المنتج هانى محروس لتليفزيون اليوم السابع: نجوم كتير صوتهم وحش و"متأيف" بالأجهزة

قال المنتج هانى محروس، إن سوق الغناء أصبح أصعب فى الوقت الحالى عن الماضى بسبب التطور التكنولوجى، مضيفا: "الناس دلوقت مش عايزة تشوف أى حاجة وخلاص لكن لازم تكون مواكب للتطورات وتخلق جديد".

وأضاف خلال لقاء مع "تليفزيون اليوم السابع"، مع الزميل تامر إسماعيل: "زمان المنتج كان بيكسب فى وقت قصير، دلوقت بقى بيكسب فى وقت طويل، لكن أنا بلاقى نفسى لما بنجح مع الوجوه الجديدة، رغم إنى بشتغل مع 70% من نجوم العالم العربى، وأفرح جدا لما يتولد نجم على إيدى".

وحول أكتر مطرب فرح بنجاحه قال: "مصطفى حجاج هو أكثر شخص بسطنى عشان أكتر حد اشتغلت عليه، هو مكمل معايا طبعا وأنا بعتبره أخويا الصغير".

وعن تأثير التكنولوجيا والمؤثرات فى الصوت، قال: "أحنا وصلنا لكل حاجة فى التكنولوجيا لدرجة إن ممكن حد يبقى صوته وحش ويطلع حلو، وفيه ناس مش بتعرف تغنى وبالهندسة والتكنولوجيا بتغنى ويطلعوا تريند كمان، وهما أصلا صوتهم متأيف، فممكن تأيف الصوت عادى، لكن أنا مش بتاع كده، لأنى بعرف الصوت إذا كان متأيف ولا لاء".