فى مكتبه بأحد الأدوار العالية فى المول التجارى الشهير، الذى يملكه على كورنيش النيل، يجلس المهندس حسين صبور، رجل الأعمال، والرئيس الشرفى لجمعية رجال الأعمال المصريين، واضعا على حوائط مكتبه العديد من الصور والشهادات ترصد تاريخه الطويل فى مجال المقاولات والاستثمار، سنوات من رئاسة مجلس الأعمال المصرى الأمريكى، وسنوات فى رئاسة جمعية رجال الأعمال المصرية، وعضوية هيئة الاستثمار، ومشاهد وحكايات طويلة مع رؤساء مصر وكبار رجالها، منذ عهد الرئيس الراحل جمال عبدالناصر، مرورًا بالسادات ومبارك، وحتى الآن.
الحديث معه يأخذك فى كل العصور، كل الأزمات من وجهة نظره لم تبدأ الآن، بل بدأت فى الماضى، يبدو من حديثه أنه لم يحب ثورة 1952، وأنه يعترض على كثير من سياسات الزعيم الراحل جمال عبدالناصر، يمر من السادات إلى مبارك، ثم ثورة يناير، التى فقد فيها الكثير، حتى كرسى مكتبه الذى يريحه، يحكى لنا فى حوارنا معه أنه رآه محمولا على كتف أحد من سرقوا مول «أركاديا» فى جمعة الغضب، ويرى أن إنقاذ مصر فى يد السوق الحر والقطاع الخاص وإرساء قيم العمل والتصنيع والإنتاج، وبغير ذلك ستضيع مصر.. وإلى نص الحوار:
.jpg "حسين صبور (1)")
وأنت تجلس هنا فى دور عال فى أحد أشهر المولات التجارية.. هل يصلك صوت المواطن المطحون من غلاء الأسعار؟
- طبعا، حاسس جدا بالأزمة، أنا مراتى كمان بشتكتى من الأسعار ما هى سيدة وبتشترى وشايفة الغلاء.
وما الحل من وجهة نظرك؟
- الحل إن الرئيس يشد على الشعب شوية، لأننا شعب بيتدلع، والرئيس مدلعنا أكتر.
حضرتك متأكد من هذا الرأى؟!
- طبعا، انزل مصانع أكتوبر وشوف كام مصنع محتاج عمال مش لاقى، ونيجى نقول إحنا غلابة ومش لاقيين شغل.
ألا يطمئنك تراجع سعر الدولار ودلالته على نجاح سياسة طارق عامر محافظ البنك المركزى؟
- لا خالص، ملهاش علاقة، لكن ده دليل على نجاح مسار الإصلاح الاقتصادى، إذا كملنا باقى الخطوات.
هل تشك إننا ممكن نكمل؟
- مش شاكك، لكن الإجراءات المنتظرة أكثر أهمية وأكثر قسوة.. مثل دعم التصدير، ودعم السياحة، ووقف الكثير من الاستيراد الترفيهى، وتقليل إنفاق الدولار.
وأين القسوة فى ذلك؟
- القسوة فى إن أنا عشان أقلل إنفاق الدولار، لازم مثلا أمنع العمرة تمامًا ونهائيًا.
لكن هذه شعيرة دينية يقدسها المصريون وسينتقدك الكثيرون!
- يقولوا عليا ملحد بقى براحتهم، لكن الحقيقة ده مش دين، ولا ضرورة، ومش حرام لو منعتها لأنها سنة.
طيب بدل وقف العمرة أمنع مثلا استيراد الخمور؟
- لا مقدرش، عشان السياحة والفنادق، لو أنا عايز أدعم السياحة مقدرش أمنع استيراد الخمور، لكن أقدر أزود الضرائب عليها.
وإذا رفض المواطنون تلك المقترحات واعتبروها مبالغا فيها؟
- براحتهم بقى، لكن ميجوش يبكوا بعد 5 سنين لما تخلص كل الفلوس اللى شحتناها، ونقع فى مصيبة، إحنا دولة اقتصادها واقف على رجليه بالشحاتة.
حضرتك عملت كام عمرة فى حياتك؟
- أنا عملت 10 عمرات، لكن أنا توقفت تمامًا أول ماحسيت إن بلدى مش متحملة، حتى سفرياتى للخارج قللتها.
إيه تأشيرات الدول اللى على باسبورك؟
- كتير جدا، إنجلترا وأمريكا وفرنسا وألمانيا، لكن كلها سفريات للبيزنس.
هل على باسبورك تأشيرة إسرائيل؟
- الحقيقة أه.
كم مرة؟
- مرة واحدة، وكانت من أجل البيزنس أيضا.
هل لديك مشروعات مع الإسرائيليين؟
- لا طبعا، وأرفض ذلك على الإطلاق، لكن التأشيرة كان الهدف منها الدخول لقطاع غزة فى الأساس لأنى كنت صاحب أول مكتب مقاولات هناك بالاتفاق مع الرئيس الراحل ياسر عرفات.
ولماذا ترفض التعاون الاقتصادى مع إسرائيل؟
- لأنها عدو وستظل هكذا، وأنا أذكر أن المخابرات المصرية أنقذتنى ذات مرة من أن يتم استغلالى فى عملية مخابراتية إسرائيلية عن طريق ضباط يهود دخلوا مصر وجاءوا لى كرجال أعمال ورفضت التعاون معهم، وأبلغتنى المخابرات بعدها أنهم يسعون للشراكة معى كغطاء لتواجدهم فى مصر.
عدد من الفنانين ورجال الأعمال نكتشف مع الوقت أن قاموا بعمليات مخابراتية.. هل أنت منهم؟
- فى عمليات تجسس لصالح مصر لا، شرف لا أدعيه، لكنى قمت بمشروعات للمخابرات فى نطاق عملى كرجل مقاولات.
نعود للتعاون الاقتصادى مع إسرائيل.. أنت ترفضه بشدة رغم أن الدولة المصرية بكل أجهزتها تتعاون سياسيًا واقتصاديًا مع إسرائيل!
- الدولة شىء وأنا كمواطن وكرجل أعمال شىء آخر، وكفاية إننا سلمنا إسرائيل كل شىء، مش هيبقى انفتاح اقتصادى كمان، ثم إنى أثق تماما فى خيارات الرئيس عبدالفتاح السيسى وفيمن حوله من وزراء سياديين.
لكن إسرائيل تدعمنا فى مواجهة الإرهاب فى سيناء!
- حقيقى، لكن ده غصب عنها، وهى تدرك تمامًا أهمية مصر، وأهمية عدم سقوط سيناء فى أيدى الإرهاب، وهى مضطرة لذلك من أجل أمنها الشخصى.
تحدثت عن أنك رجل مقاولات فى المقام الأول.. هل ستتمكن الدولة من حل أزمة الإسكان؟
- لا مش هتقدر، والأزمة مش هتتحل، وده رأى صادم لكن دى الحقيقة، وللأسف جمال عبدالناصر هو السبب فى الأزمة بسبب تدخلاته الخاطئة فى سوق العقارات فى مصر طوال فترة حكمه.
أليس تحاملا على عبدالناصر أن نحمله أزمة نعيشها بعد وفاته بأكثر من 40 عاما؟
- لا مش تحامل، وأحكيلك موقف بسيط جدا، تخيل إن عبدالناصر سنة 1954 أحضر اثنين مهندسين وقالهم أنا عاوز أوقف بناء العقارات تماما، واحد رفض، راح سجنه، والتانى قاله هايل يافندم بقى رئيس وزراء اسمه عزيز صدقى.
أول شقة حضرتك اشتريتها فى عهد عبدالناصر كانت بكام؟
- كانت فى مدينة نصر، وإيجارها كان 10.5 جنيه، وقتها كان سعر طن الأسمنت بـ 60 جنيها.
.jpg "حسين صبور (2)")
إذا لماذا لا تحبه رغم هذه الأسعار؟
- كفاية إن عبدالناصر استلم مصر فيها سيناء وفيها عملة لها قيمة، وسابها ومات من غير سيناء، ومضيّع الجنيه المصرى.
بالعودة إلى الوقت الحالى.. هل تفضل خصخصة شركات الحديد الحكومية؟
- خصخصة إيه، إحنا فى مصر مش بنعرف نعمل خصخصة، مبارك كان بيطلع فى التليفزيون يقول للناس «لا بيع للقطاع العام» وهو مكلفنى سرا وأنا ومجموعة رجال أعمال بوضع تصور لبيع الشركات.
هو حضرتك اللى كنت مُكلف بالخصخصة؟
- أنا ومجموعة رباعية من رجال الأعمال، لكن مش هقدر أقول أسماءهم عشان محرجش حد، لكن الحقيقة أن مبارك لم يطبق ولا توصية مما قلنا، وبالتالى حدث ماحدث من فساد فى الخصخصة.
لماذا تؤمن بدعم القطاع الخاص على حساب القطاع العام؟
- لأنى مؤمن جدا بما قالته مارجرت تاتشر رئيسة وزراء بريطانيا «عندما تملك الدولة فلا يملك أحد، وعندما لا يملك أحد، لايهتم أحد»، والقطاع العام يعنى المحسوبية والواسطة والإهمال والفساد، وأنا مؤمن جدا بهذا الكلام، وأتمنى يدركه وزير قطاع الأعمال الحالى لأنه مجتهد وفاهم.
بمناسبة الحديث عن الوزراء.. هل كنت سعيدا برحيل داليا خورشيد وزيرة الاستثمار فى التعديل الوزارى الأخير؟
- أه، لكن الحقيقة مش هى بس اللى كانت وحشة ولازم تمشى، أنا كنت مستنى جدا أن وزير الصحة يرحل هو كمان، ولو إحنا فى دولة محترمة كان وزير الصحة استقال بعد فضيحة رشوة مستشاره، وبعد كارثة أزمة أسعار الدواء.
وما تقييمك لأداء مجلس النواب؟
- مش عايز أتكلم عن البرلمان، بس عامة كلهم لسه سنة أولى.
نعود للحكومة.. هل كنت تنتظر رحيل شريف إسماعيل، رئيس الوزراء؟
- معرفش الصراحة، أنا الحاجة الوحيدة المتأكد منها هو الرئيس السيسى، لأنه راجل مخلص إخلاص غير طبيعى.
فايزة أبوالنجا للأمن القومى؟
- معرفش هى بتعمل إيه الصراحة، مش شايف لها أى بصمة، أنا بحترمها جدا، لكن أنا رحتلها مرة لقيتها قاعدة فى أوضة صغيرة كده ومبتعملش أى حاجة.
إبراهيم محلب للمشروعات القومية؟
- كان راجل ناجح كرئيس وزراء، والرئيس شاف إن ليه دور أهم بجواره.
وما تقييمك لباقى أسماء الوزراء؟
- مستغرب جدا من رحيل أشرف العربى، وزير التخطيط، وجلال السعيد، وزير النقل، ومبسوط من اختيار على المصيلحى وزيرا للتموين، خاصة أنه أول وزير تقريبا من عهد مبارك، وده دليل تغير الثقافة.
كمستثمر.. هل تستبشر خيرا بقانون الاستثمار الجديد؟
- ولا قانون ولاغيره، مش هنضحك على بعض، الأزمة فى المناخ، مهما عملت ألف قانون، لازم نقضى على البيروقراطية والفساد الأول، ومفيش حاجة بتتعمل من غير رشوة.
ذكرت فى سياق حديثك وزراء عصر مبارك.. من منهم تريد عودته؟
- رشيد كان راجل مخلص جدا، وبيركب طيارات على حسابه لأنه راجل باشا، والمغربى عمره ما كان حرامى، ده راجل ساكن فى عزبة 40 فدانا ومعندوش أولاد، هيسرق ليه.
هل تتحدث إلى أحد منهم؟
- لا خالص
ولا زرت مبارك؟
- لا طبعا، وأزوره ليه، وييجى يقولك الحق رجال مبارك، كفاية اللى حصلنا أيام الثورة، وكفاية اللى شفته فى حريق مول إركاديا.
إيه أكتر مشاهد لاتنساها فى حريق أركاديا؟
- هحكيلك أكتر من مشهد لا أنساهم.. هروب ابنى هو ومراته وأطفاله من سطح مول إركاديا بعد سرقة شقته بالكامل.. ومشهد الحريق اللى استمر أسبوعا وكنت هتجنن وأعرف هى ليه الناس بعد مابتسرق بتحرق.. ومشهد كرسى مكتبى اللى بحبه لما كنت بتابع الأحداث من التليفزيون فلقيت واحد شايله على كتفه وماشى بيه فى الشارع.. وحكاية إمام الجامع اللى خلف المبنى اللى الناس دخلوا يخبوا عنده المسروقات فطلع فى التليفزيون يناشدنى أروحله استلم المسروقات.. والحكاية الأكثر سخرية، هما الاتنين اللى قتلوا بعض وهما بيسرقوا محل ذهب فى المول وفى الآخر لقيت أسماءهم على قوائم شهداء الثورة.
ما تقييمك لما حدث مع رجل الأعمال حسين سالم؟
- حسين سالم أذكى رجل فى مصر، وقدر يستغل كل علاقاته لخدمة مصالحه لكن بالورق والقانون.
ما رأيك فيما يحدث مع نجيب ساويرس فى حزب المصريين الأحرار؟
- أحزاب إيه، هو إحنا عندنا أحزاب، ونجيب أخطأ بدخوله السياسة، فأنا مؤمن جدا أن البيزنس والسياسة لايجتمعان، عشان كده عمرى ما هلعب سياسة لا أنا ولا أبنائى، واللى يفكر يعمل كده يبقى أهبل.
لماذا لا يطال حسين صبور ما يطال بعض رجال الأعمال من مضايقات؟
- لأنى رجل شريف، ومليش جنيه واحد بره مصر، وعارف كويس اللى ليا واللى عليا.
كم يبلغ حجم ثروتك؟
- كل ما أملك هى أسهمى فى شركة الأهلى للتنمية العقارية اللى رأس مالها نصف مليار، وأنا شريك بـ16% فقط.
جمال مبارك ظهر كثيرا مؤخرا.. كيف ترى هذا الظهور؟
- غلطان 60 مرة، بس غلبان.. واللى يقول إن جمال مبارك راجع يبقى غبى لأنه انتهى تمامًا.
صوتك لمن فى انتخابات رئاسة 2018؟
- لحد دلوقتى صوتى للرئيس السيسى.
هل توافقه الرأى فى أن مصر دولة فقيرة؟
- مصر فقيرة لأن أهلها كسلانين، مصر ممكن تبقى غنية جدا، لكن الناس عايزة تقعد على القهوة وتلعب طاولة ويطلعوا عمرة على حساب الحكومة، وياكلوا ويشربوا على حساب الحكومة؟
- هو حضرتك عايز تلغى الدعم؟!
- طبعا.. 100%، واللى محتاج أوى يعنى نبقى نديله فلوس.
ومجانية التعليم؟
- طبعا تتلغى.
واللى مش معاه يعلم ولاده؟
- يروح يشتغل، مفيش حاجة ببلاش، مصر محتاجة الجرأة، محتاجة الشغل، محتاجة الحسم، ومن غير الحاجات دى، مش هنطلع خطوة واحدة للأمام.
أخيرا.. ماذا تقول للرئيس السيسى؟
- أنا عايز أقوله شد على الشعب، متدلعوش، إحنا اتدلعنا كفاية.
عدد الردود 0
بواسطة:
حسن المصرى
تاجر اعمال
تاجر اعمال تاجر اعمال
عدد الردود 0
بواسطة:
ابوعدى
حسبى الله فيكم
وانتى ألى زيك هتفرق معاه دعم و?غيره حسبي الله ونعم الوكيل فيك انت وامثالك
عدد الردود 0
بواسطة:
مصرى مطحون
يا راجل حرام عليك
الشعب المصرى مدلع على الآخر وعايش فى رفاهية مفرطة هو دة رأيك بس الظاهر إن سيادتك اللى مدلع و المثل الشعبى بيقول اللى ما بيشوفش من الغربال يبقى أعمــــــــــــى
عدد الردود 0
بواسطة:
رضا
عندك حق
هو علشان حضرتك غنى وعندك فلوس ، أكيد فيه ناس تانيه ماحليتهاش حاجه و محتاجه الدعم . لينا رب اسمه الكريم مابينساش حد . اما بالنسبة للدلع سوف اترك لغيرى التعليق
عدد الردود 0
بواسطة:
د.هشام
الرأسماليه القبيحه
ياسيدى كيف تلغى مجانبه التعليم مع ان اساس الدول التى ترغب فى التقدم هو العلم.... فهى ليست رفاهيه ومنحه من حكومه تجبى الضرائب لتقديم خدمات لدافعها وتوجه هذه الخدمات لتقدم الدوله مثل التعليم و الصحه والأمن و مشاريع البيه الاساسيه. حقيقه كلام لا يصدر من رجل يرى مصلحه الوطن برؤيه شامله عفوا أركن شويه واهتم فقط بشركتك قالوطن بحاجه الى رجال لهم رؤى اكبر و اوسع من قدراتكز الاخرى هى لكل سياسى ومخطط لبناء الوطن و استقراره عليه الا يصطدم بالدين فالعمره ليست من الفرائض ولكنها نافله مؤكده بالسنه و القرأن . المنطقى هو وضع شروط وقواعد لتكرارها مثلا. وهذا الامر ايضا يمكن تكراره فى مجانيه التعليم و اتأمين الصحى لمن يتمتع بها لطفلين مثلا. وهكذا ربنا يرحمنا ممن يفتى فيما ليس هو اهل له.
عدد الردود 0
بواسطة:
مواطن مصرى
حسين صبور فى حوار المفاجآت
انا مع حسن صبور فى الغاء المجانية و الدعم لكن بعد ما اولادنا باخذو المجانية و الدعم مثل ما هو اخذها و اولاده نحن نعلم ان كل من يتكلم على درقع الدعم و مجانية التعلم قد استفادو منها واولادهم المهم فى هذا هو الضمير و مراعة الله فى كل فعل ( واتقوا يوما ترجعون فيه الى الله )
عدد الردود 0
بواسطة:
حسبنا الله ونعم الوكيل
حسبنا الله ونعم الوكيل
السيد الأرسطوقراطي الفاضل لا تحية لمن لا يستحقها وبعد أنت تملك المليارات ولا ترى بعين المواطن البسيط وعندما تقول أن زوجتك تشتكي الغلاء فأنت بخيل ضحل أجوف ولا تعرف سوى الغرور بالمال والجاه أما المواطن البسيط الذي لا يجد قوت يومة فهو من يعاني ولا يملك سوى اللجوء إلى الله مالك الملك بأن ييسترها معاه ويعرف يأكل أولادة. عندما تطالب بإلغاء العمره وأنت في هذا العمر فلا نملك إلا أن نذكرهم بقول الله تعالى : يُرِيدُونَ أَن يُطْفِئُوا نُورَ اللَّهِ بِأَفْوَاهِهِمْ وَيَأْبَى اللَّهُ إِلَّا أَن يُتِمَّ نُورَهُ وَلَوْ كَرِهَ الْكَافِرُونَ (32) سورة التوبة وحسبنا الله ونعم الوكيل
عدد الردود 0
بواسطة:
جوجو
بجد راجل من ضهر راجل
اة طبعا عايز تخلف واد واتنين وان شالله عشره / شوف هاتأكلهم ازاى واشتغل لكن انت تخلف وانا ادعم لأ طبعا مفيش حته فى العالم بيحصل فيها كدا /- مش لاقى تاكل والدنيا غالية روح اشتغل فى المصانع وميناء السويس والدنيا كلها شغل بسعر حلو لكن انت عايز تأنتخ على القهوة وفين البلد امال فين النخوة لما كان الراجل يقولك من جبينى اصرف على بيتى دلوقت انت عايز حد يأكلك انت ومراتك طب مش مكسوف من نفسك / وعايز اقولك فى اليابان زلزال جاب عاليها واطيها لكن الشعب كله اشتغل ووفر اكلته حتى ورجعت اليابان اعلى اقتصاد فى العالم فى سنة واحدة / احنا هنا لسة بيقولك السكر غلى وهو اصلا بيجرف الارض الزراعية اللى بتأكله هو واللى معاه / اقولك روح اغسل مواعين فى ايطاليا / حاجة تقرف
عدد الردود 0
بواسطة:
ايمان
مجانية تعليم ايه حضرتك دى اتلغت المجانية من زمان قوى معرفش امتى
مش عايزة حد يتكلم عن مجانية التعليم لان مفيش مدارس شغالة اصلا المدارس صورة على ورق لكن على الواقع مفيش تعليم ولا مدرسين عايزين يشتغلوا والاطفال تذهب الى المدارس عقاب وادخلوا على صفحات اولياء الامور وشوفوا معاناة الاطفال واهلها والوحيد اللى شغال اللى بياخد غياب الطلبة والتلاميذ كل يوم طب بتاخد الغياب ليه لما مفيش مدرسين عايزين يشتغلوا والاطفال والطلبه الكبار بيذهبوا للمدرسة تضييع وقت حرام خليهم يقعدوا فى بيوتهم يذاكروا او ياخدوا دروس ياريت اليوم السابع يحاول يدخل المدارس ويشوف حضور التلاميذ و شرح المدرسين ويقولنا النتيجة علشان سيادة الوزير ميتكلمش عن الغياب والحضور وكمان يشوف فى غدد كافى من المدرسين لكل مادة فى المدرسة
عدد الردود 0
بواسطة:
مشمش
رجل لكل العصور..مثل كوكو اللى بالى بالكم
...هو فيه حد قاله على التعويم..والاسعار التى تبعت التعويم...والتى اودت بالدبقه المتوسطه الى طبقه الفقراء..والفقراء الى طبقه المعدمين