حسن شاهين على فيس بوك يؤكد: القبض على محب دوس من أمام الكاتدرائية أمس

نشر الناشط حسن شاهين، أحد مؤسسى حركة تمرد منشورًا على حسابه الشخصى على موقع التواصل الاجتماعى "فيس بوك"، أكد خلاله القبض على محب دوس، العضو المؤسس لحركة تمرد وعضو حركة كفاية، من أمام الكاتدرائية المرقسية بالعباسية أمس الأربعاء.

وكتب "شاهين" محب دوس مقبوض عليه طب بمناسبة إيه وليه وعشان إيه، وأحمد المصرى اتقبض عليه طب سؤال بردوا ليه أنا لسه كنت مقابل أحمد والراجل مركز فى شغله اللى ما صدق ولقاه ومسك فيه بعد عذاب.

وتابع "خالد القاضى اتهدد إنه هيتاخد وشباب تانى كتير محبوس وشباب كتير متهدد وحياته فى خطر وتحت رهن أمر الباشا اللى بيرفع التليفون ويحرك مخبرينه ويجيب فلان وعلان اللى أساسا طالع عينهم وكل واحد بيدور على شغل بالعافية عشان يعرف يعيش كفاية بقى الواحد قرف".

واختتم كلامه قائلا "إذا كانت التهمة إن احنا خرجنا فى ثورة 25 يناير طب كلنا 25 يناير وهنفضل مؤمنين بثورة 25 يناير اللى هزت عرش الديكتاتور ومش هتسمح بالرجوع تانى للخوف لأن خلاص الحاجز انكسر بدل المرة ألف مرة".

وأضاف "شاهين" فى تعليق له على خطف محب دوس من عند الكاتدرائية "جمال جورج اللى كان معاه فى الكاتدرائية جاله ناس وعرفوا بنفسهم من جهات أمنية وطلبوا منه إنه يروح معاهم ساعتين وهيمشى فى نفس اليوم وهيستجوبوه عن بعض الاسئلة وهيروح ولحد دلوقتى بيتصلوا بيه، تليفونه مقفول وده اللى وصلنى بالكامل".