تعتبر قصة "فتحى محمد إبراهيم سلام"، البالغ من العمر 74 سنة، والمقيم بقرية شونى التابعة لدائرة مركز طنطا بمحافظة الغربية، مأساة حقيقية، بعدما أدى رسالته فى الحياة وربى أبنائه وعلمهم وزوجهم، من قوت يومه ومن عمل يده، أراد أن يختم حياته بزيارة "النبى"- صلى الله عليه وسلم- "عمرة أو حج"، وهدى الله له أولاده وأرادوا أن يردوا الجميل لوالدهم المسن.. ولكن كان لمصلحة الجوازات بالغربية رأى آخر.
فتحى: "نفسى أزور النبى وأحج بس مش راضيين"
"نفسى أزور النبى وأحج وولادى نفسهم يساعدونى بعد ما كبرت ووصلت 74 سنة شقا وتعب بس الجوازات رفضت تطلع لى جواز سفر بحجة شهادة التجنيد".. بهذه الكلمات بدأ فتحى حديثه لـ"اليوم السابع" قائلا: "أنا راجل فلاح غلبان من قرية شونى ليا 74 سنة شقا وتعب أصلى من مواليد سنة 1943، ولما كبرت وأديت رسالتى ولادى حبوا يكافئونى ويطلعونى أحج، وروحنا للجوازات نطلع جواز ومكنتش عارف إنى هبدأ رحلة عذاب بلا نهاية وأنا فى السن ده".
بداية رحلة العذاب بين متاهات الروتين المصرى
وأضاف فتحى: "كنت بحسب الموضوع سهل وصورونى وروحنا مصلحة الجوازات فى مدينة طنطا، طلبوا مننا صور والبطاقة وشهادة الميلاد وشهادة الجيش، قلت لهم ورقى اهو بس مفيش شهادة جيش لأنى ماروحتش الجيش عشان كنت الوحيد لأمى، قالوا الموضوع سهل روح منطقة التجنيد هات شهادة وتعالى".
واستطرد فتحى قائلا: "روحنا التجنيد ووقت فى الطوابير زى الشباب ومشوار طويل حتى وصلنا للموظف المسئول طلب مننا ورق وصور خرجنا ورجعنا تانى بالدور، ولما وصلنا قال لا أنت عشان سنك كبير مطلوب منك شهادة معاملة، وروحنا على شباك تانى وثالث وعلى الموضوع ده خدنا أسبوع بنجرى من شباك لشباك، وأخيرا حصلنا على شهادة المعاملة، ورجعنا للموظف تانى وكانت المفاجأة".
"فتحى": "لبسونى لبس الجيش بعد ما شعرى شاب"
وتنهد فتحى قائلا: "إيه الموضوع طلع كبير قوى، وضحك ضحكة ممزوجة بالبكاء وقال تخيل يا ابنى طلبوا منى ألبس لبس الجيش الأفرول والطاقية وده شرف كبير بس مع واحد عنده 74 سنة ازاى؟، قلت كله يهون عشان أزور "النبى"- عليه الصلاة والسلام- وصورونى وقالوا خلاص يا حج اتفضل استلم الخطاب بتاعك من على الشباك، وفاجأنى الموظف قالى هو حضرتك مش خدمت فى الجيش قلت له لا يا ابنى انا قلت لك انى وحيد لأمى وأخذت إعفاء الكلام ده من حوالى 55 سنة، قالى خلاص عايزين منك قيد عائلى عشان تاخد شهادة الإعفاء وده سهل من مركز المعلومات".
رحلة جديدة مع العذاب
وأخذ حمادة فتحى نجل المواطن المذكور طرف الكلام قائلا: "حاولنا نقنعهم أن أبويا 74 سنة مقتنعوش وفعلا روحنا مركز المعلومات وطلبنا قيد عائلى، وبعد البحث والتحرى طلبوا أوراق كثيرة عن العائلة بالكامل والجد والجدة وقسيمة زواجهما التى مر عليها أكثر من مائة عام، وطبعا كان استحالة نعثر عليها، وروحنا بالورق اللى معانا بس مركز المعلومات قالوا صعب نعمل قيد عائلى، لوجود أخطاء وصعوبة لحصول على المعلومات، وأصدروا لنا خطاب رسمى مختوم بخاتم النسر موجه لمنطقة التجنيد، ولكنهم رفضوا الخطاب وأصروا على القيد العائلى". وأشار إلى أنهم ذهبوا بعد رحلة العذاب للجوازات وقصوا على المسئول ما حدث ولكنه أصر هو الآخر على شهادة من منطقة التجنيد، وما زال والده حائرا بين الجوازات والتجنيد ومركز المعلومات.
وأكد مصدر أمنى أن من شروط وزارة الداخلية لاستخراج جواز السفر، مستند موضح للموقف من التجنيد للمواطنين بدءا من مواليد 18/3/1941 وما يليها باستثناء الذين لم يبلغوا سن 19 سنة بعد. وناشد فتحى سلام وأولاده وزير الداخلية واللواء أحمد ضيف صقر محافظ الغربية واللواء حسام الدين خليفة مدير أمن الغربية بالتدخل العاجل لإنقاذه من روتين الجوازات والتجنيد واستخراج جواز سفر حتى يزور بيت النبى.
.jpg)
فتحى محمد سلام
.jpg)
الأحوال المدنية تفيد صعوبة استخراج قيد عائلى
.jpg)
شهادة معاملة التجنيد
.jpg)
بطاقة فتحى سلام
.jpg)
بطاقة فتحى
.jpg)
حماده فتحى ابن المواطن فتحى سلام
عدد الردود 0
بواسطة:
احمد
شوف ازااى
اسهل حاجة نعقد الدنيا طيب مهو يا افاضل حتى لو كان هربان من الجيش وعنده 74 سنة حتعمله ايه يعنى؟ خل بسيط اللى عدى ال60 سنة ميطلبوش منه موقف من التجنيد وخلصنا لكن ازاى المسئول يتعب نفسه وياخد قرار زى ده
عدد الردود 0
بواسطة:
إبراهيم خفاجى
بسيطة يا حج شوف محامى شاطر
بسيطة يا حج شوف محامى شاطر وهو يطلعلك الورق دا كله وانت فى البيت وكله بالفلوس بيمشي في البلد دى
عدد الردود 0
بواسطة:
ayman
حسبي الله ونعم الوكيل
معلش يا راجل يا طيب ... اعتبر نفسك زرت النبي عليه الصلاة والسلام الحمد لله ان علاقتنا بربنا مش محتاجة ورق ولا وساطة لو كان هذا المواطن الغلبان ممثل ولا لاعب كرة .. ولا رقاصة كان زمانه خلص ورقة في لحظة ويسافر اي مكان على نفقة الدولة حسبي الله ونعم الوكيل
عدد الردود 0
بواسطة:
أحمد
هى دى مصر
هى دى مصر ده الاعمى المفروض يخلص أوراق المواطن الغلبان ده وطبعا ده مالهوش واسطة هى دى مصر صعوبة وتعقيد.
عدد الردود 0
بواسطة:
مخالى شل
عمار ياطنطا
خلاص ياحاج - روح بيتك ونام - انت كدة اخذت ثواب فريضة الحج وزيارة النبى والزكاة كمان - وعمار يامصر - قصدى عمار ياطنطا
عدد الردود 0
بواسطة:
aHMED
ده انا بطل على كده
وطلعت شهادة الاعفاء فى سنة والكلام ده من 30 سنة متستغربوش لدرجة انى لو كنت دخلت الجيش كان اقرب لى وكنت عمرى 20 سنة وقتها وعملت البدع ومكنتش لسه متودك على دفع الرشاوى بس متقلقش ياحج مكتوبالك ان شاء الله بس اتمسك بحقك ياراجل ده انا ايامها دورت على واحد من اللى بيصوروا بمكنة فحم فى العتبة علشان اعدل العفريتا بتاعت صورة شهادة لولدى سنة 1939 جنون صح ربنا يعينك ويقويك
عدد الردود 0
بواسطة:
مش لازم
الاخ رقم واحد
اللي مدخلش الجيش و سنه عدى الثلاثين بيحضر جلسه محكمه عسكريه واحده و بيدفع الغرامه و ياخد الاعفاء اما اللى دخل الجيش و هرب بيطبق عليه حكم الهروب من الميدان و يتجاب و يتسجن حتى لو عنده 100 سنه و انا بنفسى شوفت واحد و ابوه مسجونين فى السجن الحربى لان الاتنين الاب و الابن تغيبوا لمده سنين بعد دخولهم الجيش ..... انا والدنا صاحب القصه فهو مش هارب من الميدان لانه مدخلش اصلا فإن شاء الله كبيرها غرامه و ياخد اعفاء نهائى اما لو اثبت انه وحيد والديه فمش هيدفع غرامه بس هو غلط انه مهتمش انه يطلع لنفسه شهاده المعافاه وقتها و الله المستعان
عدد الردود 0
بواسطة:
تامر
حظك يابن المحظوظه
فرصه يا معلم تدخل الجيش وتتعالج على حساب الجيش والدوله / قولهم لو مش عاجبكم طلعونى وادونى الشهاده
عدد الردود 0
بواسطة:
طارق سليم
ليس هناك خطأ....
إن ماحدث للحاج المذكور أمر طبيعى....حيث أن جواز السفر لابد له من موقف جيش وهذا الرجل ليس لديه أي مستند يفيد بموقفه...- ودى مشكلته هو-...وحينما أراد أن يسافر للحج أو العمرة أو لسبب آخر طلب منه تحديد موقفه للتجنيد فهذا الأمر ليس تعسفاً من الدولة علشان نبكى على المواطن المخطئ...وخطئه ترك نفسه سنوات وسنوات دون أن يتوجه لأى جهه منوطة لهذا الأمر لتحديد موقفه.. فحينما إحتاج السفر طلب منه المستند وسار على الدرب لأستخراجه ونظراً لعدم معرفته على وجه الإطلاق بالقوات المسلحة توجه في طرق خطأ وتقريباً لم يفهم المسئولين بموقفه الصحيح ..
عدد الردود 0
بواسطة:
مواطن مصرى
قاعده عامه --- جميع المولودين بعد 18\3\1941 عليهم تقديم الموقف التجنيدى
والمولودين قبل هذا التاريخ غير مطالبين باى مستند خاص بالتجنيد -- وواضح من الاوراق ان المواطن له رقم ثلاثى وهو 43\115\768 وله رقم فحص17497\1 \62 ق5731\62- العائل الوحيد لابيه ---وهذا قرار منطقة التجنيد وواضح يعنى لم يتخلف عن التجنيد او الفحص التجنيدى - وعليه يحق له استخراج جواز سفر مصرى - ولا تمتنع الجوزات من استخراجه --- وهو حتى الان ليس بيده شهادة المعامله العسكريه -عليه ان يلجا الى الشئون القانونيه بمنطقة التجنيد بالغربيه لمنحه الشهاده بناء على القرار الموضح بموقفه التجنيدى ولادخل لاى جهة اخرى فى ذلك - اما التهويل والاساءه لاجهزة الدوله لاتغنى عن الحق شيئا.