مرتضى منصور: "ميدو كان يسب الدين للاعبين..وطهرنا النادى"

أكد مرتضى منصور رئيس نادى الزمالك، أنه لن يتراجع عن اتخاذ كافة السبل القانونية ضد الإعلامى عمرو أديب وأحمد حسام ميدو المدير الفنى السابق للأبيض، قائلاً: "هتتحاسب يا ميدو أنت وعمرو، وهجبكم فى ملعبى بالقانون، وهاخد حقى منكم".

أضاف مرتضى خلال تصريحاته لبرنامج "اللعبة الحلوة" قائلاً:"انا لما بغلط فى حد بقول له وحياة أمك ودى أقصى حاجة، وأنا خليت الفراش يرد على ميدو لأن ده مستواه، والفراش قالكم أنه سكرى، وكان بيسب الدين لللاعبين، وتخلصنا من كابوس، وطهرنا النادى منه، والحملة دى متعملتش غير لما بقى فارق النقاط مع الاهلى 3 بنط، ولو كان 7 أو 10 مكنش هيبقى فى حملة زى دى تتعمل على".

استطرد رئيس الزمالك حديثه قائلاً: "أنا اشتغلت كل حاجة فى نادى الزمالك، اشتغلت بنا وسباك وكهربائى، علشان أعمل نادى الناس تفخر بيه، والمفروض تعملولى تمثال، وكل اللي بتعملوه ده ميهزش شعرة من راسى..وأقسم بالله ميدو اتحايل على 3 أيام علشان أعين أمير مرتضى فى جهازه المعاون وأنا رفضت".

ووجه مرتضى حديثه لجمهور الزمالك، قائلاً: "أحب أقول لجمهور الزمالك، افرحوا بناديكم، وبرئيس النادى وافتخروا بيه، وبفرق كرة القدم واليد والسلة، فكلهم فى المراكز الأولى، وعايزين نقفل الصفحات دى ونشوف شغلنا، علشان نحقق البطولات من تانى".