أخيرا وبعد سنوات من عدم الاقتراب من موقع الفيس بوك دشن النجم أحمد مكى صفحة رسمية بعنوان sekkymallawany وهو الاسم الذي اختاره بعدما فشل فى الحصول على اسم آخر نتيجة اختيار كل الأسماء المناسبة فى صفحات وهمية، ونشر مكى فيديو على الصفحة ليؤكد من خلاله أنها الصفحة الرسمية له، مشيرا إلى أن اسمه بلغة كان يتحدثها زمان مع أصدقائه مؤكدا أن تلك اللغة لن يفهمها إلا أصدقاءه القدامى.
وأضاف مكى من خلال الصفحة "اللى خلانى أعمل الصفحة دى إنى لقيت كم ناس سألت عليا لما غبت السنة الي فاتت وبيستفسروا انا اختفيت فين، وكنت حابب أشكرهم على سؤالهم عليا لأنه فعلا فرق معايا نفسيا وكنت محتاجه قوى.. أنا كان بقالى سنة تقريبا عيان جداً، كان عندى "فيروس" ضربلى الكبد والطحال.. مكنتش حتى أقدر أشرب بق ميه بسبب الطحال أول شهرين من المرض عشان الكبد كان عملى خمول، كنت بأنام من 18 لـ20 ساعة فى اليوم.. خسيت فوق الـ30 كيلو، وكنت شبه فاقد للأمل، الحمد لله على كل حال، أنا دلوقتى خفيت تماما ووزنى زاد تانى، واتعلمت كتير جدا فى الرحلة دى، وكان فارق معايا جدا سؤالكم عنى، حسّيت إن ليا أهل مش جمهور، وإنى فرقت معاهم لما غبت، ربنا يفرح قلوبكم زى ما فرحتوا قلبى، وأهلا بكم فى صفحتى سكى ملوانى= مكى !هى دى "السغة لمبة"، وفيه بعض الناس تحب تنطقها "السغة" لمون" .. !وهى لغة شارع كانوا بيتكلموها عشان الحكومة ماتفهمش هما بيقولوا إيه.. زى شفرة وطريقتها باختصار... الكلمة اللى عاوز تقولها بتشيل أول حرف فيها وتحط مكانه حرف السين (س)، وتقول بعد الكلمة دى أى كلمة تانية بشرط يكون أول حرف فيها هو اللى أنت حذفته وغيرته بـ(س) من الكلمة اللى قبلها "مثال: مكى شيلنا أول حرف اللى هو(الميم) وحطينا (س) فبقت (سكى) حطينا كلمة بعدها بدايتها حرف (م) اللى شيلناها من مكى حطينا كلمة (ملوانى) وبكده (سكى ملوانى) = (مكى) (سغة لمبة) = (لغة) (سكرونة ممبار) = (مكرونة) وهكذا".
تم أضافة تعليقك سوف يظهر بعد المراجعة