وروى "محمد. ر" أحد المتهمين الرئيسين فى الواقعة، خلال تحقيقات النيابة العامة فى القضية المقيدة رقم 2073 لسنة 2016 جنح المطرية، قائلا: "اللى حصل أن يوم الخميس قبل اللى فات جالنا تكليف بخروج قوة من القسم لعمل دورية فى شوارع المطرية، وساعتها أول ما شاف واحد من الشباب اللى معروفين عنهم تجارة الحشيش والترمادول، الدورية طلع يجرى، قمت أنا والزملاء جرينا وراه للقبض عليه، وأثناء القبض عليه اصطدمت فى بوابة حديدية اتسببت فى إصابتى بجرح فى الوجه وإيدى ورجلى، وبعدها زمايلى خدونى على الموتوسيكل، وطلعوا على مستشفى المطرية لعلاجى، وده كان الساعة 3 الفجر".
وأضاف المتهم: "فضل زمايلى يدوروا فترة طويلة على أى دكتور موجود فى قسم الاستقبال بالمستشفى، لكننا ملقناش حد يعبرنا أو يستجيب لنا، لأن كل الدكاترة كانوا نايمين فى غرف المستشفى، وبعد 45 دقيقة انتظار، حضرلنا الدكتور أحمد السيد عبد الله السيد إبراهيم، وأول ما وصل سألنى عن إصابتى، قولتله إنى متعور فى وشى زى ما حضرتك شايف، وطلبنا تقرير طبى عن الحالة لأنها إصابة عمل".
وتابع المتهم: "ولما طلبت التقرير، سألنى عن طبيعة عملى، قولتله أمين شرطة، ساعتها وشه اتغير مش عارف ليه، وقالى (انتوا شوية كفرة تستاهلوا الدبح)، ساعتها إحنا اندهشنا من اللى سمعناه، وقولناله إنت بتغلط ليه هو إنت شفت حاجة، قام اتلم علينا الموظفين بتوع المستشفى، وعملوا علينا كردون، وبعد ما زعقنا معاهم وصوتنا على على بعض، قالنا (ما بعالجش كفرة انتوا شوية قتلة)، ورفض يعالجنى".
وأضاف المتهم: "بعدها بدأ الأطباء بمد أيديهم علينا، لدرجة أن (على) زميلى أصيب بكسر فى رجله نتيجة التعدى عليه، ولما وقع على الأرض سحب منه أفراد أمن المستشفى السلاح الميرى بتاعه، واستلم منهم السلاح وهو خارج من المستشفى، وقولنالهم واحنا خارجين إننا هنعملكوا محاضر ومش هنسيبكوا، بعدها زمايلى خدونى وخدوا (على) اللى رجله اتكسرت، وطلعوا بينا على مستشفى الزيتون، واتلقينا العلاج هناك، بعدها فوجئنا أن أطباء مستشفى المطرية مضربين عن العمل للمطالبة بمحاكمتنا، وحررنا محاضر زى ما هما حرروا محاضر بالواقعة، وبعدها هما طالبوا التصالح أمام النيابة، ووفقنا على مطلبهم، لكننا فوجئنا بعد كده إنهم راحوا قدموا فينا بلاغات للنائب العام بعد المصالحة، وعاوز أقول أن مهمتنا الأساسية هى حماية الناس مش التعدى عليهم وضربهم".
من جانبه، قرر المستشار محمد عبد الشافى، المحامى العام الأول لنيابات شرق القاهرة الكلية، حجز 9 أمناء شرطة على ذمة التحريات، لاتهامهم بالتعدى بالضرب على أطباء مستشفى المطرية، كما أمرت النيابة باستدعاء عدد من ضباط شرطة المطرية، والاستعلام عن الدفاتر الخاصة بالقسم يوم الواقعة.
موضوعات متعلقة..
- النيابة تقرر حجز 9 أمناء شرطة فى واقعة المطرية.. الأمناء ينكرون فى التحقيقات تعديهم على الأطباء.. ويؤكدون:أحدهم قال لنا تستاهلوا أكتر من كدة.. وممرضة بالمستشفى: مسكوا "النبطشية" وتعدوا عليه بالضرب
تم أضافة تعليقك سوف يظهر بعد المراجعة