كشف الفنان صلاح عبد الله عن ذكرياته فى تعلم قيادة السيارة على هامش حضوره مهرجان الإسكندرية السينمائي الدولى، قائلا: "مصر كلها اشتركت إنها تعلمني السواقة وفشلت، وفى الآخر روحت مدرسة، وكنت عارف إنى مش بسوق كويس وعندي يقين إنى مش هبقي سواق كويس، ومع ذلك عمرى ما عملت حادثة خطر، وكنت دايما أنا اللى بتخبط ويبقى الغلط منى، بس أنا اللى عربيتي بتتأذى وبدفع تمن عبطي في السواقة، وكانت مشكلتى في الركنة، يا سااااتر لا وكنت محنتف أوى وببقى عايز أركنها صح، والعربية فيها سينسور لما ربنا كرم، والعربية من قدام ومن ورا فيها سينسور لكن من الجنب مفيش، وبفضل متابع السينسور لحد ما ألاقى الجنب اتحك وهيا لسه جديدة يعنى حبكت الصقها في الرصيف".
وكشف الفنان صلاح عبد الله فى تصريحات لتليفزيون اليوم السابع، تفاصيل محاولة المنتج والمخرج وائل عبد الله لتعليمه قيادة السيارة على سيارته المرسيدس، قائلا: "وأنا سايق قولتله ينفع أولع سيجارة قالي ممكن وسيبت الدريكسيون وروحت أولع السيجارة قالى إيه ده".
وحول غنائه للزمالك أثناء ندوة بمهرجان الإسكندرية، قال الفنان صلاح عبد الله: "أنا اتكسفت من نفسى إنى عملت كدة، بس هيا كانت حالة للفرفشة، وأنا زملكاوي أبا عن جد، الأسرة كلها زملكاوية وبينى بين الزمالك حالة عشق بس عمرى ما اتريقت على أصحابي الأهلاوية، وضد التعصب والتجاوز من طرف على آخر، الكرة روح وجمال وأخلاق ومتعة لازم نكون مهذبين، نتريق على بعض بس بدون تجريح".
وقال صلاح عبد الله: "أنا واضح وصريح بشجع الزمالك ولو الأهلى بيلاعب فرقة غير مصرية بشجعه جد مش ادعاء"، وتابع قائلا: "في ناس رافضين يصدقونى علشان هما مش كدة، وعشان لما الزمالك بيلاعب فرقة أجنبية بيتمنوا إن الزمالك يتغلب".
تم أضافة تعليقك سوف يظهر بعد المراجعة