دعا الرئيس عبدالفتاح السيسي جميع المسئولين فى الدولة لمكافحة الفساد فى الدولة، جنبا إلى جنب مع الجهود الكبيرة التى تبذلها هيئة الرقابة الإدارية، مطالبًا المحافظين بمخاطبة أساتذة الجامعات الموجودة فى نطاق محافظاتهم، للإطلاع على المشاريع المختلفة، مضيفًا: "لو أنا مسئول وحطيت إيدى على كل صغيرة وكبيرة فى المشروع فإن فرصة التجاوز تصبح قليلة".
كما دعا الرئيس السيسي خلال افتتاح مشروعات الاستزراع السمكى بمدينة الإسماعيلية، المسئولين بالاستفسار عن المشاريع التى تقام فى نطاق مسئولياتهم، مؤكدًا أن تلك الخطوة ستعمل على مكافحة جميع التجاوزات، معلقًا: "يمكن المسئول يقول أنا مش فاهم أو معنديش الخبرة اللازمة،.. ده صحيح، بس تخيلوا لو احنا فى مصر كل وزير وكل محافظ وكل رئيس هيئة حط إيده معانا فى أى التزام بيتعمل، وأصر انه يعرف الحكاية ماشية إزاى، لكن لو أنا سيبت الناس كده فى عمل ضخم يتم على مستوى الدولة، فى ظل تعاقدات كثيرة، فيه ناس ممكن تضعف، لذلك الإشراف والمسألة تؤدى إلى عدم التجاوز، ولو ماكنتش هاتعرف، فتكرار السؤال هايخليك تعرف.. ولو انت احترت ارفع سماعة التليفون وكلم رئيس هيئة الرقابة الادارية أو الجهاز المركزى، أو كلمنى أنا وقولى يا افندم انا عندى موضوع وعاوز أطمن عليه، هاقف جنبك".
وتابع الرئيس: "مش عاوزين ابدا ناخد وقت كبير فى مكافحة التجاوزات، وهذه الأمراض، لأننا عندنا جهد وعمل كبير قوى عاوزين ننجزه، وهذا لن يحدث إلا من خلال تجاوز السلبيات التى تعيق مسيرة تقدمنا وتعطى انطباعا غير جيد لدى المواطنين".
وأكد الرئيس عدم تدخله فى فى أى تجاوزات تحدث، قائًلا: "رئيس الرقابة عارف ده كويس، وماليش دعوة، كله يتحاسب، وأنا كمان مستعد اتحاسب، والله العظيم مستعد أتحاسب، وأى حد يغلط يتم محاسبته ولا يوجد أحد كبير على المساءلة من أول رئيس الجمهورية، لأن دى مش حاجتنا، والشعب أمنا عليها، وهذا الكلام ينطبق على جميع المسئولين فى الدولة ومافيش حد أبدا خارج المساءلة، واللى يغلط هايتحاسب بالقانون، فى أى جهة وأى مؤسسة، مافيش حد كبير على المساءلة".
عدد الردود 0
بواسطة:
عبدالهادي الحسيني
إحنا منسيين
إحنا بنحب سيادة الريس وبنعتبره مش رئيس لا دا بمثابة أب لينا كلنا ... ولكن كل المحافظين مهملين وليس لديهم أي قدر من المسئولية أنا من محافظة أسوان - قرية المنصورية - جزيرة بوسط النيل .. بقالنا 3 شهور بنصرخ بسبب محطة المياه بالقرية ولا حياة لمن تنادي ولا محافظ ولا مجلس محلي ولا مجلس مدينة كله ودن من طين والثانية من عجين ونواب الشعب اللي انتخبناهم نايمين في العسل .. أغيثونا الناس بتموت
عدد الردود 0
بواسطة:
محمودسعيد
يدالسارق
مرة واحدة يقطع يد السارق فلن تجد سارق او مرتشى بس مين حيقطع يد مين الا من رحم ربى
عدد الردود 0
بواسطة:
حمدى عباس ابراهيم
الكلام حلو أوى وينبض بالصدق بس مش ديه المشكلة ..
المشكلة فى مين اللى حايثبت الغلط ؟ واحد غلط . الأمن والنيابة والقضاء همّا دول مفصل العدالة وال3 باتوا (3 × 1) × ( 0 ) = صفر والله العظيم كتير جدا بيقى الناتج تحت الصفر .. أعد ياريس هيكلة أى جهاز منهم بما يضمن ارتقاء الجهازين الآخرين بموجب الارتباط العضوى بينهم يعنى مثلا اعمل ضابط بجد مش بنجوم نجمة كل سنة والا كل 3سنين . او اعمل قاض بجد او وكيل نيابة بجد مش طالب فاشل نجح بلجنة رأفة ومسك برشامة فى دار القضاء الهالى
عدد الردود 0
بواسطة:
م/عبدالعال
تحية رقم 3
تحية للاستاذ حمدي رقم 3 كلامك صح وسيادة الرئيس ينفذ وكلنا خلفه-
عدد الردود 0
بواسطة:
حامد عبداللاة
ربنا معاك وينصرك
ربنا يوفقك سيادة الرئيس .. انت تحارب الفساد وهو اقوى من الحرب على الارهاب .. والفساد هو اللى معطل تنمية الدولة .. لأن الفاسدين عايزين البلد تقع عشان يستمروا فى فسادهم .. بس انت استمر على بركة الله .. وياريت محكمة هؤلاء الفاسدين علنيا حتى يكونوا عبرة لغيرهم .. وبلاش رموز اسمائهم .. لازم الكل يعرف اسماء هولاء الحرامية اللى بيدمروا اقتصاد البلد .. ربنا يعينك علينا ويسترك .. وصدقنى مهما كان الفساد اقوى من الدولة .. فى الاخر مصر ح تنتصر ..