بالصور.."عايدة" يطاردها المسجلون فى غياب الشرطة.. المجنى عليها:"ضابط قال لى روحى اقتليه واحنا هنيجى.. ومسجل دخل عليا البيت وحاول إشعال النار فى شقتى وضربنى قدام بنتى الصغيرة.. مش عارفة ادخل بيتى تانى"

لم تجد "عايدة" السيدة الكادحة المعيلة لأسرة توفى عائلها الوحيد، من ينقذها سوى اللجوء إلى وسائل الإعلام بعد لجوئها إلى السند الأول والحامى الرسمى "الشرطة"، لكى تحميها وأسرتها الصغيرة المكونة من نجلها، وابنتها الصغرى خمس سنوات، من بطش مسجلين خطر، سلكوا كل الطرق لمضايقتها، حتى تم التعدى عليها، وأصابتها بجروح بالغة الخطورة، كادت تصل إلى الموت، ومحاولة إشعال النيران بشقتها.

"اليوم السابع" التقى "عايدة عفيفى" المواطنة التى لم يقهرها الزمان، ولكن قهرها مسجلين خطر، غابوا عن أعين رجال الشرطة، لتروى ما عانته فى الأيام السابقة، قائلة: انا بفرش فرش كده ناحية شارع نصر الدين عشان أسترزق انا والعيال، معايا ولد وبنت، وجوزى توفى وانا بعول الأسرة الصغيرة دى، وبقوم الساعة 12 بالليل انزل على شغلى وبرجع الساعة 12 الضهر أو حسب الشغل ما يخلص، واهو اللى بيجى من ربنا كله رزق".

وأضافت "عايدة": "فى يوم 25 يناير اللى فات كان وقتها عيد الشرطة، اتخانقت مع الناس اللى بتيجى تفرش، بعد ما انا أمشى، كانوا بيضايقونى فى اكل عيشى، وكنت بخاف وبلم فرشى بسرعة قبل ما هما يوصلوا، عشان المشاكل والخناقات، فجه واحد منهم ضربنى على وشى بكوباية شاى، ولقيت نفسى مصابة بجرح قطعى".

وتابعت "عايدة": "بعد الإصابة روحت على قسم الشرطة، اعمل محضر فى اللى ضربنى عشان حقى مش يضيع، فلقيت ضابط جوه قسم الطالبية اسمه "عمرو" ومعرفش "عمرو" ايه بقية اسمه، مرضيش يعمل محضر، وقلى روحى اقتليه، وبعدها احنا هنيجى، بعدها روحت قسم العمرانية، عملت محضر بعد ما اديت عشرين جنيه لعسكرى عشان يعمل المحضر، ومحصلش حاجة بعدها، ولا حد اتحرك".

وأكملت "عايدة": "من كام يوم فوجئت بواحد من المسجلين دول، جالى البيت، وضربنى قدام بنتى الصغيرة، بقطعة حديد وحصل إصابة، وفتحة فى راسى وصلت لـ 10سم، والبنت جالها صرع، وطلعت تجرى على السطوح، والشخص ده حاول يولع فى البيت، بفتح أنبوبة البوتاجاز، ولكن ربنا ستر، وبعدها عملت محضر برقم 4748 جنح العمرانية، وبرده مافيش حاجة حصلت ليا، ولا تحقيق اتفتح، وكل يوم فى تهديد، لدرجة انى خايفة اروح البيت، أو يخطفوا البنت من الشارع، ومش عارفة أعمل ايه".

وأضافت "مع العلم أن القسم عارف أن الأشخاص دول مسجلين، ومتهمين فى قضية قتل كمان، وهما اسمائهم "أشرف.س"، وسعيد.س"، وواحدة كمان اسمها "نادية"، وبعدها قاموا بالتعدى على واحد من جيرانى، حاول ينقذنى منهم، ومن ساعتها وانا مش عارفة ادخل بيتى، وخايفة على بنتى، دول مسجلين وممكن يبهدلونى انا وعيالى، مين يحمينى".

موضوعات متعلقة..

"صحافة المواطن"..قارئ يشكو من انتشار البلطجة والمخدرات بالزاوية الحمراء