ينشر"اليوم السابع" نص تحقيقات النيابة العامة فى واقعة قتل 4 متهمين بينهم مسجلون خطر، لـ"طالب" بحجة معاتبتهم له على معاكسة فتاة بعين شمس، حيث استمع المستشار معتز عاطف مدير نيابة حوادث شرق القاهرة، إلى أقوال محمد على، المجنى عليه الثانى وشقيق القتيل، فى القضية رقم 15427 لسنة 2015 جنح عين شمس .
المتهمون
والمتهمون فى القضية هم كل من، مصطفى إسماعيل، الشهير بـ"قوطة"، ويوسف إبراهيم هاشم عبد المنعم والشهير بـ"سمبل"، مسجل خطر، حسام سيد صادق، فؤاد مرعى فؤاد .
وفيما يلى نص التحقيقات:
س/ ما هى تفصيلات بلاغك؟
ج/ " اللى حصل ملوش علاقة باللى قالوا المتهم مصطفى إسماعيل الشهير بـ"قوطة" فى التحقيقات، بأن أخويا عبد الرحمن عاكس واحدة قريبته فى الشارع، وده كله عشان يكسب تعاطف النيابة ويكسب تعاطف الناس معاه، لكن الحقيقة إن قوطة هو مسجل خطر معروف عندنا فى شارع محمد فؤاد حافظ، فى منطقة منشية التحرير، وهو بلطجى وتاجر مخدرات مشهور وكل شباب المنطقة بتخاف منه ومباحث قسم شرطة عين شمس عارفين كدا كويس .
مواجهة سابقة بين المتهم والمجنى عليه
وأضاف شقيق القتيل "عبد الرحمن أخويا حكالى إن قوطة اتعرضله يوم 23 رمضان، وحاول ياخد منه تليفونه المحمول بقوة السلاح لأنه كان معاه مطواة قرن غزال، لكن عبد الرحمن رفض يستسلمله ويديله تليفونه، ودخل معاه فى مواجهه، وربنا نصره عليه، وضربه وقدر يهرب منه ويجى على البيت، وكان ساعتها وشه كله كدمات وجسمه فيه جروح " .
وأشار شقيق القتيل "وحذرت بعدها عبد الرحمن أخويا يمشى من المكان اللى بيقعد فيه "قوطة" مرة تانية لأنه مفترى ومش هيسكت، وفعلا يوم 25 رمضان بعد واقعة محاولة سرقته لقينا "قوطة" جى عندنا البيت ومعاه 3 شباب مسجلين من المنطقة وهما، يوسف إبراهيم هاشم عبد المنعم والشهير بـ"سمبل"، حسام سيد صادق، فؤاد مرعى فؤاد، وفضلوا يندهوا على أخويا وهما تحت البيت ويقولوا "لو أنت راجل انزلنا"، وفضلوا يشتموا علينا فى البيت.
سرقة موبايل وراء جريمة القتل
وأوضح شقيق القتيل: "ساعتها عبد الرحمن قرر ينزلهم عشان يتكلم معاهم ويشوفهم عاوزين منه إيه، لأن شكلنا بقى وحش جداَ فى المنطقة بعد بهدلتهم لينا، راح عبدالرحمن أخويا قال لـ"قوطة"، إيه يا مصطفى ينفع اللى أنت عامله دا أنا جارك يا أخى إزاى تعمل كدا مع جارك ميصحش؟، راح "قوطة" ماسك فيه على طول، وفضل يضرب فيه هو واللى معاه، ولما أخويا قاومهم "قوطة" ضربه بالمطوة فى "صدره"، وأنا لما شفت منظر الدم وهو نازل من جسم اخويا ومكنتش مصدق راحوا اتلموا عليا وضربونى بـ"المطوة" فى صدرى أنا كمان، لكن أخويا الله يرحمه مات على طول، فالموضوع أصلا بسبب سرقة موبايل مش معاكسة فتاة زى ما هما بيفتروا على أخويا".
عدد الردود 0
بواسطة:
احمد
ارحموا الناس من البلطجية و تجار المخدرات