بالصور.. المتهم بقتل طفل الوراق لليوم السابع: أبويا عارف إنى بضرب برشام واشتريت حبيتين بعشرين جنيه.. طلبت من القتيل توصيلى وخنقته ورميت جثته فى الترعة.. أنا أول مرة أدخل قسم

سجله الإجرامى خالى من الجرائم، إلا أن السابقة الأولى التى ارتكبها كفيلة بأن تضع حول رقبته حبل المشنقة، المتهم "محمود كومدينو" تحول من "صنايعى" يعمل بورشة نجارة إلى مدمن للأقراص المخدرة التى أتلفت عقله ودفعته لارتكاب جريمة قتل مأساوية. راح ضحيتها طفل يبلغ من العمر 9 سنوات، حيث استدرجه المتهم وقتله وتخلص من جثته بإحدى الترع، ثم استولى على التوك توك الخاص بالضحية وتجول به فى الشوارع لتوصيل الركاب حتى تم القبض عليه ليعترف بارتكاب الجريمة ويرشد عن مكان تخلصه من جثة الضحية.

اليوم السابع التقى بالمتهم الذى روى كيفية إستدراجه الطفل وقتله قائلا: "اليوم المشئوم دا كنت ضارب برشام وماشى فى الشارع مش حاسس بنفسى، أنا متعود أشترى برشام ترامادول أو تيدول أو أى نوع الاقيه، وفلوس المخدرات كنت باخدها من أبويا اللى كان شغال موظف وطلع معاش أو من اختى، والأتنين عارفين إنى بضرب برشام وابويا كان دايما بيضربنى عشان أبطل برشام، لكن كان جسمى اتعود عليه خلاص ومبقاش فيه فايدة، أنا كنت زمان شغال نجار باب وشباك فى ورشة نجارة، لكن سبتها من فترة وبقيت عاطل، شوية اشتغل سواق توك توك وشوية قاعد فى البيت مبعملش حاجة".

وأضاف المتهم: "يوم الحادثة خدت من أبويا عشرة جنيه ومن أختى عشرة جنيهات واشتريت برشامتين من تاجر برشام كنت بشترى منه دايما، وكمان كان معايا سكينة حاططها فى جيبى كنت مشتريها بقالى كام يوم، ولما ضربت البرشامتين مبقتش حاسس بنفسى وانا ماشى فى الشارع بالقرب من شركة الغاز فى الوراق لاقيت عيل صغير راكب توك توك عمره حوالى 10 سنين، قولتله تعالى وصلنى لمنطقة الكوم الأحمر فى أوسيم، وكان فى دماغى اخد التوك توك منه، وأول ما وصلنا لمنطقة زراعية فى الكوم الأحمر حاولت ارمى السواق بره التوك توك لكنه حاول يقاوم، رحت طلعت السكينة وضربته بيها وخنقته ولما اتأكدت إنه مات رميت جثته فى الترعة.

وتابع المتهم اعترافاته، قائلا: "لما رميت جثة السواق فى الترعة خبيت السكينة اللى كان عليها دم تحت الكرسى الخاص بسواق التوك توك وركبته ومشيت، وفى اليوم دا مروحتش، فضلت سهران شغال على التوك توك أوصل الركاب فى أوسيم، لحد تانى يوم لاقيت واحد بيوقفنى وبيقولى التوك توك د ابتاع ابنى، وديته فين، وضربنى هو وواحد تانى كان معاه، وبعدين فتشوا فى التوك توك لاقوا آثار دم وكمان اكتشفوا السكينة اللى كنت مخبيها تحت الكرسى، وخدونى على قسم الوراق وسلمونى لضباط المباحث
وروى المتهم كيفية إرشاده عن مكان تخلصه من جثة المجنى عليه، قائلا: "لما سلمونى لقسم الوراق أنا فى الأول قلت للمقدم محمد الجوهرى رئيس المباحث إن التوك توك دا أنا شغال عليه ومش بتاعى، لكن بعدين اعترفت وقلت له إنى قتلت سواق التوك توك ورميت جثته فى الترعة، وبعدين خدنى وركبنى البوكس عشان أوصله لمكان الجثة، أنا فى الأول مكنتش فاكر بالظبط رميت الجثة فين، عشان كنت تايه بسبب البرشام، لكن فى الآخر وصلنا للمكان الصحيح والضباط طلعوا الجثة.





وأنهى المتهم حديثه قائلا: "يابيه أنا مش هاعمل كدا تانى، أنا أول مرة أدخل قسم شرطة، هو أنا كدا اتشيعت؟

أحداث الجريمة كشف عنها بلاغ تلقاه العميد محمد عبد التواب رئيس مباحث قطاع شمال الجيزة من سائق توك توك أفاد فيه باختفاء نجله "باسم" البالغ من العمر 9 سنوات، حيث أفاد أنه تركه بالتوك توك الذى يعمل عليه لشراء كشرى من إحدى المحلات وعاد ليكتشف اختفائه.



وعلى الفور تم تشكيل فريق بحث بقيادة العقيد إيهاب شلبى مفتش مباحث شمال الجيزة لكشف ملابسات الحادث وأثناء إجراء التحريات حضر والد المجنى عليه وبصحبته عاطل وأفاد أنه عثر على التوك توك الخاص بنجله بحوزة المتهم المضبوط وعثر على سكين ملطخة بالدماء أسفل الكرسى الخاص بالسائق.

وبإجراء التحريات تبين للمقدم محمد الجوهرى رئيس مباحث قسم شرطة الوراق أن المتهم المضبوط يدعى "محمود.ص" وشهرته "كومدينو" وبمواجهته وتضييق الخناق عليه اعترف بقتل المجنى عليه وتخلصه من جثته بترعة فى منطقة الكوم الأحمر بأوسيم وتم إخطار اللواء خالد شلبى مدير الإدارة العامة لمباحث الجيزة الذى أمر بإحالة المتهم إلى النيابة للتحقيق، حيث حرر العميد عمرو حافظ مأمور قسم شرطة الوراق محضرا بالواقعة وأمرت النيابة بحبس المتهم على ذمة التحقيق.






تجديد حبس مندوب مبيعات لاتهامه ببيع كاميرات محظورة فى الدرب الأحمر