بالصور.."اليوم السابع" يرصد مأساة خطف رضيع من مستشفى الصف.. والدة الطفل:"منقبة حرمتنى منه ومش عارفة أكمل حياتى إزاى من غيره".. والده:قعدت من الشغل عشان أدور عليه وموظف المستشفى يعرف معلومات عن المتهمة

"إزاى أكل وأشرب وضنايا بعيد عنى، معرفش عايش ولا ميت، شبعان ولا جعان، 11 يوم مروا على خطفه، بأدور عليه فى الشوارع والحوارى، بأجرى ورا أى أمل يوصلنى لابنى، مش عارفة هاكمل حياتى إزاى لو مرجعليش تانى".

هذه الكلمات قالتها لـ"اليوم السابع" والدة الطفل "أحمد" البالغ من العمر 4 أشهر، والذى خطفته سيدة ترتدى نقابًا من داخل مستشفى الصف المركزى.

وقالت والدة الرضيع: أنا ساكنة فى قرية غمازه الكبرى التابعة لمركز الصف، حالنا على قده، والرزق اللى جاى على قد اللى رايح، يا دوب عايشين ومستورين بالحلال.

وأضافت: "فى يوم الحادثة رحت مستشفى الصف المركزى عشان أكشف على ابنى "مصطفى" لأنه كان تعبان شوية، وكان معايا ابنى الصغير "أحمد" شايلاه على كتفى، ولما وصلت المستشفى الموظف قال لى الدكتور هيتأخر وهيجى على الساعة 12 الضهر".

وأضافت والدة الطفل: "استنيت الدكتور لحد ما وصل، وخلال انتظارى لاقيت واحدة ست لابسة نقاب قعدت جنبى، الست دى فى سحابة بيضا على عينيها، وبدأت تتكلم معايا وتسألنى إنتى جاية تعملى إيه وتكشفى على مين؟، وعرضت على مساعدتى لو محتاجة علاج على نفقة الدولة وأنها تعرف موظف بالمستشفى اسمه "محمد" ممكن يساعدنى، لكن أنا قولتلها أنا مش محتاجة الكلام دا، أنا جاية أكشف على ابنى وخلاص، والست دى كان معاها بنتها الصغيرة، عمرها حوالى 6 سنين، الطفلة دى طلبت منى إنها تشيل ابنى "أحمد شوية" اكسفت أقولها لا، وخدته منى شوية وبعدين رجعته تانى، وفى الوقت دا كانت الست المنقبة بتكلم معايا فى كلام غريب، ولما الدكتور طلب منى أعمل إشاعة لاقيت الست ماشية ورايا ومش عايزة تسيبنى، وفجأة طلبت منى إنها تساعدنى فى حمل "أحمد" ابنى شوية، لاقيت نفسى بسلمهلها وأنا مش حاسة بنفسى، ويا دوب بصيت جنبى فى غرفة الإشاعة ورجعت عشان أكلمها ملقتهاش، زى ما تكون فص ملح وداب، دورت فى المستشفى وصرخت، قولت لهم يا عالم الحقونى، ابنى اتخطف، الناس قالولى مشفناش حاجة.

وتابعت: "جريت على مركز شرطة الصف وقولت للضابط ابنى اتخطف، قال لى استنى شوية، وفضلت قاعدة لحد ما الضابط وأمناء الشرطة راحوا عند المستشفى وبحثوا فى كل مكان، لكن ملقوش حاجة، ومرجعوليش ابنى، ومن ساعتها وأنا بموت، ولا باكل ولا بشرب، نفسى ابنى يرجعلى تانى، نفسى ربنا يحنن قلب الست اللى خطفته وترجعهولى، أنا معملتش حاجة وحشة فيها، منها لله عشان تحرم أم من ابنها".

وبدوره قال هانى مصرى والد الطفل لـ"اليوم السابع": "أنا شغال عامل معمار، أرزقى وشغال باليومية، يوم شغال ويومين لا، لكن الحمد لله على كل حال، من ساعة ما ابنى اتخطف وأنا قاعد من الشغل، كل يوم بخرج وأقاربى معايا بنبحث عنه، دورنا فى كل البلاد اللى جنبنا، لكن مفيش فايدة".

وأضاف: "فى المستشفى فى موظف اسمه "محمد" الراجل دا قالنا إن الست المنقبة دى بتيجى على طول المستشفى وبتسرق تليفونات وفلوس من المرضى، وأنه لو كان موجود فى اليوم اللى حصلت فيه الجريمة كان منعها، الموظف دا يعرف معلومات عن المتهمة، ولما طلبنا منه يساعدنا إننا نوصل لها، بدأ يتهرب منا، ودا خلانى أروح لمركز الشرطة وبلغت الضابط باللى حصل، وقال لى هنجيبه وهنعمل تحريات عنه، لكن لحد دلوقتى مفيش أى أخبار عن ابنى، أنا خايف يكون اتخطف عشان يسرقوا أعضائه، أو الست تستخدمه فى التسول وتشحت بيه، وبأدعى ربنا إن ابنى يرجع تانى ومتحصلش له حاجة وحشة".

موضوعات متعلقة:

- خطف رضيع من مستشفى دمياط العام بعد ولادته بيوم واحد