فيسبوك
واتساب
هوه الواحد بـيهين نفسه
لما قال كلمه ف نفسه
كلمة لا غلط فيها ولا عيب
ولا جاب سيرة حد فى الغيب
كان قصده يفضفض بيها
وواعى كمان ف معانيها
مش قاصد يؤذى بيها حد
ولا كمان بـيجور على حد
ولا هيه طبيعة وعادى
أى رأى غيرنا نعادى
وأحنا الصح وغيرنا زبادى
لا ياسى الأستاذ مش صح
صوت الصح ما فيهوش نحَّ
لازم تسمع رايي كمان
ده ربنا خلق لنا ودان
مش منظره فى الإنسان
يمكن رأيي يبقى تمام
ورأيك يبقى أى كلام
كلنا لينا عقل وراس
ومش بس العلم فى الكراس
اسأل حتى عم العقاد
ما شاء الله عليه بذكائه الحاد
اتعلم لحد ابتدائية
بس ثقافته موسوعية
أحسن من مية كلية
ومش بالعقل بس لوحده
لازم الأخلاق تكون عنده
اصلها سر الإنسانية
والمعاملة بين البشرية
معادلة مش صعبة
ان احنا نكون أحبة
لازم نسمع بعض شوية
ولا الصوت العالي غيه
خلى حوارنا يكبر حبة
علشان بكره نبقى أحبة
صورة ارشيفية
