رئيس الزمالك لمعروف وكوفى:"اللى مش عجبه يمشى واللى عنده عرض يتكل على الله"

وجه مرتضى منصور رئيس نادى الزمالك، رسالة لمعروف يوسف ومحمد كوفى لاعبا الفريق الأبيض، قائلاً: "عايز أقول لوكيل معروف وكوفى، هما ملهمش فلوس عندى، لما يكون واحد ليه 20 دولار، ميتنططليش لأن عندى فتح الله وعبد الواحد وأحمد حسن ليهم فلوس من أيام ممدوح عباس، وحازم إمام وشيكابالا طبعاً، بس زى مقولتلهم ووعدتهم بكرة هحط فلوسهم فى البنك، بعد ماخد فلوس الراعية، وعلى يوم الأحد هيصرفوها، ومفيش حد هيبقى ليه مليم عندى، وبقول لوكيل معروف وكوفى اللى مش عجبه يمشى واللى عنده عرض يتكل على الله".

أوضح رئيس الزمالك خلال تصريحاته لبرنامج "اللعبة الحلوة" أن خزائن القلعة البيضاء ستنتعش بـ"14 مليون ونصف جنيه"، مؤكداً أنه سيتسلم غداً مبلغ 7 ونصف مليون جنيه من الشركة الراعية، وسيتم سدادهم للاعبين أصحاب المستحقات المتأخرة، بالإضافة إلى استلام مبلغ 7 ونصف مليون جنيه، يوم الخميس من محمد الإتربى رئيس بنك مصر، باقى مستحقات إيجار 4 محلات، مشيراً إلى أن خزينة الاشتراكات أصبحت تدر دخلاً نصف مليون جنيه يومياً للنادى.