حازم إمام :"عزاء أبويا فى الزمالك مخلينى مش قادر اتكلم"

استنكر حازم إمام رئيس جهاز الكرة السابق بنادى الزمالك، الطريقة التى تمت إقالته بها مع أحمد حسام ميدو المدير الفنى السابق، رافضاً أن تتم اقالتهما عن طريق الفضائيات دون أن يتم إخبارهما مسبقاً.

وقال حازم إمام، "عرفت أن فى رسالة وصلت لمعظم الإعلاميين بإقالتنا، وكان المفروض الرسالة دى تيجى لنا الأول، بس أنا مربوط لأن اللى اتعمل فى عزاء أبويا من الزمالك ومرتضى منصور، يخلينى متكلمش فى الحاجات دى، ولا ألوم، لكن طبعاً الحاجة دى ضيقتنا لأننا معرفناش غير من التليفزيون".

وأضاف الثعلب الصغير فى تصريحات تلفزيونية، "الحمد لله ربنا مدينى نعمة حب الناس، ودائماً حسن النية، والكل حذرنى من مرتضى منصور، وقالولى جيبك علشان يخلص عليك، بس أنا شايف انى جيت مخلصتش، والراجل من أول يوم اتكلم عنى بكل احترام، وكان خالد الغندور انتقدنى بشدة، لكن هو طلع ودافع عنى، و بس كان لازم العلاقة فى النهاية تكون كده، خصوصا إن أنا وميدو كنا كباتن الزمالك".