فيديو وصور.. قعدة الخزانة ولا جوازة الندامة.. رضا جاهدت على ابنتيها 20 عاما بعد وفاة والديهما.. تزوجها مستريح الجمالية وضرتها تكشف حقيقته.. ملكة التضحية تنضم لضحايا الصائغ العشرة بالنصب عليها فى 350 ألف جنيه

رضا سعد الدين 39 سنة من الجمالية القاهرة، عاملة خدمات فى شركة ينطبق على حالتها المثل القائل " قعدة الخزانة ولا جوازة الندامة" حيث إنها عزفت عن الزواج لمدة تقارب الـ20 عاما بعد وفاة زوجها وعكفت على تربية ابنتيها حتى التحقا بالجامعة، تجاهد عليهما إلى أن تزوجها صائغ تعرفت عليه بمنطقة الصاغة، فقلب حياتها رأسا على عقب.

 

وتابعت: اشترى ذهب وبدأ يشتغل ويعمل صفحات على الإنترنت ويسوق لشغله، وبعد شهرين جواز اتصلت بيا واحدة وقعدت تشتمنى وقالتلى إنها مراته، وإنه نصاب وضحك عليا وأخد فلوسى، وواجهته باللى حصل وأنكر كنت حامل فى شهرين، وبعد كده رجع اعترفلى انه متجوز واحدة تانية وانه هو حر، فطلبت منه الطلاق وفلوسى، قاللى عاوزة تطلقى اتنازلى عن كل حاجة وفلوسك موجودة معايا فى العربية.

 

وأكملت: رحنا عند المأزون وقاللى إن فلوسى فى العربية هتاخدى الفلوس وإنتى ماشية، بعد ما نزلنا من عند المأزون جرى بالعربية، فضلت للشهر الخامس ما كنتش قولتى لحد من أهلى كنت خايفة على ماما علشان عندها القلب، وبعدين قولتلهم لما زهقت، وراحت ماما واخواتى ومضوه على إيصالات أمانة بالفلوس اللى ليا، وقال إنه هيدفع بعد 6 أشهر.

 

واستطردت: ودخلت المستشفى علشان أولد ووضعت توأم ولكنه كان رافض يكتب الأولاد باسمه، وبعد كده وافق، وأجل دفع الفلوس شهر كمان، ولما وصلنا للميعاد أخويا اتصل بيه علشان الفلوس أجل 15 يوم تانى، ولما راحله أخويا فى الميعاد قالوله إنه نصب على ناس كتير فى الصاغة فى 7 ملايين جنيه وهرب، ومحدش يعرف عنه حاجة، ورحنا القسم واتقابلنا مع الضحايا، ورئيس المباحث فى قسم الجمالية جاب أخوه، وأخوه قال خدوا 90 ألف واتنازلوا، وطبعا رفضنا ورفعنا قضية بإيصالات الأمانة والقضية بقالها سنتين فى المحاكم.

 

واستكملت: وبعد فترة لقيت رقم بيبعتلى شتيمة على الواتس وفيديوهات لواحدة أساسا مش شبهى خالص بتبيع ذهب عيار أقل من 18 على انه 18 و24 وأنا فى الوقت ده رجلى كانت مكسورة ومش بخرج خالص، وقعد يهددنى ويقولى إن الناس بتدور عليكى علشان بتبيعى ذهب، وشريكه جه معايا وروحنا القسم علشان يحمينى منه، ووقف جنبى الله يكرمه، لكن طليقى الله لا يوفقه كان خلى ناس تتهمنى وحولونا على قسم الهرم وقسم الهرم حولنا لقسم الطالبية، وقسم الطالبية حجزنا وبيت فى الحجز وروحت النيابة وخرجت من النيابة.

 

وأكدت: أنا كل اللى أنا عاوزاه انى أعيش فى أمان وحقى وحق أطفالى وبناتى يرجعلى، عاوزة ادفع الفلوس اللى عليا، مش عاوزة اتبهدل أو ادخل السجن، الناس بتطالب بالفلوس بتاعة الجمعيات والقرض مش هيرحم.