السيسى يشيد بالشعب المصرى فى تحمل الإجراءات الاقتصادية.. الرئيس: التردد فى اتخاذ القرار السليم خيانة فى حق الوطن ولم يكن لدينا أى خيارات أخرى.. استحملوا معانا شوية عشان ناخد مكانتنا الحقيقية

أكد الرئيس عبد الفتاح السيسى، أن جلسة الإصلاح الاقتصادى بمؤتمر الشباب فى الإسكندرية هى الجلسة واللقاء الأهم، وأن ما تناولته من مناقشات الجلسة تبلور ما نريد أن نقوله حول اتخاذ اجراءات الإصلاح.

ووجه الرئيس السيسى حديثه للمصريين، قائلا: "لو بتتكلموا عن دولة ذات جدارة فالجدارة لا تتحقق إلا بالقدرة والقدرة لا تتحقق إلا بالإصلاح الحقيقى، والتردد فى اتخاذ القرار السليم خيانة فى حق الوطن".

وثمن الرئيس السيسى، كل المناقشات التى شهدتها جلسة الإصلاح الاقتصادى، وقال"ذهبت لدول وكنت أنظر على مؤشراتها عشان أعرف احنا فين.. ورحت دول عدد سكانها عُشر عدد سكان مصر وتعانى من مشاكل ديموغرافية يعنى عدم الزيادة السكانية مشكلة بالنسبة لهم والناتج المحلى الخاص بهم قد يكون قريب من مصر وهذا يعكس ما نحن فيه".

وأشاد الرئيس عبد الفتاح السيسى، بقدرة الشعب المصرى على تحمل الإجراءات الاقتصادية، قائلا:"شعب صلب جدا وقادر جدا.. و لكن علشان تاخدوا مكانكم على خريطة العالم، ده أقصى من كده وأصعب من كده وأكتر من كده ونتحمل علشان ناخد مكانتنا الحقيقية".

وحول مصانع قطاع الأعمال، أضاف الرئيس السيسى "دولة فيها 100 مليون إنتاجها لصالح شعبها يبقى بالمستوى ده، طيب لما نعلم إصلاح حقيقى لهذه الشركات اتفرج كمان سنة أو اثنين هاتلاقى الدنيا مختلفة خالص حتى جودة المنتج اللى طالع ستكون مختلفة".

وبالحديث عن حتمية اتخاذ قرارات الإصلاح الاقتصادى، قال "حتمية القرار كان علشان جدارة وقدرة الدولة المصرية ولن يتحق لها هذه الجدارة إلا بحل مشاكلنا بشكل حاسم علشان نطلع لقدام، ولو رجعت الأمور مرة ثانية لم يكن لدينا أى خيار سوى اتخاذ هذا القرار، فاستحملوا معانا شوية".