جرائم تقوم لها الساعة

الخميس، 22 سبتمبر 2016 10:00 ص

اضف تعليقاً واقرأ تعليقات القراء

جرائم تقوم لها الساعة

حادثة بشعة، من سلسلة حوادث أسرية أصبحت منتشرة حاليا فى مصر بصورة مفزعة، طبيب على خلاف مع مراته، وفكر أنه لو طلقها، هتاخد الشقة، لأنها حاضنة لابنهم «ياسين» صاحب الـ 4 أشهر، يعمل إيه الدكتور؟!.. بسيطة، الدكتور قتل ياسين، ورمى جثته فى الشارع، وبطح نفسه، وراح القسم قال إنه اتثبت والواد اتاخد منه.. بس فى الآخر الدكتور وقع، وخسر مراته، والشقة، وابنه، والمفروض إن ده المتعلم المتنور، ربنا يستر على باقى الشعب.

الأرض الزراعية المستباحة

كنت قاعد فى مكان، وقاعد جنبى مواطن بيتكلم فى التليفون، بيقنع مواطن تانى إنه يبنى على أرض زراعية، وإن محدش هيقدر يعمل له حاجة، ولا يهد له حاجة، وإنه هيدخل كل المرافق، الكهربا والمية عادى جدا، وقاله ما أنا بانى، وحسين بانى، وسيد بانى، وكلنا بانيين، ثم اعتدل وقاله: إحنا بنخالف القانون آه، بس مبنعملش حاجة حرام، هى الأرض دى ملكنا ولا مش ملكنا؟! فغالبا التانى قاله: ملكنا، قاله: خلاص، والتانى يبدو إنه اقتنع، وقفلوا السكة، ومصر جميلة.