"اليوم السابع" يحتفل بنجاح "ملطشة القلوب".. مصطفى شوقى: حققت حلمى مع صانع النجوم بعد 17 سنة كفاح فى الوسط واللى يواجه إحباط يبصلى.. ونصر محروس: نجاح الأغنية فاق توقعاتى وأنا زى النحلة أى حاجة فيها رحيق بروحلها

احتفلت "اليوم السابع"، بنجاح أغنية "ملطشة القلوب"، للملحن والمطرب مصطفى شوقى، أحد اكتشافات المنتج الغنائى الكبير وصانع النجوم نصر محروس، وذلك من خلال ندوة فنية تحدث فيها الاثنان عن الأغنية وكواليس التحضير لها، وكيف بدأ المشروع بينهما، كما تطرق كل منهما لرأيه فى الساحة الغنائية الآن، والعديد من القضايا الموسيقية.

كان فى استقبال "شوقى ومحروس" الكاتب الصحفى خالد صلاح رئيس مجلسى تحرير وإدارة اليوم السابع، والصحفى وائل السمرى رئيس قسم الثقافة رئيس التحرير التنفيذى للأقسام المتخصصة، والصحفى عمرو صحصاح رئيس قسم الفن رئيس تحرير موقع عين المشاهير.

وفى ندوة اليوم السابع، أعرب المنتج الغنائى الكبير نصر محروس، عن سعادته البالغة بالنجاح الكبير الذى حققته أغنية "ملطشة القلوب"، موضحا أن نجاح الأغنية فاق توقعاته بكثير. 

وعن كواليس الأغنية وبداية التحضير لها والظروف التى أحاطت بها، قال محروس :"الأغنية زى المولود وهو فى بطنه أمه ماتعرفش تحدد هيطلع إيه فى حياته وعامل إزاى، غير بعد ما يتولد ويعيش، إحنا بنجتهد، أنا بالسنبة لى عامل زى النحلة أى حاجة فيها رحيق هروح أخده عندى بقى، عند غيرى، ماليش دعوة، ليا دعوة بالأغنية الحلوة اللى الشارع هيحبها.

وأضاف محروس خلال حديثه: مصطفى شوقى جالى ومقدر وعارف أنا بعمل إيه، وهو جايلى عشان أوجهه ده شغلى، زى ماهو شغله طريقه غناه ومظهره وطريقته، كل ده لازم نتفق عليه، وهو سمع كلامى فى النقطة دى، والحمد لله نجحنا سوا.

وعن مدى توقعه لنجاح الأغنية من عدمه، قال المنتج الغنائى نصر محروس، كنت بتمنى النجاح ده من ربنا سبحانه وتعالى لكن ماكنتش شايف.. عارف لما تكون عارف أن حاجة هتخضك ولما تيجيلك تتخض برضه رغم إنك عارف، هو ده اللى حصل مع أغنية "ملطشة القلوب"، لأنى كنت شايفة أغنية غريبة أوى ومختلفة، الاستايل بتاعها مختلف، أنا نزلتها أول أغنية فى فرى ميكس، عشان أقول يا جماعة فرى ميكس برضه مختلف زى ماكان بيزل من 14 سنة وبيقدم ناس جديدة وبيقدم أغنية زى "بابا أوبح"، عايز أقولهم أن "فرى ميكس" نازله برضه بشكل مختلف، ولذلك حرصت على الدفع بـ مصطفى شوقى، أنا عامل حاجة مختلفة كنت عارف أن الناس مش هتكرهه، لكن هتحب إزاى والحجم أد إيه ماكنتش عارف، لكن اللى حصل سبحان الله ربنا ليه كلمة تانية.

والنجاح دايما بيكون بعد تانى شهر أو تالت شهر، لكن مع الأغنية دى حسيت بشىء تانى خالص من أول يوم طرحها، وصوت مصطفى حلو الناس حبيته أوى، الناس ممكن متشوقة إنها تسمع حاجة تانية لمصطفى، ودى بيحصل قريب أوى، ومصطفى مشروع مطرب قوى، وهو مش فكرة ألبوم أو سينجل، هو محتاج مجموعة أغانى سينجل بحيث لما نقدمه لايف وحفلات.

من جانبه قال المطرب مصطفى شوقى خلال الندوة : الحمد لله سعيد جدا بهذا النجاح الذى حققته أغنية "ملطشة القلوب"، وإن قدرت أقدم حاجة مع منتج شاطر وصانع نجوم مثل نصر محروس.

واستكمل حديثه قائلا : بداية حياتى فى القاهرة كانت فى سن الـ18، لأننى ولدت فى الكويت وعشت هناك إلى هذا السن، لطبيعة شغل والدى ووالدتى، ومن خلال دراستى هناك الشوام والكويتيين اللى كانوا معايا فى المدرسة خلونى أسمع أغانيهم وده عمل عندى رصيد فى الثقافات الموسيقية، وعندما أتيت إلى مصر، عملت ملحن لعدد كبير من الأغانى ربما لم أحصد نجاحها مثل مطربينها، المهم أعود لأغنية "ملطشة القلوب"، بدأت أركز فى الغناء، وسمعت الأغنية دى، كانت خارج سكتى وإطارى أنا شخصيا عشان كدة لفتت نظرى جدا، ولو كانت جاءت لى كملحن ألحنها ماكنتش هاخدها فى السكة دى، والأغنية كانت غريبة على استاذ نصر برضه فى طريقة الكتابة عشان كدة لفتت نظره برضه.

وعن بداية استعداده للأغنية، يستكمل شوقى حديثه قائلا : الشروع فى الأغنية أتولد واحنا بنجهز لأغنية تانية، وعندما عٌرضت أغنية "ملطشة القلوب" على استاذ ناصر قام كلبش عليها، كانت عبارة عن لحن ومزيكا، المهم سمعنا الأغنية حصل شوية تأخير فى التوزيع الموسيقى، ثم تم تسجيلها الحمد لله، وطلعت بالشكل ده، فهى كلها جات كدة من عند ربنا، وماكانش عاجبنى التوزيع فى البداية، لكن الحمد لله الأغنية حققت نجاح فاق توقعاتنا كلنا.

وعن الصعوبات التى واجهها المطرب والملحن مصطفى شوقى على مدار 17 سنة كفاح فى الوسط الغنائى ومدى تحمله، قال شوقى نصا : اللى يواجه إحباط يُبصلى أى طوبة تتحدف عليك حط الطوب فوق بعضه وأقف عليه، لكن لو تعبت من المحاولات أركن غيرك هيحاول وهيوصل وأنت هتفضل مكانك، لازم مايكونش فيه استسلام والاستسلام ده مش موجود عندى فى القاموس الحمد لله، وانا بالفعل حققت حلمى بعد 17 سنة كفاح مع نصر محروس.