جرائم قيام الساعة
صحيت متفائل، قلت الواحد يدخل يكتب كلمتين متفاءلتين ويتبسط ويبسط زمايله المواطنين. قريت خبر عنوانه: «سائق يتخلص من حماه بعد كشفه علاقته غير الشرعية مع حماته بالدقهلية»، فقلت، ببراءتى المعهودة: إزاى السواق اكتشف إن حماه وحماته بينهم علاقة غير شرعية؟!
طلع السواق هو اللى بينه وبين حماته علاقة غير شرعية وعلشان يخلص من حماه، قتله. والنتيجة: زوجة جوزها كان عايش معاها هى وأمها فى نفس الوقت وقتل أبوها، يعنى الزوج هيتعدم والأب مات، والبنت مش فاضل لها فى الدنيا غير أمها اللى كانت بتخونها مع جوزها. هو إحنا عملنا إيه بنتعاقب عليه إننا عايشين فى وسط كل ده؟
خوازيق محافظ الجيزة
محافظة الجيزة اللذيذة قررت تغيير أعمدة الإنارة فى الشوارع من أعمدة تعمل بالمصابيح التقليدية المهدرة للطاقة لأعمدة «ليد» موفرة للطاقة، ماشى، جميل، الله ينور، بس أنت فى مصر، مفيش حاجة تكمل عدل أبدا، المحافظة شالت العواميد القديمة كلها، وركبت الجديدة، كويس؟!.. القديمة راحت فين بقى؟!.. مرمية فى الشوارع فى أماكنها زى «الخوازيق»، وتخيل حضرتك عمود نور طوله 10 أمتار، مرمى فى الأرض فى الشوارع الرئيسية، اللى بالطول واللى بالعرض، واللى بالسمبوكسة، وتحصل حوادث عادى، والناس تتكعبل عادى، والحرامية تسرقهم عادى، ما إحنا فى مصر.
عدد الردود 0
بواسطة:
ســـــــــــــــــــــــــــــامو الذى يكره السرقة
أعمدة النور القديمة متروكة لمن يسرقها !
نفس الأداء خاصة بسرقة أعمدة النور أنا شفته أمام عينى ، حيث يتم سرقتها فعلا ، بواسطة أبطال الغد وكل غد .أقصد الحرامية . هؤلاء يمكنهم أن يتدربوا على سرقة ممتلكات الحكومة واحدة واحدة .. وبعدها سوف يسرقون اسدين قصر النيل أيضا .. لأنهم معمولين من الحديد والحديد بقى غالى ،