حرص كريم حسين أدمن صفحة "آسف يا ريس"، أقوى الصفحات الداعمة للرئيس الأسبق مبارك على مواقع التواصل الاجتماعى، على إحياء الذكرى الثامنة لحفيد الرئيس الأسبق محمد حسنى مبارك بطريقته الخاصة، حيث روى قصة أصعب أيام مرت بعائلة مبارك بعد تعب ووفاة أول أحفادهم.
فكتب كريم عبر حسابه بموقع التواصل الإجتماعى "فيس بوك" :"كتير مننا يعرف مبارك الجندي، مبارك القائد، مبارك الطيار، وكتير اكتر يعرف مبارك الرئيس، لكن نادر جداً مننا اللي يعرف مبارك الجد".
وأكد حسين أن كل ما مر بمبارك لا يساوى ما شعر به فى لحظة وفاة حفيده "محمد علاء "، خاصة أنه توفى بين يديه، قائلا :" يعني انت ممكن تكون شايف أن اصعب ايام شافها مبارك ايام ما كان بيحارب مثلا ولا يوم ما شاف الموت بعنيه وهو قاعد جنب السادات وقت اغتياله، ولا وهو بيقابل الموت وجه لوجه وقت حادث اغتياله في اديس أبابا، ولا وقت وهو بيقابل لوحده طوفان 25 يناير، ولا وقت ما كان بيسمع حكم المؤبد عليه بعد 32 سنة خدمة للبلد ".
وتابع :" كل الأهوال الي شافها مبارك دي متجيش حاجة عنده زي لحظة وفاة حفيده "محمد علاء " وخصوصاً لما يكون حفيده توفي وهو علي ايده.. تخيل الرئيس مبارك حفيده بيشتكي من الصداع فجأة وهو جده ماسكه ينزف على ايده ويموت في لحظتها، شعور كان مرعب و مميت بالنسبة لمبارك".
وقال حسين إن محمد علاء الله يرحمه لم يكن بالنسبة لآل مبارك أول فرحتهم فقط، ولم يكن بالنسبة للرئيس مبارك يحمل نفس اسمه فقط، ولكنه كان سببا في أن الرئيس مبارك يسمع لأول مرة كلمة "جدو" كانت علي ايد محمد واول مرة السيدة سوزان مبارك تبقي جده على يده، قائلا :" محمد الله يرحمه كان تاجر السعادة في حياتهم".
وتابع قائلا :"الرئيس مبارك مكنش بيشوف في محمد انه اعز الولد ولد الولد بس الرئيس مبارك كان بيشوف فيه معزة الولد نفسه، لان الرئيس مبارك وسط انشغاله كان سايب مهمة الأسرة وتربية الاولاد على السيدة سوزان مبارك وكان بيسبهم بالشهور خلال حالات الحرب و بين البعثات الدبلوماسية وبين المهمات السياسية مكنش بيقعد معاهم بالقدر الكافي فكان بيعوض الإحساس ده مع محمد الله يرحمه".
و للتأكيد على مكانة محمد، قال كريم :"محمد هو الشخص الوحيد في العالم اللي كان يقدر ينزل الرئيس مبارك في عز الليل ياخده يتمشي بيه في مصر الجديدة لوحدهم، وهو الشخص الوحيد حتي من بين أسرة الرئيس مبارك نفسها اللي يقدر يوصل ويكلم الرئيس مبارك في اي وقت وكان بياخده يوديه على طول نادي القوات الجوية".
وتابع :"مرة الرئيس مبارك حكالنا ان محمد الله يرحمه كان محبوب جداً من طقم الحراسة والسواقين بتوع الرئاسة فكانوا لما يعوزوا حاجة و يتكسفوا يطلبوها من الرئيس مبارك كانوا يبعتوا محمد يقوله.. يعني في مرة راح محمد قال للرئيس مبارك جدو انا عايز 100 ساندوتش قاله 100 مرة واحده هتعمل بيهم اية قال عايزهم افطر وخلاص بعت جبهم له الرئيس مبارك، خرج بيتمشي كدة لقاه واخد السندوتشات وقاعد مع طقم الحراسة والسواقين بيتغدوا سوا".
ومن المواقف الأخرى التى تؤكد مدى حزن الرئيس على حفيده، قال كريم :" لما محمد اتوفي الرئيس مبارك رفض انه يتنشر اي نعي لمحمد الله يرحمه في الجرايد، واعتكف في منزله و مخرجش حتي في الجنازة ولا قابل حد لانه مكنش حابب ان الناس تشوفوا في حالة الضعف و الحزن اللي كان فيها ".
واختتم كلامه قائلا :"الرئيس مبارك في عز التنكيل و التشهير بيه و بأسرته في25 يناير وما تلاها من محاكمات متهزش ولا اتأثر ولا نزلت دمعة منه الا لما في احد التحقيقات جات سيرة محمد الله يرحمه.. من يوم وفاة محمد والرئيس مبارك مقلعش الكرافته السودة وكأنها حداد وحزن دائم على محمد الله يرحمه".
كريم حسين
عدد الردود 0
بواسطة:
محمد صلاح
ده جزء بسيط من ذنب الناس اللي مش لاقيين ياكلوا
ده جزء بسيط من ذنب الناس اللي مش لاقيين ياكلوا نتيجة عدم التنمية طول 30 سنة بالقدر الكافي ولا شغل ولا مستقبل و الوسائط و المحسوبية ده من دعاء الناس
عدد الردود 0
بواسطة:
السنوسي الدكش
ومتنساش الاهوال الي شافها وهو بيسرق البلد
يا سلام علي اللحظات المؤثرة الي قولتها دي الدموع هتفر من عيون الكرة الارضية كلها قدام هذه المواقف الثعبة جدا ... يا عم غور في ستين داهيه هو الحرامي ده هيصعب علي حد لا وقال ايه بيلبس كرافته سودة لزوم الحداد وكرافتة حمراء يوم الاحتفال ب6 اكتوبر عشان الدماء وكرافتة خضراء علشان استصلاح اراضي مشروع توشكي الفاشل ومتنساش كرافته زرقاء بلون ميه البحر الي قضي فيه اخر سنين عمره بالحكم هو علي شواطي شرم الشيخ والشعب قدام الافران مستنشي بجنيه عيش
عدد الردود 0
بواسطة:
حازم
يا ادمن اسف ياريس - اتق الله
اولا: الرحمة واجبة على اموات المسلمين وخصوصا انه طفل لم يبلغ الحلم- الله يرحمه ويحسن اليه - (ولكن بلاش الاستعطاف الاوفر ده). ثانيا: ببساطة الصعبانيات دي مش هاتنسينا جون مجدي عبد الغني في كاس العالم ولا ما فعله مبارك في مصر خلال 30 سنة نقرة اخرى ويجب ان يحاسب عليها. ثالثا: في كل الاحوال منتظرين الحلقات القادمة مبارك العم ومبارك الخال ومبارك الصديق ومبارك الزوج ومبارك الاب ... الخ
عدد الردود 0
بواسطة:
ماهر
كثيرا ما رأى الموت ولم يعتبر و قد قارب الموت الحقيقى
هو الذى بلانا بكمال الشاذلى و ابراهيم سليمان و عز و عصابة اللصوص اللى نهبوا البلد --و حسين سالم و زكريا و هو اعترف بعمولات السلاح و استحلها و باع الغاز بخس و قبض بره -- ما كانش يعرف بلاوى كمال الشاذلى-- ربنا مد له ليتوب و لكن الظالم قلبه مغلق
عدد الردود 0
بواسطة:
ابراهيم عبد السلام
التهجم على الرموز الوطنية على أخطاءهم ونسيان أنجازاتهم
عندما قيل ما قيل عن صلاح الدين الأيوبى ... وجدنا كثير من المدافعين عنه.. بالرغم أن التاريخ يتحدث عنه بأن له أخطاء كثيرة تفوق مفاسد مبارك... فالأثنان لهما أنجازات وطنية ولهما أخطاء كبيرة وكثيرة .. وأما ما يعانية الأن الوطن من مشاكل وأزمات كثير بجانب فساد المسئولين .. سببها الرئيسى معظم الشعب .. جهل وتنبلة وعشوائية وسرقة ونهب ونصب وبلطجة وتدين مزيف مغشوش وقلة أدب وقلة ضمير.. فعندما ينصلح حال الشعب ينصلح حال المسئولين والجكام.. وبناء علية يجب أن نحاسب أنفسنا أولا .. ونعاتب أنفسنا أولا .. فكل شخص هو المسئول الأول والأخير عن فقره وغناه وسعادته وشقاه .. وسبب مشاكله ومعاناته .
عدد الردود 0
بواسطة:
مصرى مصرى
32 سنة خدمة فى البلد ولا 32 سنة ظلم وفساد فى البلد
؟؟؟؟؟؟؟؟؟؟؟
عدد الردود 0
بواسطة:
الفلاح الفصيح
بطلو تتطبيل شويه
بلا اسفين ياريس بلا بطيخ ايه يعنى طفل لاراح ولا جه وكل شويه واجعين راسنا حفيده حفيده. مازينة الشباب راحوا وضحوا بارواحهم فى سبيل وطنهم فى الحرب على الارهاب
عدد الردود 0
بواسطة:
عبد الحميد
جمعكم الله سبحانه وتعالى فى الجنة
نعم المولى ونعم النصير .
عدد الردود 0
بواسطة:
حمادة الاهلاوى
حكاية السواقين والحراسة اغرب من الغرابة !
كان السواقين والحراسة الخاصة جعانين منعقولة وعايزين يتغدوا ومش لاقين والاخ مبارك مش حاسس بيهم وكنا عايززينو يحس بالشعب لا منوفى منوفى مفيش كلا م
عدد الردود 0
بواسطة:
حازم
الى رقم 5
اولا التاريخ به كثير من التدليس (بقصد لو بدون قصد) فمثلا ما درسه التاريخ عن هارون الرشيدي كان ابعد ما يكون عن الحقيقة وحتى في عصرنا الحاضر هناك الكثير من القادة الذين كان لهم ادوارا اكثر من مبارك في 73 ولم يذكرهم التاريخ وفي 52 محمد نجيب اول رئيس للجمهورية اللي اتمسح من التاريخ اصلا - ومع هذا كله - انا شخصيا لا اطلب الا الحق والعدل والا يكون حبنا لشخص هو بمثابة صك غفران مفتوح له ولعائلته - اقل مكاسب هذا العدل هو ان يعلم هو ومن ياتي بعده ان هناك حساب - والامر الاخير هو في الاول والاخر موظف - والموظف في العادة مجرد وجوده في الوظيفة ومرتبه والحوافز وغيره هي بمثابة جزاء له على حسناته ومهما فعل من حسنات لو اكتشف صاحب العمل ان هذا الموظف سرق او اختلس او خنصر ولو حتى جنية اقل ما فيها يرد ما اختلس ويفصل من الوظيفة وفي الحكومة كمان يحرم من اي امتيازات ان لم يسجن - هذا هو الحق والعدل - وغير ذلك يكون تدليس وتواطؤ وعفو ممن لا يملك العفو