الإرهاب لا دين له ولا قلب له، ولا وطن له، هو يكره نفسه قبل أن يكره الآخرين، لكنى هنا والآن لن أتحدث عنه بل سأتحدث عن مصر كما رآها شعراؤها.
يقول الأبنودى:
«عدّى النهار/ والمغربية جاية تتخفى ورا ظهر الشجر/ وعشان نتوه فى السكة شالت من ليالينا القمر/ وبلدنا ع الترعة بتغسل شعرها/ جانا نهار مقدرش يدفع مهرها/ ياهل ترى الليل الحزين أبو النجوم الدبلانين/ أبو الغناوى المجروحين/ يقدر ينسيها الصباح أبوشمس بترش الحنين/ أبدا... بلدنا للنهار... بتحب موال النهار/ لما يعدى فى الدروب/ ويغنى قدّام كل دار»
ويقول فؤاد حداد:
«مسحراتى صاحب ندا/ منقراتى كدا كدا/ فى إيدى طبلة مجوده/ أمشى على ريحة الندى/ والنسمة فى الجو منشده/ توالى موالى والحدا/ يا مصر يا واحة مسعده/ نطقت والفجر كان صدا/ حتى الشجر فى الحجر شدا/ لما بدات التاريخ بدا/ لحمه وطول الزمان سدى/ انتى الأميرة المجاهده/ الإنسانية أم الفدا/ أم الحضارة يا والده/ ضميتى الأزهر والسيده/ وألف مادنه يدا يدا/ سياج لامه موحده/ يا مصر عيشى على المدى/ واهدينا ثانية مخلده/ إما الشهادة أو الهدى/ النصر الأكبر ع العدى/ ياكحل عينى يا منجده.
ويقول صلاح جاهين:
«على اسم مصر التاريخ يقدر يقول ما شاء/ أنا مصر عندى أحب وأجمل الأشياء/ بحبها وهى مالكه الأرض شرق وغرب/ وبحبها وهى مرميه جريحة حرب/ بحبها بعنف وبرقة وعلى استحياء/ واكرهها وألعن أبوها بعشق زى الداء/ وأسيبها وأطفش فى درب وتبقى هى ف درب/ وتلتفت تلقينى جنبها فى الكرب/ والنبض ينفض عروقى بألف نغمة وضرب/ على اسم مصر/ مصر النسيم فى الليالى وبياعين الفل/ ومراية بهتانة ع القهوة.. أزورها.. واطل/ ألقى النديم طل من مطرح منا طليت/ وألقاها برواز معلق عندنا فى البيت/ فيه القمر مصطفى كامل حبيب الكل/ المصرى باشا بشواربه اللى ما عرفوا الذل/ ومصر فوق فى الفراندة واسمها جولييت/ ولما جيت بعد روميو بربع قرن بكيت/ ومسحت دموعى فى كمى ومن ساعتها وعيت/ على اسم مصر».
وقال أحمد فؤاد نجم:
«مصر يا أمة يا بهية/ يا أم طرحة وجلابية/ الزمن شاب وانتى شابة/ هو رايح وإنتى جية/ جية فوق الصعب ماشية/ فات عليكى ليل وميه/ واحتمالك هو هو/ وابتسامتك هى هى/ تضحكى للصبح يصبح/ بعد ليلة ومغربية/ تطلع الشمس تلاقيكى/ معجبانية وصبية/ مصر يا أمه يا سفينة/ مهما كان البحر عاتى/ فلاحينك ملاحينك/ يزعقو للريح يواتى/ اللى ع الدفة صنايعى/ واللى ع المجداف زناتى/ واللى فوق الصارى كاشف/ كل ماضى وكل آتى/ عقدتين والثالثة ثابتة/ تركبى الموجة العفية/ توصلى بر السلامة/ معجبانية وصبية/ يا بهية.
تم أضافة تعليقك سوف يظهر بعد المراجعة