنا شايف دلوقتى إن الأمور مستقرة وبتتقدم بس محتاجة مشاركة كل حد فينا لأن البلد دلوقتى مبقتش محتاجة للحزب الواحد والصوت الواحد البلد دلوقتى محتاجة تعددية ومنافسة شريفة في كل حاجة وأولها المنافسة الشريفة في الحياة الحزبية لأن المنافسة الشريفة هي اللى بتخلى كل حد فينا يطلع أحسن ما عنده ، وفى النهاية هتبقى مصر هي المستفيدة الأولى علشان كده أنا اخترت انضم لحزب الشعب الجمهوري ".
وعن أسباب اختيار حزب الشعب الجمهوري، قال:" ليه اخترت الحزب ده، علشان أسباب كتيرة هقولكم بعضها أول حاجة أهداف الحزب بتتفق مع رؤيتى بشكل كبير جدا بالذات مع موضوع الشباب والخدمة المجتمعية اللى الحزب بيعتبرها أولية أولى عنده، حاجة كمان الحزب رغم عمره القصير منذ 2012 بيضم كوادر سياسية محترمة ومخضرمة زى المهندس حازم عمر رئيس الحزب والدكتور صفى الدين خربوش أمين عام الحزب ، الحزب كمان مهتم بالرأسمالية المجتمعية ودى أنا بنادى عليها من زمان ، والنقطة الأهم بالنسبة ليا هي الشباب ومتأكد إن هما هيرسموا ويخططوا لمستقبل بلدهم".
ودعا رجل الأعمال الشباب للانضمام للحزب ، متابعا: "أحب أقول لكل الشباب اللى بيتابعونى واللى كنت بقابلهم في المناسبات المختلفة وفى زياراتى للمحافظات وكانوا دايما بيقولولى أفكار رائعة في كل المجالات أنا مستنيكم تنضموا معايا لحزب الشعب الجمهوري، مش بغصبكم على حاجة شوفوا الأول أهداف الحزب وسياساته ورؤيته للمستقبل وبعدين قرروا".
وحذر من حياة الصوت الواحد والحزب الواحد قائلا: " إحنا مع بعض نقدر نخلق حياة سياسية حقيقية وبلاش المرة دى نضيع الفرصة لان مش في مصلحة حد في البلد ان نرجع لحياة الصوت الواحد والحزب الواحد و ده كله كان بيساعد الجماعات المتطرفة انها تعمل غسيل مخ لناس كتير وسطنا املى كبير ان مساهمتي تخلق كيان حزبي يشيل المسؤولية ويجمع كل الشباب والاصوات الوطنية وحتى لو معارضة المهم ان كلنا ميبقاش قدامنا غير هدف واحد بس هو "مستقبل بلدنا".
وفى نهاية كلمته قال: " أنا مستنيكم تمضوا استمارات الحزب وعارف إن بعد الفيديو ده هيبقى فيه أسئلة كتير جدا وبوعدكم إن هيكون فيه فيديوهات أجاوب فيها على كل الأسئلة".
تم أضافة تعليقك سوف يظهر بعد المراجعة