فيسبوك
واتساب
سلامو عليكو.. بداية كدة أنا مبعرفش اتكلم بس ممكن أحكى للصبح..
هعرف نفسى أكتر أنا شاب زى ما بيقولوا فى منتصف العشرينات أعزب ويقدس الحياة السنجل.
كل واحد مننا المفروض أنه عايش على شوية أهداف خاصة وأهداف عامة مع الأخذ فى الاعتبار طبعا أن فى ناس أنانية ممكن تكون كل أهدافها.. خاصة زى الفلوس، الشهرة، السلطة. خلينا فى المهم دلوقتى، أنت فعلا شايف أنك رايح ناحية هدفك ولا ماشى بتلاوش وخلاص وزى ما هى تيجى تيجى المهم النية.. أظن أننا محتاجين نقف كل فترة من حياتنا ونشوف إحنا ماشين صح ولا بنضيع وقت والأهم هو أننا نقف ونشوف الحاجات اللى كانت مهمة فى حياتنا هى لسه مهمة ولا خلاص وهل تستحق أننا نتعب وكدة عشانها وهل ممكن نأجلها يعنى ناخد بريك مثلا.
إحنا محتاجين كل فترة نعمل "ابديت" للأهداف ونشوف هى لسه أهداف ولا بقت أحلام مستحيلة، هى لسه مهمة ولا ممكن نكنسلها..قيس على كدة الدراسة اللى بعد الجامعة والتحويش لمقدم شقة فى التجمع الخامس أو التحويش للجواز أو أن تقرب من بنت عجباك جدا أو انك تحوش عشان تجيب عربية أو عشان تسافر اسبوع فى الهند ولا البرازيل ولا لبنان.. خلاصة القول الحياة من غير أهداف حتى لو بسيطة بالنسبة لغيرك حياة بائسة جدآ.. الأهم من وجود الأهداف فى حياتنا هى اننا نقف كل شوية نشوف إحنا موقفنا بقى ايه من الاهداف اللى فى حياتنا وقربنا منها ولا زى ما احنا وهى لسة مهمة بالنسبة لنا ولا خلاص بقت مش مهمة.
اوعى تسيب نفسك للدنيا هى اللى تمشيك !
شخص يفكر - أرشيفية
