بالصور..أحزان عامل قُتل ابنه الوحيد بالجيزة.. والد الضحية لـ"اليوم السابع":"حرمونى من ابنى عشان يسرقوا كاسيت توك توك"..و"نفسى ألاقى جثته عشان أدفنها واستريح".. وأمن الجيزة: المتهمون تخلصوا منه فى ترعة المنصورية

"أنا أملى مش رجوع ابنى ليا تانى، أملى العثور على جثته عشان ادفنها وارتاح، خدوا منى الأمل اللى عايش عشانه، ولد وحيد على 5 بنات، قلت هيكون ليا السند لما أكبر، لكن دلوقتى حاسس بشقاء وبؤس ملوش حدود، ابنى اتقتل ومش لاقى جثته".. تلك الكلمات المحاطة بأحزان لا توصف جاءت على لسان "صابر أحمد" عامل والد الطفل المجنى عليه "سعد" البالغ من العمر 15 عاما، حيث روى لـ"اليوم السابع" أحداث اختفاء ابنه الوحيد واكتشافه مقتله على يد 3 متهمين، ومأساته فى عدم العثور على الجثة فقال: "ابنى "سعد" بيدرس فى الصف الأول الإعدادى، ربنا رزقنى بيه ومعاه 5 بنات إخواته، بكافح عشان أصرف عليهم وأربيهم تربية من حلال".

المجنى عليه

وأضاف الأب المكلوم: "بسبب غلاء المعيشة وارتفاع الأسعار، اشتريت توك توك وابنى كان بيشتغل عليه عشان يساعدنى فى المصاريف، كان مع دراسته بيطلع يسترزق عليه، أيام يخرج يشتغل وأيام تانية لا، ويوم الحادث، اتصلت عليه عشان اتأخر عن وقت رجوعه البيت، لاقيت تليفونه مغلق، بحثت عنه فى القرية وسألت عليه أصحابه وسواقين التوك توك، لكن مفيش حد شافه ولا يعرف عنه معلومة، وبعد مرور 24 ساعة حررت محضر باختفائه بمركز شرطة منشأة القناطر، وفى الآخر رحت بيت واحد زميله اسمه "إبراهيم" سواق توك توك، اتضح بعد كدا أنه هو اللى قتل ابنى، وسألته عليه، أنكر أنه يعرفه أو أنه جه البيت قبل كدا، ولما زوجتى شافته قالت أنه جه البيت قبل كدا عشان يشترى سماعات للتوك توك من ابنى، وإنها عارفاه كويس، ودا أجبر المتهم إنه يقر بمعرفة إبنى، لكن أصر أنه ميعرفش هو مختفى فين".

وتابع والد الضحية حديثه فقال: "فى نفس اليوم بالليل الرائد على عبد الكريم رئيس مباحث مركز شرطة منشأة القناطر ألقى القبض على إبراهيم سواق التوك توك ومتهمين أخريين "فريد.ش" سائق توك توك و"يحيى.ش" مبيض محارة، بتهمة قتل إبنى، والمتهمين اعترفوا بقتله عشان يسرقوا كاسيت وسماعات التوك توك، وأكدوا أنهم ضربوه على دماغه لحد ما مات، وألقوا بالجثة بترعة المنصورية، وبالرغم من إرشادهم عن مكان تخلصهم من جثة إبنى، لكن حتى الآن مش لاقيين الجثة، دلوقتى أنا مش عارف أحزن على فراق ابنى، ولا على جثته اللى مش لاقيها، حاسس أن حياتى اتدمرت ووقفت لحد اليوم اللى اتقتل "سعد" فيه".

الضحية طالب بالصف الأول الإعدادى

وتحدث الحاج "خميس" عم المجنى عليه عن العثور على التوك توك الخاص بالضحية وآثار الدماء فقال: "بعد اختفاء "سعد" بحثنا عنه فى كل مكان، وخلال البحث عنه عثرنا على التوك توك مركون بأرض زراعية بمحيط ترعة المنصورية، كان مسروق منه الكاسيت والسماعات، وفتشنا بالقرب من التوك توك عثرنا على آثار دماء، وأبلغنا ضباط مباحث منشأة القناطر، والمتهمين اعترفوا بارتكاب الجريمة، وأرشدوا عن مكان تخلصهم من الجثة بترعة المنصورية، نزلنا الترعة وبحثنا لكن موصلناش لحاجة، قوات الإنقاذ النهرى بحثت فى المكان لكن مفيش فايدة، كل اللى بنطالب بيه أن جثة الطفل نعثر عليها عشان ندفنها، والمتهمين يحصلوا على عقابهم بالإعدام، ودا أقل عقوبة ممكن يحصلوا عليها، عشان حرموا أب وأم من ابنهم الوحيد".

أحداث الجريمة كشف عنها بلاغ تلقاه مركز شرطة منشأة القناطر من "صابر أحمد خميس" عامل، أفاد فيه بغياب ابنه "سعد" البالغ من العمر 14 عاما سائق توك توك، ولم يشتبه فى الواقعة جنائيا؛ وبإجراء التحريات توصل الرائد على عبد الكريم رئيس مباحث مركز شرطة منشأة القناطر إلى أن المجنى عليه تعرض للقتل على يد "إبراهيم.م.ف" 13 سنة سائق توك توك و"فريد.ش.ي" 15 سنة سائق توك توك وشقيقه "يحيى" 27 سنة مبيض محارة.

حزن والد الضحية لمقتله وإختفاء جثته

وبإعداد أكمنة للمتهمين تم القبض عليهم، وبمواجهتهم اعترفوا بقتل المجنى عليه بواسطة استدراجه لمنطقة عزبة المشارقة لشراء سماعات وكاسيت للتوك توك الخاص به، ثم اعتدوا عليه بعصا خشبية وحجر مما أسفر عن مقتله، واستولوا منه على السماعات والكاسيت الخاص بالتوك توك، ثم وضعوا جثته بجوال ونقلوها بتوك توك ملك المتهم الأول وألقوها بترعة المنصورية.

وحرر محضر بالواقعة وأخطر اللواء هشام العراقى مدير أمن الجيزة واللواء خالد شلبى مدير الإدارة العامة للمباحث وأمرت النيابة بحبس المتهمين على ذمة التحقيق.