بالفيديو.. مواطن:”ابنى اتضرب بالرصاص فى الشارع والشرطة ماجبتش حقه”

قال المواطن عاطف عبد العال من منطقة إمبابة، فى رسالة وجهها إلى رئيس الجمهورية، عبد الفتاح السيسى:” فوجئت باتصال على تليفونى وبيقولوا لى ابنك فى المستشفى ومضروب بالرصاص، جرينا على المستشفى، لقيت ابنى وعنده 12 سنة، مضروب بالرصاص وبين الحياة والموت”.

وأضاف فى رسالته التى وجهها لرئيس الجمهورية للحصول على حقه ممن أطلق الرصاص عليه قائلا:” ابنى كان ماشى فى الشارع واتضربت عليه رصاصة مجهولة مانعرفشى مين الى ضرب نار عليه، وسألنا الناس فى الشارع قالوا ماكانش فيه أى مشاجرات أو منطقة فيها أحداث بالعكس منطقة هادية”.

وقال المواطن عاطف:” لما روحت قسم الشرطة ضابط المباحث قالى إحنا مانعرفش حاجة وهات لنا خيط نمشى عليه عشان نجيبلك حق ابنك، ولما أنا أجيب خيط المباحث تمشى عليه مين يحمى الناس”، مناشدا الرئيس ووزير الداخلية بالبحث عن حق ابنه صاحب الـ12 عام”.

وشدد :” لو ابن حد من المسئولين الكبار كانوا نزلوا الشارع وقلبوا الدنيا لكن عشان ابن مواطن غلبان ماحدش هيدور على حقه، وأنا خلاص فاض بيا ومش عارف أعمل”.