مالها فراولتنا يعنى؟!.. كخة؟!
مالها الفراولة بتاعتنا؟ وماله خضارنا وفاكهتنا؟! فى البداية تخرج أمريكا وتتهمنا بالباطل وبالزور والبهتان، إن فراولتنا الحمرا الجميلة بتجيب «فيروس سى» لأنها مروية بمياه المجارى، فيتصدى لها الإعلام الوطنى الجميل، ويقول إنها مؤامرة، وبالأمس تأتى الطعنة من الكويت، الدولة الشقيقة، وتقرر عدم استيراد الفراولة المصرية، ولا أى فواكه أخرى إلا بإخضاعها لمزيد من الإجراءات الرقابية المشددة، سبحان الله، ده إحنا فراولتنا جميلة، وبنعمل منها عصير وكوكتيل وفخفخينا، وما بيحصلناش أى حاجة، غير إننا أعلى نسبة فيروس سى على مستوى العالم، بلاش ظلم وافترا.
وزيرة الهجرة غير الشرعية
الدنيا مقلوبة على حادث غرق مركب رشيد للهجرة غير الشرعية، غرق من غرق، ونجا من نجا، وخرجت تصريحات المسؤولين وأعضاء مجلس النواب، لا لتنعى الضحايا، ولكن جاءت كلها بنبرة: كلب وراح، الست وزيرة الهجرة لا ترد على الصحفيين والإعلاميين إلا اللى «بيلمعوها»، ورغم أن الواقعة فى صميم عملها عملت من «مدغشقر»، وفى يوم استقبال الجثامين، بدلاً من عمل حملة توعية عن مخاطر الهجرة غير الشرعية، سيادتها عملت جولة تفقدية لمكتبة الإسكندرية ومتاحفها، فعلا ده المكان الطبيعى لوزرائنا «التحف».
عدد الردود 0
بواسطة:
Sam
السيد محمد العزب لا تعليق --لكن خلاص اتخنقت
السيد العزب لماذا ترسخ نظرية المؤامرة في اذهان الناس . يجب عليك ان تحفز الناس ان يعملوا بصدق و أمانة و اخلاص لبلدهم مصر اكثر و اكثر . يعني الخضروات و التاكهة تروح المعامل و الناس تشتغل بضمير شوية و و دعنا من نظام -- يا عم مشي حالك --- يا با خليها علي الله -- وامثلة الناس عنجنا في مصر كثيرة--- اذن المطلوب التحفيز للعمل الجاد المخلص من غير نظام - مشي حالك---
عدد الردود 0
بواسطة:
منين نجيب الصبر
دة سؤال تسألة يا استاذ محمد صلاح..لا طبعا الفراولة مش كخة ولا حاجة.داحنا اللى كخة
قول لى لية ..اقول لك لا الفراولة كخة ولا الخضار كخة ولا حتى المصرى المبدع الصبور خارج بلدة كخة..القصة وما فيها ان..العيب فينا احنا اللى كخة وستين كخة وعيب السؤال دة يتكرر مرة تانية لاوة اذا عرفنا السبب انتهى العجب..احنا يا سى الاستاذ محمد نواجة حروب ضارية معلنة وغير معلنة حروب ثقافية وانسانية ونفسية وحياتية واقتصادية وحربية لو حبيت. لم يستطيعوا هدم مصر داخليا بالفوضى الخلاقة كما فعلوا فى عدة دول واسقطوها فأتجهوا للحصار الاقتصادى لعل وعسى يجيب معاهم نتيجة ونتهد أحنا شوية ونتبط..فمصر يابا ياسى الحتج محمد وكما قلت فى مناسبات عدة عمود الخيمة لجميع الدول العربية منها والاسلامية ان اسقطها نلت المراد وفزت ولهفت مليارات من الدولار..وبما اننا لم نستسلم ونرضخ ..فيعملوا اية يدوروا على اى سبب يسيئوا بة لسمعة بضاعتك علشان يضربك فى تجارتك ولكى تركع..فية مثل بقول أل اية مالئوش فى الورد عيب قالولة يااحمر يا بو خدين ..هى دى كل القصة..فلا تنزعك وحط فى بطنك بطيخة صيفى ونام هادى البال فمصر لن تسقط دة من المحال..يقولوا فراولة مانجة بلح سحلب..ما تفرقش معانا..علشان كدة احنا اللى كخة لاننا دماغنا يابس ومش عاوزين نركع..ها تمام يابويا ياسى الحاج محمد ..اللة لايسيئك قبل ما تقول كخة دى تانى شوف الاول الاسباب والاهداف اللى وراها..ولك كل تحياتى ..أل كخة أل