نهى العمروسى: قلبى معاكى يا شيرين وواثقة إنك أخدتى قرارك مضطرة من اليأس

مازال خبر اعتزال المطربة شيرين يشغل بال الكثيرين فى الوطن العربى، كونها تتمتع بموهبة وإحساس رائع، فكتبت الفنانة نهى العمروسى على صفحتها الشخصية بموقع التواصل الاجتماعى الشهير الفيس بوك "الأسطورة شيرين عبد الوهاب، تفتكروا إيه إللى خللى واحدة بحجم موهوبتها تقرر تعتزل؟ واحدة فى عز شبابها وقاعدة ومرَبُعة فى قلوب الملايين، وعلى قمة هرم النجومية والنجاح!!!".

واستكملت "أنا أظن أن إحنا إللى طفشناها، أيوة الجمهور هو إللى طفشها، لأنها ست عبارة عن كتلة أحاسيس، وإحنا بقينا مجتمع مريض بكل المقاييس، ومش محتاجة أثبت رأيى ، لو حد قرأ كومنتات البشر إللى على الفيس بوك على أى حد هايتأكد إنى مش غلطانة وخصوصاً بأة التعليقات إللى على الفنانين، تعليقات فى منتهى القذارة والانحطاط تدل على إننا فى مجتمع مظلم ، متخلف وتحسسك إنك مزنوق فى ركن قذر من العالم ، أنا أظن إن شيرين أحاسيسها إتجرحت مش مرة و لا إتنين ولا مية حتى ، أكيد شيرين اتجرحت آلاف المرات، أكيد حست إن روحها الحرة اتحبست فى سجون الرجعية والعفن، أكيد حست بالخطر على حريتها وحست بالقرف والاشمئزاز من إللى حواليها ، حست إن المجتمع العجوز ده بيحاول يسرق روحها الشابة منها فاقررت تنقذها من الهوا الملوث دة وتشممها هوا نضيف ، مجتمع كذاب مليان أقنعة مافيش مكان فيه للصادقين، بيحاول يرغمها على إنها تبقى زيه وهى مش ممكن تتخلى عن صدقها، قلبى معاكى يا شيرين لأنى متأكدة إنك خدتى قرارك ده وإنتى مضطرة ليه وقلبك بيتقطع من اليأس والحزن والإحباط".

اخبار متعلقة

عمرو مصطفى لشيرين عبد الوهاب: "نتخانق مع بعض آه.. لكن لا تعتزلى يا بنت مصر"