وروى المتهم "مؤمن.م"، سائق ميكروباص، خلال التحقيقات تفاصيل الواقعة، حيث أكد: "اللى حصل إن أنا بمر بأزمة مالية من فترة طويلة، وعمال استلف من اليمين والشمال عشان أحاول أفك الضيقه اللى أنا فيها، وشغلى كسواق مش مخلينى أعرف أعمل حاجة فى حياتى، ولا حتى أكون نفسى زى كل الشباب، وفى الفترة الأخيرة الشيطان بدأ يوسوسنى بعمل حاجات غريبة، منها إنى أأقتل ولى نعمتى صاحب العربية اللى بشتغل عليها".
وأضاف المتهم: "وفعلاَ بسبب الظروف اللى بمر بيها، بدأت أفكر فى الموضوع بشكل جدى، ورسمت خطه لقتل "مسعد سيد"، صاحب العربية الميكروباص اللى بشتغل عليها، وبما إنى متعود أنا وهو نسهر كل كام يوم مع بعض، نقعد نحشش مع بعض، قمت جايب كمية كبيرة من الحشيش والأفيون، وقولتله هنسهر مع بعض النهاردة، واستدعيته يجينى الشقة" .
وتابع المتهم: "صاحب العربية جه وشربته مخدرات لغاية ما إتأكدت إنه اتخدر ومش حاسس بحاجة حواليه، رحت طاعنه كذا طعنه بالكسينة اللى معايا، وبعد ما إتأكدت إنه مات، خدت الجثة وحطتها تحت السرير، والكلام ده كان يوم السبت اللى فات الموافق 9 إبريل، وروحت الجراج اللى فيه العربية عشان أخدها وأهرب من المنطقة خالص، لكن سايس الجراج رفض، وقالى خلى صاحب العربية يجيى يخدها إنت مش متعود تيجى تسحب العربية فى الوقت ده، أو حتى خليه يكلمنى على التليفون" .
واستطرد المتهم: "لما لقيت نفسى مش هعرف أخد العربية رجعت على الشقة، وبدأت أفكر فى المصيبة اللى حطيت نفسى فيها، والجثة بدأت ريحتها تظهر لإنى فضلت سايبها تحت السرير لمدة يومين، رحت جايب سجادة ولفيت فيها الجثة، وربطتها بسلك كهربا، وطلعت على حتت أرض فاضية جنب الجراج الموجود فى مساكن النهضة، وقمت رامى الجثة ومتخلص منها، وفجأة لقيت إتنين من الجراج طلعين يجروا وقالولى مترميش زبالة هنا وشيل اللى إنت رميته ده وأمشى من هنا، ولما قربوا من السجادة شموا الريحة، راحوا مسكونى وسلمونى لقسم الشرطة" .
من جانبه، قرر المستشار محمد الجرف، مدير نيابة حوادث شرق القاهرة، حبس سائق السيارة 4 أيام على ذمة التحقيقات، لاتهامه بقتل مالك السيارة بغرض سرقة السيارة، كما بتشريح جثة المجنى عليه ودفنها، وإنتداب الأدلة الجنائية لمعاينة أثار الدماء الموجودة داخل شقة المتهم، بالإضافة الى تحريات المباحث .
تم أضافة تعليقك سوف يظهر بعد المراجعة