بعد أزمة التعليقات غير اللائقة.. أحمد إبراهيم: كفاية متاجرة باولادى وأمهم

سيطرت حالة من الغضب على الموزع الموسيقى أحمد إبراهيم، زوج النجمة أنغام، بعد تعليقات البعض الساخرة بعد ظهوره فى إحدى البرامج مع نيشان فى أول ظهور له مع زوجته.

أحمد قال فى منشور خاص على صفحته على فيس بوك: "أنا بعرف أتجاهل على فكرة وكنت سكت طول الفترة الأخيرة ورفضت ألف برنامج للرد على تجاوزات فى حقى وحق زوجتى التانية أو اتهامات كاذبة فى حق زوجتى الأولى منسوبة ليا، واتهامات من ناس سفلة عاملين (حبايب وقرايب) وناس بتهاجم معندهاش تفاصيل.

وأضاف أحمد: "وسكت لأنى كبير واعرف أدير بيوتى إزاى ومش من هواة الرد و١٧ سنة شغل لا جريت على مادة ولا شهرة لإنى شبعان ولإنى بتقى الله وباستخيره فى تصرفاتى وباخد قراراتى بنفسى، واللى عارفنى عارف مين أحمد إبراهيم.. اللى فى الصورة معايا دى مراتى وحطانى فى دماغها وبترضينى قبل ما تبقى نجمة وأهم مطربات مصر والوطن العربى.. محدش بيجبر حد على حاجة، واللى فى الصورة معايا لا خدتنى من بيتى وولادى ولا خربت بيت حد ولا ألف غيرها يعرفوا.. أنا ولادى فى حضنى وهما وأمهم (بنت الأصول) لسه فى رقبتى وعايشين فى خيرى ومن عرقى ومحدش اشتكى عشان حضرتك واللى زيك يشحت بيهم، ولادى زى الفل ومعايا، ومامتهم فوق دماغى وشايلة لسه اسمى ووش الخير عليا، وسواء كملنا أو انفصلنا هتفضل أم ولادى وكله نصيب ثم ومش هفية عشان حد يدافع عنها".

وأكمل الموزع الموسيقى: "اللى قدامك وبتقول عليه قد ابنها ده عنده ٣٦ سنة ومخلف ولدين واحد فيهم ٨ سنين ومتجوز ٢ وفاتح بيتين، واتمرمط واشتغل ألف شغلانة وهو صغير وبيساعد فى فتح بيوت كتير بفضل ربنا من صغره، وفرق السن يا جاهل اللى بينى وبين مراتى ١١ سنة، يعنى أقل ٤ سنين من الفرق اللى بين السيدة خديجة والنبى صلى الله عليه وسلم".

وقال أحمد إبراهيم: "اللى فى الصورة ده واخد جوايز ومتكرم كأحسن موزع فى مصر والوطن العربى آخر 17 سنة، أهم بصمات ونجاحات ناس أكبر منه فى السن ماحققوش ربعا وبفضل الله أعلى سعر موزع موسيقى حاليا مع اتنين تلاتة كمان من جيله على مستوى الوطن العربى.. اللى بتهاجمه ده عشان تضحك انت واللى شبهك عمل أغنيه اسمها على بالى لشيرين من يجى ١٥ سنه وهو بيدرس وبيشتغل شغلنتين ويصرف على نفسه كسرت الوطن العربى، وله بصمة فى تاريخ نجوم الوطن العربى.. وإذا كانت السخرية من خصوصيات الناس موضة فامحدش هيضحك غيرك انت واللى شبهك اللى معندهمش أصل ولا شافوا خير".

وأضاف أحمد إبراهيم: "وبالمناسبة أنا مش مضطر اطلع أدافع أو أبرر واتكلم فى أسرار بيتى، وأرد على اتهامات عشان آخد بونت على حساب أم ولادى وأفضح بيتى وأرضى واحد زيك، أنا ولادى فى حضنى وامهم لسه فى رقبتى وفوق دماغى ومحدش أخدنى من بيتى وولادى، ولا حد يعرف يعملها انا اتجوزت على سنة ورسوله وراضيت ربنا.. كفاية متاجرة بولادى وأمهم ونواح وعياط بحياتنا الشخصية محدش طلب تدخلكم فى أمور بيتى، ولا حد يعرف أسرار البيوت.. أولادى أو أى واحدة من زوجاتى الاتنين عايشين من عرقى أنا، وقادر أتجوز كمان اتنين لو عاوز الحمد لله.. ومن هنا ورايح اللى هيوصلى إنه غلط فيا أو جاب سيرة أى واحدة من اللى فى رقبتى أو تاجر وشحت بحكايتها أنا همسح به الأرض ومش هكتفى بالقضاء".

واختتم أحمد إبراهيم: "وأخيرا من حق أى واحدة من زوجاتى رفض الوضع وهو حقها، وهعمل اللى يرضيها وفوق دماغى لأن كرامة أى واحدة منهم من كرامتى، وبعتذر لأهلى وقرايبى وحبايبى وحتى نسايبى عن أى تجاوز فى حقى وحق بيتى أضرهم بسبب التضليل والحشرية".

يذكر أن الموزع أحمد إبراهيم له العديد من النجاحات الفنية مع النجوم مثل شيرين عبد الوهاب التى تعاون معها فى: "على بالى"، و"أنت آخر واحد"، و"ماتحاسبنيش"، و"خليتنى أخاف"، و"كلى ملكك"، و"متاخدة من الأيام"، و"المراية"، و"مشاعر"، وتعاون مع إليسا فى "عكس اللى شايفنها"، و"يا عالم"، و"إنسانة بريئة" كما تعاون أحمد إبراهيم مع تامر حسنى فى "180 درجة"، و"حاسس بخوف"، و"أيام زمان"، و"بغير عليها"، ومع محمد حماقى فى: "حاجة مستخبية"، و"ذكرياتك ميح"، ومع رامى جمال بـ"أوعدينى"، و"أتفضل أمشى"، و"ماتنسيش"، و"ضعفت"، و"إزاى هنرجع"، و"ربنا يخليك ليا" واشتغل مع اليسا فى حاجات كتير وكذلك مع نانسىى عجرم.