أحمد طلعت يكتب: كلام متقالش!

كلامك اللى أنا سامعه منك دلوقتى هو فعلا اللى جواك..؟
كام مرة كنت فى موقف معين فى حياتك وبعد ما روحت بيتك قعدت تقول لنفسك أنا إزاى كنت كده إزاى كنت ضعيف كدة وبتقعد بترسم سيناريوهات فى خيالك لى قد أيه كان ممكن تكون واثق من نفسك أكتر ومش متعصب وبتقول اللى عايز تقوله من غير ما تتوتر و لا تعرق ولا تتعصب وتلبس نفسك غلط .. عندى يقين أن كتير مننا عندهم حياة تانية جواهم .. حياة تانية شايف نفسه قوى فى الموقف اللى كان فيه ضعيف مش خايف فى الانترفيو اللى سقط فيه وبيتكلم حلو بس هو فى الحقيقة كان زى الزفت و مش عارف يجمع كلام يقوله ..
حياة تانية فى موقف كان بينخانق فيه مع زميله فى الشغل وكان عارف يحرجه كويس وخلاه شكله وحش .. بدل ما كان جبان وعمال يتهته و مش عارف يغلبه حتى فى الكلام ..

تقريبا كلنا بنكون كمان مجهزين كلام وسيناريو فى دماغنا لأغلب المواقف فى حياتنا بس بنيجى عندها و بنتنح للأسف .. نصيحة، اتعود دايما تقرا دماغ اللى بتكلمه و تسمعه اكترو اتكلم قليل جدآ .. خد نفسك قبل ما ترود قبل ما تنفعل قبل ما تدافع عن نفسك صدقنى كتر الكلام مش بيجيب غير الندم.

حاول أنك تتعلم من كل مرة لسانك منطقش فيها الكلام اللى كنت المفروض تقوله !