ننشر أول قصيدة عن شهيد مصر "عماد الركايبى " شعر سعيد شحاتة

حد نفسه ف دين زياده_... دين جديد

دين بيقتل ناس وبيولّع جريد

دين سياسته تموت خسيس تصبح شهيد

دين ما عندوش فرق بين ميتم وعيد

دين يوقّع مدنه.. ويشوّه نشيد

حد نفسه ف دين زياده..

دين عديم القلب.. دين حبّة عبيد

دين مسلسل بالحديد

...........

عماد الركايبي..

النهارده الحقايق بتغسل وطن

والوطن مش بلاد

الوطن..

إنّ حضنك يضمّ القنابل ويصبح عماد

الوطن..

إنّ روحك تهفهف وتضحك فى وشّ الولاد

الوطن..

إنّ قلبك يكون انحيازى ماهوش ع الحياد

وقلبك كده انحاز لأرضك وناسك

وطينك وفاسك وخطوة مداسك

وأحلام بلدنا اللى جت من خلاصك

عماد الركايبى اللى جسمك تماسك وداس واستغاث

واجهت العدو وانت حاضن بلادك

وعامل عشان أهلى خدّك مداس

لا بصّيت لخوفك ولا للميراث

دخلت وشهادتك بلادى بلادى

يا مصر الحبيبه ويا قبلة ولادى

أضحّى عشانك بروحى وفؤادى

وأفضّ اشتباكك وأعلّى الأساس

بلادى اللى ضمّتنى ضمّيت عداها

وأقسمت اموت فى المعارك فداها

وألوّن بدمّى المبعتر مداها

يلمّونى أشلاء واقولها بحماس

بلادى ولو أرغمونى اغتالونى

ولو خيرّونى أرسمك بين عيونى

وألوّن جبينك بلونى "الآموني"

واعيش بين دروبك جدع إخناتونى

واموت، بس اموت وقت فضّ التباس

.......

عماد الركايبى

الحياه مش بسيطه وحياتك شرف للى عاش الحياه

عماد الركايبي.. يا طوق النجاه

هنفضل هنا نشتهيك فى الجوامع..

............. ولو مرّ صوتك نقف له انتباه

بلدنا برغم المصايب أصيله

برغم الألم والمواجع جميله

برغم الدموع لسّه زى الخميله

برغم الفواصل مازالت قبيله

تشوف اللى زيّك وتهتف معاه

وترمح على الحقّ وتموت فداه

........

عماد الركايبى الفدائى النبيل

يا ورد الحقايق يا تمر النخيل

شهادتك: بلادى بلادى بلادى

ثباتك هناك قال مافيش مستحيل

..........

عماد الركايبي

النهارده الحقايق بتكشف خَطايا

وروحك بتضحك فى قبّة سمايا

وصوتك بيصرخ فى قلب الرحايا

...................... ما حدّش معايا

 ومصر الحقيقه الوحيده اللى فاضله

بتكتب على حيطانها: ميّت فدايا

............

.......

عماد الركايبى

الحياه مش بسيطه وحياتك نهار

منبّت بدمّه المزهّر خَضَار