يا كلّ أمّ ولادها في عنيها
يا كل روح متطمّنين بيها
اِنتي الونس والأهل والصُّحبه
وانتي البيوت الطيّبه الرحبه
وانتي اللي باشبع نوم على إيديها
.........................
الأمّ حضن ضلوعي والمأوى
هي اللي بيها باقوم وباستقوى
باتعب وضحكة وشّها رقوه
والكلمه منها بتتبدر تقوى
تطرح جناين من معانيها
.........................
قلبك بيحميني ف ليالي البرد
لمسة إيديكي مكان ما تنزل ورد
عايش معاكي الدنيا طول أو عرض
بافرح وفرحة قلبي سُنّه وفرض
أنا بيكي طاير يا امّه فوق الأرض
يا رب صونها عشاني واحميها
.........................
يا امّه وحياتي كلّها "أَمّه"
يا ريّسه وكل الأُمم أُمّه
إيدك تطبطب تنكشف غُمّه
تنزاح عن القلب الهزيل حُمّى
تفلت سفاين من موانيها
.........................
أنا طفل مهما يزوّدوا ف سنّي
تايه بتهرب خطوتي منّي
تهديني وتشيلي التعب عنّي
لو تحضنيني الدنيا بتغنّي
بمحبّتك لابس ومستني
أيامي بالدعوات تِحنّيها
.........................
"أمّي ومن غيرك بأكون أمّي"
شباك دعا موصّل على دمّي
الريح تبعتر فيّا وتلمّي
وتطمنيني وتسهري تسمّي
وتممي وتِّمّي وتهمّي
علشان دموع قلبك تَحَلّيها
.........................
الأمّ معنى الرزق والتساهيل
شمس المشارق في الزمان الليل
ودليلي لو غاب عن عنيّا دليل
صوتي وطريقي وهدمتي والنيل
وانا كُلّي لو كُلّي غنا ومواويل
شارع مفرّع من حواريها
.........................
أمي باحبّك زينة الأصحاب
سرّي وحبيبتي ولمّة الأحباب
وبتوحشيني كتير في أي غياب
عنوان لروحي وروحي عامله كتاب
باستنظرك طول النهار ع الباب
فاتح ضلوعي عشان تضمّيها
.........................
أمّي ومن غيرك باكون مجهول
يا واصله قلبي بقلبك الموصول
عايش معاكي الدنيا عرض وطول
وباقول في حبّك برضه وارجع أقول
يا قلب نهر يا فاكهة المحصول
طرحت ضفايرك توت حواليها
.........................
طرحت ضفايرك م الكلام عناقيد
يا أمّ العيون وقت الضلام بتقيد
يا نخله نور ماسك في إيده جريد
باكتب عشانك أسئله واناشيد
وارسم أغاني وناس وفرحه وعيد
طرحت ضفايرك يا امّه حلِّيها
.........................
الطَّرْح خير والأمهات أرزاق
تبعد واحنّ واخاف واتوه واشتاق
لو لحظه غابت باوصف الأشواق
تطلع قصايد أو وجع حرّاق
تطلع ألم في القلب أو ترياق
كلّ القصايد طَرْح خطاويها
.........................
الأمّ هيّ الفرحه وقت الضيق
هي الصديق والمعنى والصّدّيق
لو كنت واحد.. أمّي جيش وفريق
أختي في وجيعتي وف المناهده شقيق
وان تهت ألاقي عيونها ريق وطريق
الجنّه منها وتحت رجليها
.........................
تم أضافة تعليقك سوف يظهر بعد المراجعة