وائل عبد الودود حسين يكتب: ارحموا شوية الشارع

أبوس أيدك أركن على جنب
مش فرض علينا وذنب
تقف فى نص الشارع
واللى نازل واللى طالع
الشارع مش ملكك لوحدك
ولا ورث عن أبوك وجدك
حرام عليك ورانا أشغالنا
خليتنا نتأخر على عملنا
وأنت يلى راكن صف تانى
حرام عليك ما تبقاش أنانى
طابور طويل واقف وراك
والناس واقفة مستنياك
وأنت يلى ماشى بالعكس

ملاكى ميكروباص وتاكس
مش خايف من المخالفة
وتحصل بعدها كارثة
تقلب بعدها بخناقة
وفاكرها فهلوا وحداقة
وأنت يلى كسرت الإشارة
صغير كنت أو كبارة
بسرعة وفاكرها إثارة
ولا همك الناس المارة
مش جمودية ولا حتى شطارة
واللى اتعلمته فى السواقة
أصبح ماضى واتقلب بخناقة
ومن أقصى الشمال لأقصى اليمين
حرام عليكم بقت عجين
والاحترام تاه وراح فين
وأنت يلى واضع طوبة قدام بيتك
جنزير وحديد عشان عربيتك

ولا حتى قدام محلك
وفاكر الشارع بقى ملكك
ويلى بترمى زبالة فى الشارع
ويلى فارش لنص الشارع
أتقى الله حتى فى سرك
علشان رب العباد يبارك لك
النبى وصى على سابع جار
وأنت بنأذى أقرب جار
ارحموا شوية الشارع
وخلوا الرحمة فعل مضارع