هو العيب فى الحكومة أولا وأخيرا وثانيا وثالثا وعاشرا طبعا، سيبك من العنوان، هى البلد دى لو ربنا كرمها بحكومة عدلة، عندها ضمير، وبتشتغل صح، وعندها رقابة على كل حاجة، كان الحال اتعدل، بس تقول لمين.
بس ده ما يمنعش إننا عايشين وسط زومبى، ومصاصين دماء، وآكلى لحوم البشر، ومش واحد ولا اتنين، تقدر تقول إن كله بياكل فى كله، وكله بيستحل فلوس كله إلا من رحم ربك.
مواطن مقيم فى عين شمس، بعت شكوى لـ«اليوم السابع» من تقسيم سائقى السرفيس للطريق خط الألف مسكن إلى رمسيس، بيقول إن السائقين يرفضون تحميل السيارة إلى نهاية الخط والاكتفاء بإيصال الركاب إلى محطة العباسية بنفس قيمة الأجرة «جنيهان ونصف»، فيضطرون للركوب مرة أخرى من العباسية إلى رمسيس مع نفس السائق هو هو، بأجرة جنيه ونصف.
من ده كتير فى كل طرق مخطوط أم الدنيا تقريبا
إنت سواق ولا حرامى؟!.. طب لما أنت حرامى بتنزل من بيتكم وتشتغل على عربية ليه؟! ما تطلع تنشل ولا تسرق محلات ولا تفتح خزن، وبتأكل عيالك من فلوس حرام ليه يا حرامى؟! عشان تاخد الأجرة «4 جنيه» لنفس الطريق هو هو، بنفس الركاب هم هم؟!
طب فين الإخوة بتوع المرور، والسرفيس، والرقابة على الكلام ده.. طبعا فى الكنافة.
عدد الردود 0
بواسطة:
كاتب الياسمين
طيب يا صبر طيب
اعتقد اننا الأن نغنى اغنية عبد المنعم مدبولى فى فيلم مولد يا دنيا طيب يا صبر طيب يرحم زمان وليالى زمان زمان يا متهنى يا فرحان .غياب الضمير والاخلاقيات والقيم والمبادئ والمثل يعنى معظم الناس نقول كتير يعنى طماع جشع بياكل حرام بياكل الميراث ويستولى على الاراضى ويسرق الكحل من العين سفالة ورزالة وانحطاط وقلة ادب وعدم احترام للكبير ونرجع للسواقين هناك شريحة بلا ضمير يجب تشديد الرقابة عليهم ومتابعتهم بكل الاجهزة المعنية .لعدم ترك الحبل على الغارب لابتزاز الزبائن وسرقتهم .واخيرا يا عمنا ايه خفة الدم دى فى المقال اللى فات تصدق فيه ناس بتفهم الهزار غلط وبتتخيل حاجات وهمية.