د. صبرى إسماعيل يكتب: ساعة عصارى

ساعة عصارى مع الترعة--ونسمة كانت هيمانة
وذكريات قلبى بترعى------بين المزارع سرحانة
سمعت ترعتنا البارعة-------وآه بتصرخ حزنانة
مسحت بإيديّا دموعها---من بين عيونها الدبلانة
وسألتها رُدّى بسرعة------وليه حزينة وزعلانة
ردّت –بجد بتتكلّم؟!-----مش انت عايش ويّانا؟!
الدم سايل يتألّم--------فرّقنا وبحقده رمانا
وفكر سارح ومبلّم-------وحروب غبية وخيبانة
وعقل للجهل مسلِّم------بينشره بكل أمانة
واليُتم ناقص يتكلّم---ويصب غضبه على الحانة
كابول ومالى وعرب العين--وكل أرضنا وجعانة
سلام مزهزه عند كوهين-والرعب لاحمد وبهانة
ومكلمات تهدم وتهين--حتى اللسان أصبح دانة
براءة منكم كل الدين-----ياللى قلوبكم مرضانة