"دعنا نحطم عقدهم البالية".. "أحمد ومنى" يعقدان قرانهما بعد 90 يومًا من الخطوبة بأقل التكاليف.. العروسان يحطمان تقاليد المجتمع للتغلب على صعوبات الزواج.. ويؤكدان للشباب: "الجواز إيمان وثقة قبل أى شىء"

فى خطوة جديدة وغير تقليدية للتغلب على صعوبات الزواج التى تواجه الشباب، بداية من شراء الشقة وتجهيزها وشراء الأثاث والأجهزة، أعلن الشاب أحمد تولدو - الذى خطب فى أول إبريل الماضى - عقد قرانه فى الأول من يوليو وحفل الزفاف بعد شهر رمضان، ليتم زواجه بالكامل فى 3 شهور بأقل التكاليف، ويحطم العديد من العادات المجتمعية البالية.

أحمد تولودو ومنى الحسينى، كسروا كل معوقات الحياة وبدأوا حياتهما بدون تعقيدات وتكاليف الزواج الباهظة، رفعوا شعار "دعنا نُحطم عُقَدهم البالية"، موجهين رسالتهم عن تجربتهم للشباب: "الجواز إيمان وثقة بشريك الحياة قبل أى شىء".

وبعد انتشار قصة زواج أحمد برعى الشهير "بتولدو" ومنى، التى أثارت إعجاب مستخدمى فيس بوك، روى الشاب المصرى لـ"اليوم السابع" تجربة زواجه: "أنا خريج كلية إعلام وأعمل بمجال الصحافة، وأنا عملت الشىء اللى يسعدنى وسعيد بردود الأفعال الإيجابية على التجربة بتاعتى".

ويؤكد أحمد، أن تكاليف فرحه بلغت 4 آلاف جنيه، كانت عبارة عن 3.500 جنيه مخصصة لشراء الذهب، و500 جنيه أجرة المأذون"، مشيراً إلى أنه أراد كسر التقاليد التى تعيق عملية الزواج بسبب التكلف فى الأعباء المالية.

برعى أو "تولدو" كما يشتهر بين أصدقائه، واجه بعض الآراء السلبية، التى أكدت استحالة إتمام زواج بمبلغ 4 آلاف جنيه قائلاً: "أنا بتكلم عن مصاريف الفرح، لكن أنا جبت الحاجات اللى مطلوبة منى جبت أوضة نوم، وشقة، وبعض الأثاث، صحيح مجبتش كل حاجة وفيه حاجات لسه هجيبها قدام، لكن أنا كنت عايز أدى رسالة لأصحابى إن التكلف فى مصاريف الفرح شىء مالهوش لازمة، ومكنتش متخيل إن البوست اللى كتبته يتم تداوله بهذا الشكل".

وجاء نص البوست الذى نشره تولدو عبر حسابه على "فيس بوك" قائلاً: "إزاى تتجوز بـ4000 جنيه فى 90 يوم؟، خطوبة 1 أبريل.. كتب كتاب 1 يوليو، الإجابة الفلسفية العميقة اللى عايز أقولها فى رسالتى اللى نفسى توصل لأكبر قدر ممكن من الناس هى الإيمان وشخصية المرأة، والإجابة الواقعية هو أنك لما تستغنى عن الدهب وتسكن فى مفروش وماتعملش قايمة ولا مؤخر وتعمل فرح فى قاعة عادية ومتجبش نيش هتقدر تعمل ده، بمساعدات عظيمة من أمى وأبويا ومنى قدرنا نوصل للإنجاز العظيم ده".

وتابع تولدو: "منى آمنت بحبها ليها وصدقت إنى الشخص اللى لازم تتجوزه، ممكن تضحى بأى حاجة عشان تبقى فى حضنه، واستحملنا بعض وعرفنا عيوب بعض ومميزات بعض، قررنا إننا لازم نتجوز بسرعة لأن مفيش سبب يدعو إننا نخش فى متاهات خطوبة وبعدين تجهيز وبعدين جواز، منى حبيبتى قررت أن الذهب ده مش حاجة أساسية وشايفة أنها مبالغ مش هنقدر ندفعها حاليًا، فى نفس الوقت هى واثقة إن لما يبقى معانا فلوس هابقى أجيبلها".

وأكمل تولدو: "منى برده مشافتش مشكلة إننا نجيب شقة مفروش معقولة، وأهو نفرشها على قدنا، كل اللى محتاجينه سرير وبس ننام عليه وهتكون راضية، بس بالرغم من كده قدرنا نجيب أوضة نوم معقولة ورُكنة، منى برده مش شايفة أن القايمة ليها لازمة ولا شافت إن المؤخر هيضمن حقها معايا، هى متأكدة إن أى مبلغ مش هوا اللى هنتخانق عليه، لو منى شافت أن حياتنا انتهت هتنتهى بسرعة وبهدوء مش بفلوس وخناق على حقوق ورقية ومنظر، عشان كده ماعملتش مؤخر لأن الفلوس دى هياخد منها نسبة المأذون على كل ألف جنيه وإحنا مش معانا فلوس أصلاً".

ويضيف تولدو: "حجزنا فى قاعة صغيرة متواضعة مش قاعة بـ20 ألف جنيه، لأنى مش عبيط ولا أهبل زى ناس كتير على البروفايل عندى، والقاعة مش هتسع ناس كتير للأسف وده لأننا مش معانا فلوس تكفى والله، فى نفس الوقت أنا مش هدفع فلوس عشان حضرتك تاكلى سندوتش كفتة يعنى، طبعًا بعد ما عملنا كل ده قدرنا بكل سهولة أننا نقنع العيليتن إننا نجيب شقة من غير نيش بسهولة".

وأوضح تولدو: "اللى منى عملته كشف أنها عملت اللى يوضح لكل الناس قد إيه هى بنت عندها شخصية قوية، قدرت تقنع العيلة بتاعتها بكل ده، كمان قدرت تساعدنى فى كل ده ووافقت على أنها تدخل بيتنا بحاجات ناقصة كتير وراضية بالحاجة اللى جيبناها، وده بيوضح عظمتها كإنسانة وامرأة عظيمة تستحق أنها تبقى مراتى، وبقى الجواز بحبة دهب ومأذون خلص على 4000 جنيه".

ووجهة "تولدو" رسالة للشباب من الجنسين، قائلاً: "الكلام ده رسالة للرجالة للكسالى والكلامنجية والبنات الخايفة وضعيفة الشخصية، الجواز إيمان وثقة بشريك الحياة قبل أى شىء، ناس معندهاش القدرة على اتخاذ القرار وناس فالحة بس فى الكلام والأحضان والبوستات، ياريت كمان أصحابى يتعلموا ويفهموا إن العمل أحسن من الكلام بكتير، الدرس أنك أنوى وخد الخطوة وابدأ أجر الشقة وهتلاقى البنت لحد عندك بتقف معاك وبتساعدك أكتر مما تتخيل، ودى الرسالة اللى بحب أقولها لكل الأصدقاء اللى سألتنى".

وكشف تولدو: "إحنا جبنا دهب وأجرنا شقة وجبنا أوضة نوم ورُكنه ووضبنا شوية حاجات بالشقة على حبة مراوح وتصليحات فى الشقة على حبة أجهزة كهربائية (حاجات العروسة) والسجاد وغيرها من الكماليات، يعنى إحنا على بعض ماكملناش 30 ألف جنيه والموضوع خلص بالقاعة والكوافير والفستان".

ورفع العروسان شعار: "دعنا نتخذ منزلاً صغيرًا، فارغًا إلا منى ومنك، دعنا نكوِّن أثاثه سَوِيًّا، دعنا نُحطم عُقَدهم البالية، دعنا نعيش فى مكان بسيط، ولكن بِـحُب مُعقّد جدًا".

موضوعات متعلقة:

بالفيديو.."خدوهم فقراء يغنيكم الله".. المصريون يعيدون النظر فى تكاليف الزواج بعد "جنون الدولار": "هنخفف الشروط ونساعد العريس فى الجهاز نظرا لصعوبة الظروف الحالية".. والعروس: هشتغل وهساعده ونشيل بعض