أهالى العشوائيات غاضبون من مسلسلات رمضان.. مواطن من منشأة ناصر: المؤلفين قاعدين فى التكييف و"حوارى بوخارست" بيعلمنا الإجرام.. وآخر: "لو الستات عندنا زى ستات مولد وصاحبه غايب كنا قتلناهم"

أصبحت صورة "العشوائيات" ونموذج البلطجى، قماشة يراها صناع الدراما لا تخيب أبدا فى رفع نسبة المشاهدة ومن ثم زيادة نسبة الإعلانات، تكررت قصة "البلطجى" الذى يخشاه أهالى المنطقة ويفعلوا أى شىء لإرضائه خوفا منه، وبات مشهد "السنج والمطاوى" ومعارك الحارة بالسيوف مشاهد عادية قد تراها فى أكثر من عمل درامى بنفس النمط المفتقر للابتكار والإبداع.

هكذا يرى الصناع وفنانى الدراما والسينما فى مصر صورة العشوائيات والأهالى القاطنين بها، لذلك حاولنا أن نعكس الصورة ونذهب إلى إحدى المناطق العشوائية بالقاهرة وهى منشأة ناصر وتحديدا "حى الزبالين" لنتعرف منهم هل صورتهم التى يروها كل يوم فى التلفاز وما إذا كانت تمثلهم بالفعل أم لا؟.

منشأة ناصر

وبدأ الحديث مع"عزت نعيم"، أحد مؤسسى نقابة الزبالين بالمنطقة، وقال: "احنا بشر زينا زى أى حد وعلى فكرة أنا بتكلم إنجليزى واختارونى أحسن مبدع اجتماعى وأنا أصلا من حى الزبالين، والمؤلفين بيفكرونى بوزير قاعد فى التكيف ومش حاسس بالشعب كمان المؤلف بيقعد فى أوضة مكيفة وبينزل عليه الوحى وبيكتب سيناريوهات بعيدة كل البعد عن أرض الواقع ".

وأضاف نعيم لـ"اليوم السابع": من ضمن الأعمال اللى استفزتنى فى رمضان كان مسلسل "حوارى بوخاريست" ايه كمية البلطجة والإجرام اللى فى المسلسل ده غير أن الفنان أمير كرارة حسسنى إنه بيؤدى دور أبوزيد الهلالى، بصراحة المسلسلات بقت أوفر أوى وبتمثل وجهة نظر فوقية وطبقية والفنانين اللى فاكرين إنهم كده بيعكسوا الواقع على العكس هم بيعلموا عيالنا معنى الإجرام الحقيقى ".

حى الزبالين

وتقول ليلى، مدرسة وتعيش بالمنطقة: أعيش فى العشوائيات وبين أتلال القمامة منذ طفولتى ولكننى تمكنت أن أتعلم وأدخل مدرسة وأصبح مدرسة ومربية أجيال رغم أننى أنتمى لمنطقة عشوائية تظهرها المسلسلات دائما بالبلطجة والدعارة والمخدرات، والصورة دى بتسيئ لينا أوى كفاية ان لما بوقف تاكسى وأقوله مكانى بيرفض وبيخاف يخش المنطقة عشان الدراما اكلت دماغهم وخلتنا قتالين قتلة " .

مولد وصاحبه غايب

ومن جانبه يؤكد ميخائيل ويعمل "متعهد قمامة": ابن العشوائيات مش هو بس اللى فاشل أنا نفسى أعرف هو مفيش ابن وزير بيشرب مخدرات ولا هى الكوسة والواسطة فى صورتنا فى التلفزيون كمان، لو فى عدل بجد فى البلد دى كان ابن العشوائيات عندنا يوصل للقضاء مش يطلع بلطجى وحرامى".

وذكر ميخائيل: "إحنا لو الستات عندنا زى اللى فى مسلسل "مولد وصاحبة غايب" كنا قتلناهم مفيش عندنا الكلام ده، ده كلام أفلام وتلفزيون".

ويرى عطية، 30 سنة: السبكى هو السبب فى حالتنا إحنا جالنا إحباط ويأس من صورتنا فى الأفلام، وأعتقد أن شخصية "عبدة موته" دى ملهاش أى علاقة بالواقع بالعكس بعد ما الفيلم نزل أنا بقيت بشوف شباب بتحلق حلقة محمد رمضان وتمشى مشيته حتى كلامه ده احنا بنتعلم منه البلطجة والصياعة".

ليلى اسكندر

ومن جانبها أشارت الدكتورة ليلى إسكندر، وزيرة التطوير الحضرى والعشوائيات، إلى أنه ليس كل ما تقدمه الأعمال الفنية وتشمل السينما والدراما التليفزيونية عن العشوائيات حقيقى قد يكون جزءا منه وليس الصورة الكاملة، لأن هذه المناطق بها أسر تسعى إلى تربية أبنائها وبناء منازلهم على الرغم من الظروف المعيشية التى تحاط بهم.

وتابعت إسكندر لـ"اليوم السابع": لن نستطيع أن نحجر على صناع الدراما فى إظهار صورة محددة ولكن ما نقوم به الآن وضع برامج لتعكس صورة إيجابية عبر شاشات التليفزيون عن أهالى العشوائيات.