خالد صلاح يفند الخطايا السبع لوزارة شريف إسماعيل بـ"على هوى مصر": عيب نستورد فول وذرة صفراء بمليارات الدولارات.. لا يمكن الاعتماد على الضرائب كمنطق وحيد.. والحكومة هتصرف "القرض" فى حاجات مالهاش لازمة

كشف الكاتب الصحفى، خالد صلاح، رئيس مجلس إدارة وتحرير "اليوم السابع"، النقاب عن سجل كامل من الأخطاء الجسيمة فى الأداء الاقتصادى لحكومة المهندس شريف إسماعيل، ورصد بالأرقام عدم قدرة الحكومة على تحريك الدولة للأمام.

الرهان على قدرة الحكومة على تحريك البلد لقدام... by youm7

وقال خالد صلاح، خلال تقديمه برنامج على هوى مصر، المذاع على فضائية النهار: "كنت قلت لحضراتكم امبارح إنى عندى حلقة بالأرقام حول أداء حكومة رئيس الوزراء شريف إسماعيل، وبعض الناس كلمونى وبعضهم من مجلس الوزراء، وسألونى ليه بتعمل كده، أنا ما يفرقش معايا مين يمشى ومين يقعد أنا يفرق معايا مصلحة البلد".

خالد صلاح يكشف المشكلة الكبرى فى آلية تحصيل الضرائب

وأضاف: "احنا بنتكلم فى تظبيط البلد، وأنت شايف أنه علشان تظبط الخلل فى الموازنة العامة بتفرض ضرائب، ولو فضلنا بالطريقة دية ممكن تحصلنا مشاكل، إحنا بنقول أن المواطنة فى أى دولة قائمة على الضرائب، لكن كمان قائمة على قدرة الحكومة –أى حكومة، سواء كان فيها شريف إسماعيل، الببلاوى، المهندس محلب.. أى حد- الرهان على قدرتها فى تحريك البلد لقدام مش على أنها تعتمد أنها كل ما تتزنق تعوض من الضرائب، ودية المشكلة الحقيقية".

وتابع: "بنقول المهندس شريف إسماعيل، مش شخصنة، لكن لأنه فى النهاية بيتحمل كل تبعات الحركة الواقفة، النهاردة، وأنا قائد لفريق تنفيذى عندى صلاحيات دستورية كبيرة، أتشكر لما أعمل حاجة كويسة، ويُلام لما يعمل حاجة مش كويسة".

وأشار خالد صلاح: "النهاردة المهندس شريف إسماعيل، رئيس الوزراء، والدكتور خالد حنفى، وزير التموين السابق، لما طلعت لجنة تقصى الحقائق فى موضوع القمح قالوا ما كنا عارفين، وطلع خالد حنفى معايا فى البرنامج وقال (أنا قدمت ورق بكل الخلل اللى ضبطته لجنة تقصى حقائق البرلمان للحكومة).. ليه الورق ده ما اتحركش قبل ما تنزل مقصلة البرلمان تطيح بوزير؟".

بلدي رايحة تاخد 12 مليار دولار وبتنشق عليه... by youm7

وطالب مقدم برنامج "على هوى مصر"، بعدم الاعتماد على مبدأ خطأ ومفهوم خطأ، وهو "مطنش لحد ما الإعلام أو البرلمان أو حزب سياسى أو الرئيس نفسه يتدخل ويقولك أنت غلط".

الغرض من الحلقة.. عدم الاعتماد على الضرائب كمنطق وحيد

وأكد الكاتب الصحفى، أن غرضه من هذه الحلقة شىء واحد فقط أمام الله والناس، وهو ألا نعتمد على منطق الضرائب كمنطق وحيد، أنا مبقولش أن الاعتماد على الضرائب غلط، وعامل 3 حلقات الأسبوع اللى فات عن الضرائب التصاعدية، وإن رجال الأعمال يدخلوا معانا، وبنقول كافح التهرب الضريبى، هو النهاردة لما يبقى فى 210 مليارات تهرب ضريبى، أكلم مين؟!.. مش هكلم رئيس الوزراء وقوله لازم يبقى فى ضرائب وجدية، وعرق وتعب؟!

لا يمكن الاعتماد على الضرائب كحل وحيد by youm7

كما علق على ملف صندوق النقد الدولى، وأكد أنه مؤمن بقرض صندوق النقد الدولى، لأنه يعطى "كريدت" على الصعيد الدولى وهو قرار سياسى صحيح، ويقول للمستثمرين فى الخارج إن هذه الدولة قادرة على تسديد ديونها وبالتالى قادرة على النمو.. قائلا: "لكنا لما ألاقى أن حضرتك هتاخد القرض تشترى بيه حاجات مستوردة ملهاش لازمة.. أزعل ولا مزعلش.. مبقولش شريف إسماعيل يرحل أو يقعد".

لا نحتاج ضرائب جديدة.. هاتوا الموجود

وأردف خالد صلاح: "لما أكون هاخد بطلوع الروح 12 مليارا 4 كل سنة، والاقى أنى أقدر أوفر من الداخل الـ12 مليارا وأكتر.. نزعل من الحكومة ولا منزعلش.. نغضب ولا منغضبش.. نعاتبها ولا لأ.. بلاش نعاتبها ولا منعاتبهاش.. هيجى واحد يقولك ما أحنا شغالين وعارفين الملفات.. ما أنتم كنتم شغالين على القمح لحد ما غرقتوا كلكم".

وأضاف أن تقديره كرجل مراقب ومحلل أن ترتيب الملفات داخل مجلس الوزراء غير دقيق، أو ترتيب المهندس شريف إسماعيل لطريقة المتابعة غير دقيق، ليه.. أنا هاخد 12 مليارا، حسبنا الـ200 مليار تهرب ضريبى، لو هيجى منهم 100 أو 50 أو 20، لو بعناهم فى السوق السوداء هتجيبلك 2 أو 3 مليارات دولار، لو بعته فى البنك هتجيبلك 4 مليارات دولار توازى قرض الصندوق، ولهذا خرج خبراء الضرائب، ومنهم أشرف العربى، رئيس مصلحة الضرائب السابق قال أنه بيحذر الحكومة من فرض ضرائب جديدة.. هاتوا اللى موجود، أنت شغال على الموظفين وكبار رجال الأعمال والمصنعين، والباقى فى النصف ضائع.

حكومة الذرة الصفراء.. نستوردها بـ1.7 مليار دولار سنويا

ورصد الكاتب الصحفى مجموعة كبيرة من الأرقام تظهر غياب ترشيد الاستيراد فى ظل أزمة الدولار، وغياب الفكر الحكومى القادر على الابتكار وإيجاد الحلول، وعن صرف الأموال قال بنستورد بـ1.7 مليار دولار ذرة صفراء، هيطلع واحد من مجلس الوزراء ويقوللى الذرة الصفرة مهمة لأنها بتستخدم كعلف للحيوان وبتنمى الثروة الحيوانية.. طب مش قادر تزرعها هنا؟!.. هيقولك أصل زراعتها هتحتاج وقت.. يعنى تصرف مليار و700 مليون على الذرة الصفراء، ومش قادر تدعم الفلاح هنا بـ500 مليون دولار، يعنى 4 مليارات و400 جنيه بسعر البنك إديهم للفلاح، ودعمه أنه يذرعها هنا، وشجع زراعة الذرة الصفرة، ووفر مليار و200 مليون.

حكومة الذرة الصفراء.. تستورده بـ1... by youm7

وتابع أن مصر تستورد بـ690 مليون دولار فول، رغم أن القرآن الكريم ذكر شهرة مصر بالفول والعدس، فكيف نستورد بـ600 مليون دولار فول، وحتى لو أحنا مزنوقين فى الفول، مفيش أى خطة أوفر الـ600 مليون دولار دول وأعمل زراعات، ما الريس عملك المليون ونصف مليون فدان، مفيش 200 ألف فدان ولا 100 ألف ولا 50 الف يعوضولك الفرق فى فجوة الاستيراد، عشان بدل ما تدفع الدولارات دية، وتلمها من السوق، توفرها.

وتابع أن الأرقام بتقول أن فى تقصير وتقصير كبير، أن الحكومة بين قوسين "حكومة الذرة الصفرة"، بتصرف مليار و700 مليون دولار على الذرة الصفرة، رغم أننا والصينيين اخترعنا الزراعة، ورغم أننا نستورد هذه الدرة بحجة العلف، نستورد لحوم بـ1.3 مليار دولار.

بحرين وبحيرة ونيل ومصر تستورد أسماك بـ350 مليون دولار

واستطرد: "نستورد فراخ بـ400 مليون دولار، وسمك بـ350 مليون دولار، رغم أنه لدينا بحرين وبحيرة ناصر، وملابس جاهزة بـ340 مليون دولار، وأعلاف بـ600 مليون دولار، لما بتيجى تبص ولا واحدة من دول نووى، أنا أفهم وزارة الكهرباء تتعاقد مع الروس عشان تجبلنا نووى، أو سيمنز تعملنا محطات كهربة، أفهم أننا نستورد محطات تحلية مياه، لكن مفهمش أننا نستورد فول ودرة وصفرة، ده معناه أن مفيش حكومة بتشتغل، أنت معتمد على تمويل غذائك من قروضك، القروض فى ذاتها مش عيب، لكن لو عملنا بيها الضبعة حلال، عملنا محطة كهرباء، لكن دولة استلفت والحكومة تاخد الفلوس استوردنا بيها؟ّ.. وأستوردنا فول؟.

الرئيس عبد الفتاح السيسى قدم مشاريع خارج الصندوق

وأردف: "أحنا معجبين بالرئيس عبد الفتاح السيسى، خرج برة الصندوق، اشتغل على الكهرباء، وعلى الطرق، ورغم كل الضغوط الخارجية على العاصمة الإدارية الجديدة، على الضبعة نووى، فى خروج عن الصندوق واستخدام لصلاحياته".

حرام الرئيس يعمل على كل هذه المشروعات برة... by youm7

وأكد خالد صلاح: "احنا سوق كبير جدا، أحنا 100 مليون، اللى هيعمل كام مزرعة فراخ هيبقى ملك، واخد 4 مليارات من صندوق النقد هتصرفهم فى ده؟!.. لأ ده أحنا نجوع أحسن، لكن اللى جوعانا فى الحكومة يتحاسب من البرلمان".

موبايلات بـ1.3 مليار دولار سنويا وسيارات بـ1.9.. نُقف سنة

وأضاف: "بعيدا عن الأكل والشرب، بنستورد موبايلات بـ1.3 مليار دولار، ما تولع سنة، نصلح الموبايل سنة، ونشغل الناس فى التصليح سنة واحدة، وفى الغزل والنسيج بمليار دولار، فأين دور وزارة، وسيارات بـ1.9 مليار دولار، والحديد تام الصنع، هل تعلم أننا بنجيب حديد تام الصنع ما بين مليار و300 إلى مليار و700 مليون دولار فى السنة، من الأتراك اللى مبهدلينا فى الإخوان وغيره رغم كل المصانع اللى عندنا، عز وحديد المصريين والجارحى وبشاى.. هل المصانع دية كلها مش مكفية؟!.. طب ما نعمل مصنع.. هياخد قد إيه؟!.. وأدعمهم فى الغاز بدل المليار و700 اللى بندفعهم للأتراك، هل أنا واخد الـ4 مليارات عشان أطلعهم للأتراك مليار و700 للأتراك كل سنة؟!".

انا دولة استلفت.. خدت الحكومة الفلوس استوردت... by youm7

وتابع: "وبعدين نسأل مجلس الوزراء عن الدولار، يقولك أسأل طارق عامر، بتلبسها لطارق عامر.. بتكلمنا عن إيه.. طارق عامر لو بيطبع دولارات مش هيغطى عليك".

لو طارق عامر بيطبع الدولار مش هيغطي على الحكومة by youm7

حرام الرئيس يعمل على كل هذه المشروعات برة... by youm7