بالصور.. محمود من كتر حبه فى مسلسل "جيم أوف ثرون" قرر يعمل منه نسخة مصرى بالفوتوشوب.. 9 ساعات على الكمبيوتر تسببت فى "قلبان" على فيس بوك".. الفنان نحت شخصيات العمل العالمى على وجوه نجوم دراما رمضان

هواية قديمة ومشاهدة جيدة وعشق لمسلسل "جيم أوف ثرون" وإجادة لاستخدام برامج على الكمبيوتر، عوامل وقفت وراء الألبوم التخيلى الذى صممه محمود عبد الرحمن، الشاب العشرينى الذى جمع صورا لممثلين مصريين ووضعها على أجسام شخصيات مسلسل "جيم اوف ثرون"، بشكل دقيق و"ريأكشنات" تعبيرات وجوه تندهش عندما تشاهدها لنجوم مصر لتشابهها الشديد مع "ريأكشنات" أبطال "جيم اوف ثرون".




8 سنوات هى الفترة التى قضاها محمود عبد الرحمن صاحب الـ21عاما يتنقل بين برامج الفوتوشوب المختلفة، التى انبهر بها مثله مثل أى طفل فى عمره، عندما رأى قدرتها على تغيير حقيقة الأشياء، وخلق عالم افتراضى بالشكل الذى يفضله الشخص برغبته الخاصة، وظل يتعامل معها بشكل مميز حتى التحق بكلية هندسة الطيران، التى لم تقدر على قطع علاقاته بالفوتوشوب، الذى كان سبباً وراء حالة الهياج التى شهدتها صفحات الفى سبوك بعدما شاهدوا الألبوم الذى صممه محمود.
يحكى محمود عبد الرحمن لـ"اليوم السابع" عن فكرة هذا الألبوم ويقول "أنا بتفرج على المسلسل من فترة كبيرة وبتابع كل أجزائه، وبيزيد انبهارى بيه يوم بعد يوم ودايمًا كانت فى دماغى فكرة إن فيه ممثلين مصريين يقدروا يعملوا الأدوار دى ويجسدوها بحرفية كبيرة، وأنا بتفرج كنت دايمًا بتخيل فى دماغى لو الممثلين المصريين دول هم اللى بيمثلوا مين ممكن يعمل شخصية إيه، ولما بدأ الجزء السادس لقيت إنى عاوز أعمل الألبوم ده عشان أفرغ فيه خيالى وأشوف وشوش نجومنا على أجسام الأبطال مع المكيب واللبس".




وعن وقت تنفيذ الألبوم قال محمود "الوقت كان أقل من نص يوم تقريبًا، الموضوع مكنش صعب لكن أكتر حاجة تعبتنى إنى ألاقى صورة للممثل المصرى والممثل الأجنبى فى نفس الوضع وإضاءة قريبة وبجودة كويسة، وبقالى فترة عاوز أعملهم بس مكنتش لاقى صور كفاية، وفيه ممثلين مقدرتش أحطهم بالرغم من إن شخصياتهم فى المسلسل كانت فى دماغى بس ده بسبب الصور والوضعيات أهمهم يوسف الشريف وعزت أبو عوف".



واستكمل محمود حديثه قائلا "أنا لما عملت الألبوم ده عملته لنفسى وعشان أنا بحب المسلسل، لكن مكنتش متخيل إنه يعمل الضجة دى ولا ياخد كمية الشير والتعليقات دى، والحاجة اللى نفسى فيها غنى أشوف بجد المسلسل ده بالمصرى، احنا عندنا إمكانيات وممثلين ومخرجين ممكن يطلعوا حاجة كويسة جداً، لكن المشكلة كلها الإنتاج اللى مش هيقدر يصرف مصاريف بالشكل ده، لأن الجزء السادس بس كل حلقة فيه اتكلفت حوالى 10 مليين دولار وده مبلغ ضخم جداً، بس نفسى يجى يوم ويتعمل".




وعن كيفية اختيار الممثل المصرى المناسب لشخصية المسلسل يحكى محمود ويقول "من متابعتى للمسلسل بقيت حافظ ملامح كل شخصية وتعبيراتها وده خلانى أركز كويس فى الدراما المصرية وأشوف مين تعبيرات وشه وملامحها ممكن تبقى كده، وشخصية زى "سيرسى لانستر" دى شخصية قوية جداً وذكية خاصة إنها زوجة أهم ملوك المملكة السابعة، ولما تابعت يسرا فى مسلسل سرايا عابدين وفوق مستوى الشبهات لاقيت إن ملامحها ممكن تقربنى لشخصية سيرسى، وشخصية زى "سانسا ستارك" اللى حطيت عليها وش يسرا اللوزى، ملامحها طيبة وهادية جداً وشخصية سهل التحكم فيها وده اللى لاحظته فى يسرا اللوزى إن ملامح وشها مش بتقدر تبقى شريرة، ونفس الكلام فى شخصية "سام تارلى" اللى عليها وش أحمد رزق كان لازم يكون الوش فيه ملامح الطيبة وحفظ السر والغموض فى وقت واحد، أما مى عز الدين فكانت من أصعب الوشوش لكن برومو المسلسل الجديد بتاعها ظهر صورتها بشكل جديد وغريب وده اللى ساعدنى إنى أحط وشها على شخصية "كاليسى" لأنها جميلة وذكية وعنيدة وملامحها فيها جمود وتحدى، ومى عز الدين قبل الصورة دى مكانتش بتظهر على وشها ملامح غير الجمال والرقة بس".

صور بسيطة عكست كيف يمكن استخدام الموهبة وتحويلها لأداة لتحقيق الأحلام، وتنفيذ الخيال على أرض الواقع.




لم تكن صور محمود رد فعل غريب تجاه مسلسل بحجم "جيم اوف ثرون" فتفاعل الشباب معه لم يأتِ من فراغ، فهو أول مسلسل على مستوى العالم يخترع لغة خاصة به، ويقدم شخصيات ملحمية حقيقة فى عالم آخر موازى لعالمنا جعل المشاهدين يتأثرون به حتى أصبحوا يفكرون بنفس طريقة تفكيرهم، وبات الحديث عن توقعات الحلقة القادمة هو النقطة التى اجتمع حولها الملايين على مستوى العالم من متابعى المسلسل بداية من عرضه فى 17 أبريل عام 2011، حتى زادت نسبة المشاهدة إلى، لتفاجئ94% بعدما كانت 80% على مستوى العالم فى عام 2011، وعلى مدار 5 سنوات لم تحدث من قبل أن يجتمع الملايين من جميع أنحاء العالم على انتظار موسم جديد يقضى المشاهدين فترة الإعداد له يفكرون فى تطور الشخصيات هم أولى حلقات الجزء الجديد بما لم تصل إليه أقصى حدود توقعاتهم، وبعد أن أعلنت الشركة المنتجة للمسلسل HBO عن تقديم موسم سابع يعرض فى 2017، يحقق بذلك "جيم أوف ثرون" رقم قياسى فى المسلسلات التى قدمت مواسم عديدة وحافظت على النجاح بل وعملت على زيادته بعد كل حلقة.

موضوعات متعلقة..

- "أسطورة" الفيس بوك.. كيف ودع المصريون رفاعى الدسوقى على السوشيال ميديا؟

- 5 أسباب تخلى الست المصرية محتاجة "ميديتيشن".. "خليكى زى نيللى"